ଯାଁଳା, ୨୫। ୯(ଡି.ଏନ.ଏ.): ଖୋର୍ଦ୍ଧା- ଭୁବନେଶ୍ୱର ଜାତୀୟ ରାଜପଥ ନଂ. ୧୬ର ଯାଁଳାଠାରୁ ରେତଙ୍ଗ ରେଳ ଷ୍ଟେଶନକୁ ଯାଇଥିବା ମୁଖ୍ୟ ରାସ୍ତାଟି ଲଗାଣ ବର୍ଷା ଯୋଗୁ ଜଳମଗ୍ନ ହୋଇଛି। ଫଳରେ ୩ଟି ପଞ୍ଚାୟତରେ ଲୋକମାନେ ଜାତୀୟ ରାଜପଥ ନଂ. ୧୬କୁ ଆସିବା ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି।
ବର୍ଷା ଯୋଗୁ ଏହି ରାସ୍ତାର ପ୍ରାୟ ୫ ଶହ ମିଟର ଜଳମଗ୍ନ ହୋଇରହିଛି। ଏହି ରାସ୍ତାରେ ଯାଉଥିବା ପାଣି ତଳକୁ ଗଡିଯିବା ବଦଳରେ ଅଟକି ରହୁଛି। କାରଣ ଏଠାରେ ଥିବା ଏକ କଲେଜ ପାଣି ଯିବା ବାଟଟିକୁ ଆବଦ୍ଧ କରି ଦେଇଛି। ତାହା ଛଡା ଆହୁରି ମଧ୍ୟ କେତେକ ଘରୋଇ ଜାଗାର ଘର ଓ ପ୍ରାଚିର ହେବା ଫଳରେ ଏହି ସମସ୍ୟା ଦେଖାଦେଇଛି। ଏଥିଯୋଗୁ କେତେକ ଘରୋଇ ସ୍କୁଲ, କଲେଜ ଏବଂ ସରକାରୀ ସ୍କୁଲର କର୍ମଚାରୀମାନଙ୍କର ଯିବା ଆସିବା ବାଧାପ୍ରାପ୍ତ ହୋଇଛି। ପାଣି ସୁଅରେ ରାସ୍ତାଟି କ୍ଷତିଗ୍ରସ୍ତ ହୋଇଛି। ଏବେଠାରୁ ଯଦି ଏହାର ବିକଳ୍ପ ବ୍ୟବସ୍ଥା କିଛି କରା ନ ଯାଏ ତେବେ ଭବିଷ୍ୟତରେ ଏ ରାସ୍ତାଟି ଲୋକମାନଙ୍କ ପାଇଁ ମରଣଯନ୍ତା ପାଲଟିଯିବ।
