ନୂଆଦିଲ୍ଲୀ,୨୫।୬(ପି.ଟି.)-ବ୍ୟାଙ୍କରେ ଆକାଉଣ୍ଟ ଖୋଲିବା ଓ ମୋବାଇଲ ସିମ୍ କାର୍ଡ ପାଇଁ ଆଧାରକୁ ସ୍ବେଚ୍ଛାକୃତ ଭାବେ ପରିଚୟ ପ୍ରମାଣ ଭାବେ ବ୍ୟବହାର କରିବା ନିମନ୍ତେ ଏକ ବିଲ୍ ସୋମବାର ଲୋକ ସଭାରେ ଆଗତ ହୋଇଛି। ଗତ ମାର୍ଚ୍ଚରେ ଜାରି ହୋଇଥିବା ଅଧ୍ୟାଦେଶ ସ୍ଥାନରେ ଏହି ସଂଶୋଧିତ ଆଇନ ଲାଗୁ ହେବ। ପ୍ରସ୍ତାବିତ ଆଇନରେ ନିୟମ ଉଲ୍ଲଂଘନକାରୀଙ୍କ ପାଇଁ କଠୋର ଦଣ୍ଡବ୍ୟବସ୍ଥା ରହିଛି। ବିଲ୍କୁ ଆର୍ଏସ୍ଏମ୍ ଏମ୍ପି ଏନ୍.କେ. ପ୍ରେମଚନ୍ଦ୍ରନ୍ ବିରୋଧ କରି ଏହା ସୁପ୍ରିମକୋର୍ଟଙ୍କ ଆଧାର ରାୟର ସମ୍ପୂର୍ଣ୍ଣ ଉଲ୍ଲଂଘନ ବୋଲି କହିଥିଲେ। ଏହାଦ୍ୱାରା ଘରୋଇ କମ୍ପାନୀ ହାତକୁ ଆଧାର ତଥ୍ୟ ଚାଲିଯିବ ଏବଂ ଗୋପନୀୟତା ଅଧିକାରର ଉଲ୍ଲଂଘନ ହେବ। ଏହାର ଜବାବ ଦେବାକୁ ଯାଇ ସୂଚନା ଓ ପ୍ରଯୁକ୍ତି ମନ୍ତ୍ରୀ ରବିଶଙ୍କର ପ୍ରସାଦ କହିଥିଲେ, ଆଧାର ଏକ ବୈଧ ଆଇନ ଓ ଜାତୀୟ ସ୍ବାର୍ଥ ପାଇଁ ଉଦ୍ଦିଷ୍ଟ। ଏଥିରେ ଗୋପନୀୟତା ଅଧିକାରର ଉଲ୍ଲଂଘନ ହେଉନାହିଁ। ବର୍ତ୍ତମାନ ସୁଦ୍ଧା ୬୦ କୋଟି ଲୋକ ଆଧାର ମାଧ୍ୟମରେ ସିମ୍ କାର୍ଡ ନେଇଛନ୍ତି। ଜନସାଧାରଣ ଆଧାରକୁ ଗ୍ରହଣ କରିସାରିଛନ୍ତି ବୋଲି ସେ କହିଥିଲେ।
