ଉଲାନ-ଉଡେ(ରୁଷିଆ),୧୩।୧୦(ପି.ଟି.)- ଭାରତୀୟ ବକ୍ସର ମଞ୍ଜୁ ରାଣୀଙ୍କ ପ୍ରଥମ ବିଶ୍ୱ ଚାମ୍ପିୟନଶିପ୍ ଅଭିଯାନ ରୌପ୍ୟ ପଦକ ସହ ଶେଷ ହୋଇଛି। ରବିବାର ଅନୁଷ୍ଠିତ ୪୮ କେଜି ଓଜନ ବର୍ଗର ଫାଇନାଲରେ ମଞ୍ଜୁ ରୁଷିଆର ଇକାଟେରିନା ପାଲଟ୍ସେଭାଙ୍କଠାରୁ ପରାସ୍ତ ହୋଇଛନ୍ତି। ଦ୍ୱିତୀୟ ସିଡ୍ ଘରୋଇ ବକ୍ସର ଇକାଟେରିନା ୪-୧ ବ୍ୟବଧାନରେ ଜିତି ସ୍ବର୍ଣ୍ଣ ପଦକ ହାସଲ କରିଛନ୍ତି। ଗତ ଶନିବାର ୨୦ ବର୍ଷରେ ପାଦ ଥାପିଥିବା ରାଣୀ ଏକମାତ୍ର ଭାରତୀୟ ବକ୍ସର ଭାବେ ଫାଇନାଲରେ ପ୍ରବେଶ କରିଥିଲେ। ଚଳିତ ପ୍ରତିଯୋଗିତାରେ ଛ’ଥର ବିଶ୍ୱ ଚାମ୍ପିୟନ ଏମ୍.ସି. ମେରୀକମ୍(୫୧ କେଜି), ଯମୁନା ବୋରୋ (୫୪ କେଜି) ଓ ଲଭଲିନା ବରଗୋହେନ (୬୯ କେଜି) ବ୍ରୋଞ୍ଜ ପଦକ ଜିତିଛନ୍ତି।
ବାଉଟ୍ ଆରମ୍ଭରୁ ଉଭୟ ବକ୍ସର ଆଟାକ କରିଥିଲେ। କିନ୍ତୁ ରାଣୀ ପ୍ରତିଦ୍ୱନ୍ଦ୍ୱୀଙ୍କୁ ସିଧା ପଞ୍ଚ ମାରିପାରି ନ ଥିଲେ। ଦ୍ୱିତୀୟ ରାଉଣ୍ଡରେ ୬ଷ୍ଠ ସିଡ୍ ଭାରତୀୟ ବକ୍ସର ରାଣୀ ସିଧା ପଞ୍ଚ ମାରିବା ସହ ବିଜୟ ସମ୍ଭାବନା ସୃଷ୍ଟି କରିଥିଲେ। ଅନ୍ତିମ ରାଉଣ୍ଡର ଦୁହେଁ ଅତି ସବଧାନତା’ର ସହ ଖେଳିଥିଲେ। ଏପରି କି ରେଫରିଙ୍କୁ ହସ୍ତକ୍ଷେପ କରିବାକୁ ପଡ଼ିଥିଲା। ଶେଷରେ ଘରୋଇ ବକ୍ସର ମ୍ୟାଚ୍ ଜିତି ନେଇଥିଲେ। ଜଜ୍ଙ୍କ ଏହି ନିଷ୍ପତ୍ତିରେ ମଞ୍ଜୁ ଖୁସି ନ ଥିଲେ। ରାଣୀ ପ୍ରଥମ ଥର ପାଇଁ ଚଳିତ ବର୍ଷ ଜାତୀୟ କ୍ୟାମ୍ପରେ ଯୋଗଦେଇଥିଲେ। ହରିୟାଣା ପକ୍ଷରୁ ଚୟନ ହେବାରେ ବିଫଳ ହୋଇଥିଲେ। ଏଣୁ ସେ ପଞ୍ଜାବରୁ ମନୋନୀତ ହୋଇଥିଲେ। ଏଥିପୂର୍ବରୁ ୟୁରୋପର ସବୁଠୁ ପୂରୁଣା ସମ୍ମାନଜନକ ବକ୍ସିଂ ଇଭେଣ୍ଟ ଷ୍ଟ୍ରାଣ୍ଡଜା ମେମୋରିଆଲ ଟୁର୍ନାମେଣ୍ଟରେ ସେ ରୌପ୍ୟ ପଦକ ଜିତିଥିଲେ।
