ମୁମ୍ବାଇ,୨୭।୫(ପି.ଟି.): ଲକ୍ଡାଉନ ଉଠିବା ପରେ ବୋଲରମାନେ ସେମାନଙ୍କ ଲୟ ଫେରିପାଇବା ପାଇଁ ସଂଘର୍ଷ କରିବେ ଓ ଏହା କଷ୍ଟକର ବୋଲି ପୂର୍ବତନ ଅଷ୍ଟ୍ରେଲିଆ ଦ୍ରୁତ ବୋଲର ବ୍ରେଟ୍ ଲି କହିଛନ୍ତି। ସବୁ ଫର୍ମାଟ ପାଇଁ ଫିଟ୍ନେସ ହାସଲ କରିବାକୁ ହେଲେ ବୋଲରମାନଙ୍କୁ ଅତିକମ୍ରେ ୮ ସପ୍ତାହ ଆବଶ୍ୟକ ହେବ ବୋଲି ସେ କହିଛନ୍ତି। ପୂର୍ବରୁ ମଧ୍ୟ ଆଇସିସି ବୋଲରମାନଙ୍କ ପାଇଁ ପ୍ରସ୍ତୁତି ସମୟ ଧାର୍ଯ୍ୟ କରିଛି। ଟେଷ୍ଟ କ୍ରିକେଟକୁ ଫେରିବାକୁ ହେଲେ ବୋଲରମାନଙ୍କ ପାଇଁ ୧୨ ସପ୍ତାହ, ଦିନିକିଆ ପାଇଁ ୬ ସପ୍ତାହ ଓ ଟି୨୦ ପାଇଁ ୫ ସପ୍ତାହ ସମୟ ଧାର୍ଯ୍ୟ କରାଯାଇଛି।
ଲକ୍ଡାଉନ୍ ପରେ ଉଭୟ ବୋଲର ଓ ବ୍ୟାଟ୍ସମ୍ୟାନଙ୍କ ସମାନ ପ୍ରକାର ପରିସ୍ଥିତ ସୃଷ୍ଟି ହେବ ଓ ଲୟକୁ ଫେରିବାକୁ ଉଭୟ ସଂଘର୍ଷ କରିବେ। ଫର୍ମ ଫେରିପାଇବାକୁ ବୋଲରଙ୍କୁ ଟିକିଏ ଅଧିକ ସମୟ ଲାଗିବ। ପୂରା ପେସ୍ ହାସଲ କରିବାକୁ ହେଲେ ବୋଲରଙ୍କୁ ସାଧାରଣତଃ ୬ରୁ ୭ ମାସ ସମୟ ଲାଗିବ ବୋଲି ଲି ଷ୍ଟାର ସ୍ପୋଟର୍ସ ଶୋ ‘କ୍ରିକେଟ କନେକ୍ଟେଡ’ରେ କହିଛନ୍ତି। ପୂରା ପେସ୍ରେ ବୋଲିଂ କରିବାକୁ ଓ ମ୍ୟାଚ୍ ଫିଟ୍ନେସ ହାସଲ କରିବାକୁ ହେଲେ ଦିନିକିଆ ଓ ଟେଷ୍ଟ କ୍ରିକେଟ ପାଇଁ ୮ ସପ୍ତାହ ଲାଗିବ।
ମେ ୨୧ ତାରିଖରେ ଇଂଲଣ୍ଡର ଦୁଇ ଦ୍ରୁତ ବୋଲର କ୍ରିସ୍ ଓ୍ବକ୍ସ ଓ ଷ୍ଟୁଆର୍ଟ ବ୍ରଡ ପ୍ରଥମ କ୍ରିକେଟର ଭାବେ କରୋନା ଭାଇରସ୍ ସଂକ୍ରମଣ ପରେ ବ୍ୟକ୍ତିଗତ ଟ୍ରେନିଂକୁ ଫେରିଛନ୍ତି। ସେହିପରି ଭାରତୀୟ ଦ୍ରୁତ ବୋଲର ଶାର୍ଦ୍ଦୁଳ ଠାକୁର ପ୍ରଥମ ବିସିସିଆଇ ଚୁକ୍ତିବଦ୍ଧ ଖେଳାଳିଭାବେ ଗତ ଶନିବାରଠାରୁ ଟ୍ରେନିଂ ଆରମ୍ଭ କରିଛନ୍ତି।
