ନୂଆଦିଲ୍ଲୀ,୧୩।୪ (ପି.ଟି.): କୋଭିଡ୍-୧୯ ପାଇଁ ସାରା ଦେଶ ତଥା ବିଶ୍ୱରେ ଲକ୍ଡାଉନ ଜାରି ହୋଇଛି। ଏହି ସମୟରେ ଭାରତୀୟ ମହିଳା ହକି ଦଳର କୋଚ ଜୋଏର୍ଡ ମାରିଜନେ ନିଜ ପରିବାରଠାରୁ ହଜାର ହଜାର କିଲୋମିଟର ଦୂରରେ ରହି ବେଙ୍ଗାଲୁରୁସ୍ଥିତ ସାଇ ସେଣ୍ଟର ରହୁଛନ୍ତି। ଏହି ସମୟରେ କ୍ରୀଡ଼ାଜନିତ କାର୍ଯ୍ୟକଳାପ କିଛି ନ ଥିବାରୁ ସେ ପର୍ଯ୍ୟାପ୍ତ ସମୟ ପାଇଛନ୍ତି। ଏହି ସମୟର ସଦ୍ବ୍ୟବହାର କରିବାକୁ ଯାଇ ସେ ଲେଖକ ହୋଇଛନ୍ତି। ସେ ଏହି ଫାଙ୍କା ସମୟରେ ବହି ଲେଖିବା ଜାରି ରଖିଛନ୍ତି। ଭାରତରେ ରହଣି ସମୟରେ ସେ ହାସଲ କରିଥିବା ଅଭିଜ୍ଞତାକୁ ନେଇ ଲେଖା ଜାରି ରଖିଛନ୍ତି।
ହଲାଣ୍ଡର ଅଧିବାସୀ ମାରିଜନେ ହେର୍ଟୋଜେନବୋସ୍କରେ ରୁହନ୍ତି। ସେଠାରେ ତାଙ୍କ ସ୍ତ୍ରୀ, ୩ ଝିଅ ଓ ଗୋଟିଏ ପୁଅ ରୁହନ୍ତି। ପରିବାରଠାରୁ ଦୂରରେ ରହି ସମୟ କାଟିବା ନିଶ୍ଚିତ ଭାବେ କଷ୍ଟକର ବୋଲି ୪୫ ବର୍ଷୀୟ ମାରିଜନେ କୁହନ୍ତି। ଯେତେ ସମ୍ଭବ ନିଜକୁ ବ୍ୟସ୍ତ ରଖିବା ପାଇଁ ପ୍ରୟାସ କରୁଛି। ମିଳିଥିବା ଏହି ଫାଙ୍କା ସମୟରେ ବହି ଲେଖୁଛି ବୋଲି ପିଟିଆଇକୁ ସାକ୍ଷାତ୍କାର ଦେବା ଅବସରରେ ସେ ଏହି କଥା କହିଛନ୍ତି। ଭାରତରେ ସାଢେ ୩ ବର୍ଷ ହେବ ରହିଆସୁଛି। ଜଣେ କୋଚ୍ ହିସାବରେ ଓ ବ୍ୟବସାୟିକ ଜୀବନରେ ଏଠାରେ ମୋର ବହୁ ମଜାଦାର ଅଭିଜ୍ଞତା ମଧ୍ୟ ରହିଛି।
ଭାରତରେ ଲକ୍ଡାଉନ୍ ଜାରି ହେବାର ଠିକ୍ ପୂର୍ବରୁ ମାରିଜନେ ନେଦରଲାଣ୍ଡ୍ସ ଯାତ୍ରା କରିଥିଲେ। ତେବେ ନିଜ ଦଳ ଓ ପରିବାର ହିତକୁ ଦୃଷ୍ଟିରେ ରଖି ସେ ଅଧାବାଟରୁ ପୁଣି ଭାରତ ପ୍ରତ୍ୟାବର୍ତ୍ତନ କରିଥିଲେ। ନିଜ ସ୍ତ୍ରୀ ଓ ପରିବାରକୁ ସେ ପ୍ରଶଂସା କରିଛନ୍ତି। ଏହି କଷ୍ଟକର ସମୟ ଓ ପରିସ୍ଥିତିରେ ସେମାନେ ବେଶ୍ ସାହସିକତାର ପରିଚୟ ଦେଇଥିବା ମାରିଜନେ କହିଛନ୍ତି। ଅଧା ବାଟରୁ ଫେରିଆସିବା କଷ୍ଟକର ହୋଇଥିଲେ ମଧ୍ୟ ଭାରତୀୟ ଦଳ ପ୍ରତି ମୋର ଦାୟିତ୍ୱବୋଧତା ରହିଛି। ଲକ୍ଡାଉନ୍ ସମୟରେ ସମ୍ପୂର୍ଣ୍ଣ ଦଳ ଏକାଠି ରହିଛି। ଏବେ ମଧ୍ୟ ଆମେ ପୂରା ଅଭ୍ୟାସ କରୁଛୁ। ଦଳକୁ ଏକାଠି କରିବାକୁ ଆମେ ଆହୁରି ପ୍ରୟାସ ଜାରି ରଖିଛୁ। ମହିଳା ଖେଳାଳିମାନେ ମଧ୍ୟ ସେମାନଙ୍କ ସ୍ପୋକନ ଇଂଲିଶ୍ ଶିକ୍ଷା ଜାରି ରଖିଛନ୍ତି।
ଖେଳାଳିମାନେ ମଧ୍ୟ ସେମାନଙ୍କ ପରିବାରଠାରୁ ଦୂରରେ ରହୁଛନ୍ତି। ଆମେ ସମସ୍ତେ ମୋଟିଭେଶନାଲ ସିନେମା ‘ମେରିକମ୍’ ଓ ‘ଦଙ୍ଗଲ’ ଦେଖୁଛୁ। କୋଭିଡ୍-୧୯ ମହାମାରୀ କାରଣରୁ ଟୋକିଓ ଅଲିମ୍ପିକ୍ସ ଗୋଟିଏ ବର୍ଷ ଘୁଞ୍ଚିଯାଇଛି। ତେଣୁ ବିଶ୍ୱର ସବୁ ଦଳ ଗୋଟିଏ ଅତିରିକ୍ତ ବର୍ଷ ହାସଲ କରିଛନ୍ତି। ଭାରତ ଏକ ଯୁବ ଦଳ ହୋଇଥିବାରୁ ଆମେ ଲାଭ ଉଠାଇବାକୁ ଚେଷ୍ଟା କରିବୁ। ଲକ୍ଡାଉନ ଶେଷ ହେବା ପରେ ଆମେ ଏକ ବ୍ରେକ୍ ନେବୁ ଓ ପ୍ରଶିକ୍ଷଣ ଶିବିର ଆରମ୍ଭ କରିବୁ। ତେବେ ସଙ୍ଗେ ସଙ୍ଗେ ଟୁର ଆରମ୍ଭ କରିବାର ଯୋଜନା ନାହିଁ ବୋଲି ମାରିଜନେ କହିଛନ୍ତି।
