ଭବାନୀପାଟଣା/କୋକସରା,୨୩।୪(ସ୍ବ.ପ୍ର/ଡି.ଏନ୍.ଏ.): ଲକ୍ଡାଉନକୁ କଡାକଡି କରିବା ପାଇଁ ପ୍ରତି ଜିଲା ସୀମାନ୍ତରେ ପାଟ୍ରୋଲିଂ ବ୍ୟବସ୍ଥା ସହ ଧରପଗଡ଼ ଜାରି ରହିଛି। ଏହି କ୍ରମରେ ନବରଙ୍ଗପୁର-କଳାହାଣ୍ଡି ଜିଲା ସୀମାନ୍ତ କୋକସରା ବ୍ଲକ ଆମପାଣି ଘାଟି ନିକଟରେ ଥିବା ଜନଜାତି ଆବାସିକ ବିଦ୍ୟାଳୟରେ ସ୍ଥାନୀୟ ବ୍ଲକ ପ୍ରଶାସନ ପକ୍ଷରୁ ଏକ ସଙ୍ଗରୋଧ ଗୃହ କରାଯାଇଛି। ଏଥିରେ ରାଜ୍ୟ ବାହାରୁ ଓ ଜିଲାର ବିଭିନ୍ନ ଅଞ୍ଚଳରୁ ଫେରୁଥିବା ଶ୍ରମିକଙ୍କୁ ରଖାଯାଉଛି। ହେଲେ ବୁଧବାର ରାତିରେ ଏହି ସଂଘରୋଧ ଗୃହରୁ ୨୫ ଅନ୍ତୋବାସୀ ଫେରାର ହେବା ଘଟଣା ସାଧାରଣରେ ଚର୍ଚ୍ଚାର ବିଷୟ ହୋଇଛି। ଏହି ଘଟଣା ପରେ ସଙ୍ଗରୋଧ ଗୃହରେ ଢିଲା ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ମିଳିଥିବା ସୂଚନା ଅନୁଯାୟୀ, ଆମାପଣି ଜନଜାତି ଆବାସିକ ବିଦ୍ୟାଳୟରେ କରାଯାଇଥିବା ସଙ୍ଗରୋଧ ଗୃହରେ ଜିଲା ତଥା ରାଜ୍ୟ ବାହାରୁ ଆସିଥିବା ମୋଟ ୬୪ ଜଣ ଶ୍ରମିକ ରହୁଥିଲେ। ସେଥିମଧ୍ୟରୁ ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ଅଞ୍ଚଳର ୨୬ ଶ୍ରମିକ ଗତ ସପ୍ତାହରେ ଫୁଲବାଣୀରୁ ଚାଲିଚାଲି ଫେରୁଥିବା ସମୟରେ ଆମପାଣି ପୋଲିସ ସେମାନଙ୍କୁ ଧରିଥିଲା। ପରେ ବ୍ଲକ ପ୍ରଶାସନ ସହାୟତାରେ ସେମାନଙ୍କୁ ସ୍ଥାନୀୟ ସଙ୍ଗରୋଧ ଗୃହରେ ରଖାଯାଇଥିଲ। ବୁଧବାର ରାତିରେ ଉକ୍ତ ୨୬ଶ୍ରମିକଙ୍କ ମଧ୍ୟରୁ ୨୫ଜଣ ଫେରାର ହୋଇଯାଇଥିଲେ। ଖବର ପାଇ ଗୁରୁବାର ସକାଳରେ କୋକସରା ତହସିଲଦାର ମୌସୁମୀ ନାୟକ, ବିଡିଓ ମନୀସା ଦାସ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଆମପାଣି ସରପଞ୍ଚ ଟିକିଚନ୍ଦ୍ର ଧଙ୍ଗଡାମାଝୀଙ୍କୁ ପଚାରିବାରୁ ସେମାନେ କେମିତି ଗଲେ ତାହା ଜଣାପଡି ନାହିଁ । ତଦନ୍ତ ଚାଲିଛି ଓ ପୋଲିସକୁ ମଧ୍ୟ ଆମେ ଲିଖିତ ଭାବେ ଜଣାଇବୁ ବୋଲି କହିଥିଲେ। ଅନ୍ୟପକ୍ଷରେ,ସଙ୍ଗରୋଧ ଗୃହରୁ ଶ୍ରମିକମାନେ ଫେରାର ହେବା ପରେ ସ୍ଥାନୀୟ ପୋଲିସ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି।
