ନୂଆଦିଲ୍ଲୀ,୨୮।୫: ଲକ୍ଡାଉନର ପ୍ରଭାବରେ ପ୍ରବାସୀ ଶ୍ରମିକ ସବୁଠାରୁ ବେଶି କ୍ଷତିଗ୍ରସ୍ତ ହୋଇଛନ୍ତି। ପ୍ରତିଦିନ ଲକ୍ଷ ଲକ୍ଷ ଲୋକ ଘରକୁ ଫେରୁଥିବା ଦେଖାଯାଉଛି। ୩୧ ମେ’ରେ ଲକ୍ଡାଉନ ୪.୦ ଶେଷ ହେଉଛି। ଲକ୍ଡାଉନର ଆଗାମୀ ପର୍ଯ୍ୟାୟ ସମ୍ପର୍କରେ ଶୀଘ୍ର ନିଷ୍ପତ୍ତି ହେବ। ଅର୍ଥୀକ ବିଶେଷଜ୍ଞ କହିଛନ୍ତି ଯେ, ପ୍ରବାସୀ ଶ୍ରମିକମାନେ ବର୍ତ୍ତମାନ ଘରକୁ ଫେରିଥିବାରୁ ଆର୍ଥତ୍କ କାର୍ଯ୍ୟକଳାପ ଟ୍ରାକ୍କୁ ଫେରିବାକୁ ସମୟ ଲାଗିବ। ସେଣ୍ଟର ଫର ମନିଟରିଂ ଇଣ୍ଡିଆନ ଇକୋନୋମି (ସିଏମ୍ଆଇଇ)ରିପୋର୍ଟ ମୁତାବକ ୨୪ ମେ ପର୍ଯ୍ୟନ୍ତ ବେରୋଜଗାରୀ ହାର ୨୪.୩% ରହିଛି। ଏହାର ପୂର୍ବ ସପ୍ତାହରେ ବେରୋଜଗାରୀ ହାର ୨୪% ରହିଥିଲା। ଗତ ୮ ସପ୍ତାହରେ ବେରୋଜଗାରୀ ହାର ୨୪.୨% ରହିଛି। ୨୫ ମେ’ ରେ ଭାରତର ହାରାହାରି ବେରୋଜଗାରୀ ହାର ୨୪.୫% ରେକର୍ଡ କରାଯାଇଛି। ଏହା ମଧ୍ୟରେ ସହରୀ ବେରୋଜଗାରୀ ୨୬.୩୦% ଏବଂ ଗ୍ରାମୀଣ ବେରୋଜଗାରୀ ୨୩.୭୦% ରହିଛି।
ସମ୍ପୂର୍ଣ୍ଣ ଲକ୍ଡାଉନ ସମୟରେ ବେରୋଜଗାରୀ ହାର ୨୪% ରହିଛି। ମାତ୍ର ଶ୍ରମିକଙ୍କ ଯୋଗଦାନ ହାର (ଏଲ୍ପିଆର୍)ରେ ଅଭିବୃଦ୍ଧି ଦେଖାଯାଉଛି। ସିଏମ୍ଆଇଇ ପରିଚାଳନା ନିର୍ଦ୍ଦେଶକ ମହେଶ ବ୍ୟାସ କହିଛନ୍ତି ଯେ, ଲକ୍ଡାଉନ ଶେଷ ହେବା ପରେ ରୋଜଗାର ଖୋଜିବା ଆଶାରେ ଲୋକମାନେ ପୁଣି ଥରେ ସହର ଅଭିମୁଖେ ଯାତ୍ରା କରିବାର ସମ୍ଭାବନା ରହିଛି। ଏହି କ୍ଷେତ୍ରରେ ବୃଦ୍ଧି ପରିଲକ୍ଷିତ ହେଉଛି। ଘରକୁ ଫେରିଥିବା ପ୍ରବାସୀଙ୍କ ପାଇଁ ପ୍ରମୁଖ ସମସ୍ୟା ହେଲା ସେଠାରେ ପର୍ଯ୍ୟାପ୍ତ ପରିମାଣର କାମ ଅଭାବ ରହିଛି। ଏହାକୁ ଧ୍ୟାନରେ ରଖିଲେ ଲୋକମାନେ ପୁଣି ଥରେ ସହର ମୁହାଁ ହେଉଥିବା ରିପୋର୍ଟରେ କୁହାଯାଉଛି। ଶ୍ରମିକଙ୍କ ଯୋଗଦାନରେ ଲଗାତର ଉନ୍ନତି ହେଉଥିବା ରିପୋର୍ଟରେ ପ୍ରକାଶ ପାଇଛି। ଏପ୍ରିଲରେ ଏହି ହାର ୩୫.୬% ରହିଥିଲା। ମାର୍ଚ୍ଚରେ ଏହା ୪୧.୯% ରହିଥିଲା। ମେ ମାସରେ ଏହି ହାର ୩୮.୮% ଛୁଇଁଛି। ୧୭ ମେ ସୁଦ୍ଧା ନିଆଯାଇଥିବା ଡାଟା ମୁତାବକ ବେରୋଜଗାରୀ ହାର ସ୍ଥିର ରହିଛି। ଶ୍ରମିକଙ୍କ ଯୋଗଦାନରେ ଉନ୍ନତି ଆସିଛି।
