ଉହାନ, ୧୭।୬: ଚାଇନାର ଉହାନ ସହର କରୋନା ସଂକ୍ରମଣର ଏନ୍ତୁଡ଼ିଶାଳ। ସଂକ୍ରମଣ ଯୋଗୁ ଏଠାରେ ଲକ୍ଡାଉନ୍ ଜାରି ହୋଇଥିଲା। ଲକ୍ଡାଉନ୍ ସମୟରେ କେବଳ ଘରେ ବସି ଖାଇବା ପିଇବା ଛନା ଅନ୍ୟ କାମ ନ ଥିବାରୁ ଉହାନର ଜଣେ ୨୬ ବର୍ଷ ବୟସ୍କ ଯୁବକ ଝାଓଙ୍କର ଓଜନ ୧୭୭ କିଲୋରୁ ବଢ଼ି ୨୭୮ କିଲୋରେ ପହଞ୍ଚିଛି। ୨୦୧୯ ଡିସେମ୍ବରରେ ତାଙ୍କର ଓଜନ ୧୭୭ କିଲୋ ଥିଲା। କରୋନା ସଂକ୍ରମଣ ରୋକିବା ଲାଗି ସହରରେ ଲକ୍ଡାଉନ୍ ଘୋଷଣା ହୋଇଥିଲା। ସାଇବର କେଫ୍ରେ କାମ କରୁଥିବା ଝାଓ ଘରେ ବସି ରହିଥିଲେ। ଫଳରେ ଗତ ୫ ମାସ ମଧ୍ୟରେ ତାଙ୍କ ଓଜନ ୧୦୧ କିଲୋ ବଢ଼ି ୨୭୮ କିଲୋରେ ପହଞ୍ଚିଥିଲା। ଏପ୍ରିଲ୍ ୮ରେ ସହରରୁ ଲକ୍ଡାଉନ୍ ହଟିଥିଲା। ତେବେ ଅଧିକ ଓଜନ କାରଣରୁ ଝାଓ ଚାଲବୁଲ କରିବା ସ୍ଥିତିରେ ନ ଥିଲେ। ନିଶ୍ୱାସ ନେବାରେ ସେ କଷ୍ଟ ଅନୁଭବ କରୁଥିଲେ। ମେ ୩୧ରେ ସେ ଝାଗ୍ନନେଗ୍ ହସ୍ପିଟାଲକୁ ଏନେଇ ଫୋନ୍ କରିଥିଲେ। ସେ ୪୮ ଘଣ୍ଟା ଧରି ଶୋଇ ନ ଥିବା ଜଣାଇଥିଲେ। ଜୁନ୍ ୧ରେ ସ୍ବାସ୍ଥ୍ୟକର୍ମୀ ଝାଓଙ୍କ ଘରେ ପହଞ୍ଚିଥିଲେ। ତାଙ୍କୁ ହସ୍ପିଟାଲରେ ଭର୍ତ୍ତି କରିବା ଲାଗି ୧୦ ଜଣ ଲୋକଙ୍କର ସହାୟତା ଲୋଡ଼ା ଯାଇଥିଲା। ଇତିମଧ୍ୟରେ ତାଙ୍କ ପେଟର ଏକ ଅଂଶକୁ ଅପରେଶନ କରି ବାହାର କରାଯାଇଥିବା ହସ୍ପିଟାଲ ପକ୍ଷରୁ କୁହାଯାଇଛି।
