ଟିକିରି,୨୯ା୪: ରାୟଗଡ଼ା ଜିଲା କାଶିପୁର ବ୍ଲକ୍ ଟିକିରି ହାଇସ୍କୁଲସ୍ଥିତ ସଙ୍ଗରୋଧ କେନ୍ଦ୍ରରେ ଥିବା ୧୬ ଶ୍ରମିକ ମଙ୍ଗଳବାର ଫେରିଛନ୍ତି। ପ୍ରକାଶ ଯେ, ମାର୍ଚ୍ଚ ୨୯ ରେ ଆନ୍ଧ୍ର ପ୍ରଦେଶର ବିଶାଖାପାଟଣାରୁ ୬ ଜଣ ବ୍ୟକ୍ତି ବାଇକ୍ ଯୋଗେ ବଲାଙ୍ଗୀର ଜିଲାର ବଡ଼ମାଲ ଅଞ୍ଚଳକୁ କାମ ପାଇଁ ଯିବା ସମୟରେ ପୋଲିସ ଅଟକାଇଥିଲା। ପରେ ଏମାନଙ୍କୁ ସଙ୍ଗରୋଧରେ ରଖାଯାଇଥିଲା। ଜଣଙ୍କ ନିକଟରେ ପାସ୍ ରହିଥିବାରୁ ତାଙ୍କୁ ୨ ଦିନ ସଙ୍ଗରୋଧ ଗୃହରେ ରଖି ସ୍ବାସ୍ଥ୍ୟ ପରୀକ୍ଷା ପରେ ଛାଡ଼ି ଦିଆଯାଇଥିବାବେଳେ ଅନ୍ୟ ୫ ଜଣ ସଙ୍ଗରୋଧ ଗୃହରେ ଥିଲେ। ସେହିପରି ମାର୍ଚ୍ଚ ୩୦ରେ ରାୟଗଡ଼ାରୁ ନବରଙ୍ଗପୁର ଚାଲି ଚାଲି ଯାଉଥିବା ନବରଙ୍ଗପୁର ଜିଲାର ୧୧ ଶ୍ରମିକଙ୍କୁ ଅଟକାଇ ସଙ୍ଗରୋଧରେ ରଖାଯାଇଥିଲା। ସଙ୍ଗରୋଧରେ ଥିବା ସମୟରେ ଏମାନଙ୍କ ଖାଦ୍ୟ ବ୍ୟବସ୍ଥା ସହ ନିୟମିତ ସ୍ବାସ୍ଥ୍ୟ ପରୀକ୍ଷା କରାଯାଉଥିଲା। ମଙ୍ଗଳବାର ଜିଲା ପରିଷଦ ଅଧ୍ୟକ୍ଷ ଗଙ୍ଗାଧର ପୁଆଲ, କାଶିପୁର ବିଡିଓ ସୁଧାକର ରଇତ, ଏବିଡିଓ ବଳରାମ ପାତ୍ର, ତହସିଲଦାର ଶରତ ଶବର, ଟିକିରି ଆଇଆଇସି ସୁଜ୍ଞାନୀ ସାହୁଙ୍କ ସମେତ ସରପଞ୍ଚ କୁମାରୀ ପିଡିକା ପ୍ରମୁଖ ଉପସ୍ଥିତ ରହି ସଙ୍ଗରୋଧରେ ଥିବା ଶ୍ରମିକମାନଙ୍କୁ ନିଜ ଅଞ୍ଚଳକୁ ପଠାଇଥିଲେ। ଜିଲାପାଳଙ୍କ ନିର୍ଦ୍ଦେଶରେ ନବରଙ୍ଗପୁର ଅଞ୍ଚଳର ୧୧ ଜଣଙ୍କୁ ଏକ ସ୍କୁଲ୍ ବସ୍ ଯୋଗେ ପଠାଯାଇଛି। ସେହିପରି ଆନ୍ଧ୍ର ପ୍ରଦେଶର ୫ଜଣଙ୍କୁ ବୋଲେରୋ ଯୋଗେ ସେମାନଙ୍କ କର୍ମସ୍ଥଳୀ ବଲାଙ୍ଗୀର ପଠାଯାଇଥିବା ଜଣାପଡ଼ିଛି। ଯିବା ସମୟରେ ସାଥିରେ ଖାଦ୍ୟ ସାମଗ୍ରୀ ମଧ୍ୟ ଦିଆଯାଇଥିବା କୁହାଯାଇଛି। ଏହି ସମୟରେ ଟିକିରି ପଞ୍ଚାୟତର ପିଇଓ ସୁନୀଲ୍ କୁମାର ବ୍ରହ୍ମା, ଜିଆର୍ଏସ୍ ଭୁବନ ଖୋସ୍ଲା ପ୍ରମୁଖ ଉପସ୍ଥିତ ଥିଲେ।
