ନୂଆଦିଲ୍ଲୀ,୫।୫:ବର୍ତ୍ତମାନ କରୋନାକୁ ପ୍ରତିରୋଧ କରିବା ଲାଗି ସାରା ବିଶ୍ୱରେ ଆର୍ଥତ୍କ କାର୍ଯ୍ୟକଳାପ ବନ୍ଦ ରହିଛି। ଏଭଳି ସ୍ଥିତିରେ ଏପ୍ରିଲରେ ଦେଶର ମାନୁଫାକ୍ଚରିଂ କାର୍ଯ୍ୟକଳାପ ରେକର୍ଡ ନିମ୍ନ ସ୍ତରକୁ ଖସିଯାଇଛି। ଆଇଏଚ୍ଏସ୍ ମାର୍କିଟ୍ ଦ୍ୱାରା ପ୍ରକାଶିତ ନିକେଇ ମାନୁଫାକ୍ଚରିଂ ପରଚେଜିଂ ମ୍ୟାନେଜର୍ସ ଇଣ୍ଡେକ୍ସ ଏପ୍ରିଲରେ ୨୭.୪%କୁ ଖସିଛି। ଏହା ମାର୍ଚ୍ଚରେ ୫୧.୮ ରହିଥିଲା। ୨୦୦୫ ମାର୍ଚ୍ଚ ପରଠାରୁ ଏହା ସବୁଠୁ ନିମ୍ନ ସ୍ତର। ଏହି ସୂଚକାଙ୍କ ବର୍ତ୍ତମାନ ୫୦ ଅଙ୍କ ନିମ୍ନକୁ କେବେ ଖସି ନ ଥିଲା। ମୋଟାମୋଟି ଭାବେ କହିବାକୁ ଗଲେ ମାନୁଫାକ୍ଚରିଂ କାର୍ଯ୍ୟକଳାପ ୩୦ ବର୍ଷ ତଳକୁ ଖସିଛି। କରୋନା ଭାରତ ବଜାରର କାରବାରକୁ ସମ୍ପୂର୍ଣ୍ଣ ଭାବେ କ୍ଷତିଗ୍ରସ୍ତ କରିଥିବା ଆଇଏଚ୍ଏସ୍ ମାର୍କିଟର ଇକୋନୋମିଷ୍ଟ ଇଲିୟଟ କେର୍ ସୂଚନା ଦେଇଛନ୍ତି।
ବଜାର ବନ୍ଦ ରହିବା ଯୋଗୁ ଚାହିଦା ନିମ୍ନଗାମୀ ହେବା ସହ ଯୋଗାଣ ଚେନ୍ କ୍ଷତିଗ୍ରସ୍ତ ରହିଥିବା ଏକ ଘରୋଇ କ୍ଷେତ୍ର ଫାର୍ମ ପକ୍ଷରୁ ହୋଇଥିବା ସର୍ଭେରୁ ସାମ୍ନାକୁ ଆସିଛି। ମାର୍ଚ୍ଚ ୨୫ରେ ଆରମ୍ଭ ହୋଇଥିବା ଲକ୍ଡାଉନ ଯୋଗୁ ଏସିଆର ତୃତୀୟ ବୃହତ୍ ଅର୍ଥ ବ୍ୟବସ୍ଥା ଭାବେ ପରିଗଣିତ ଭାରତୀୟ ବଜାରର କାରବାର ବେହାଲ ହୋଇଛି। ଚଳିତ ତ୍ରୈମାସରେ ଦେଶର ଜିଡିପି ଅଭିବୃଦ୍ଧି ପ୍ରାୟ ତିନି ଦଶନ୍ଧି ତଳକୁ ଖସିଯିବ ବୋଲି ରଏଟର୍ସ ପକ୍ଷରୁ ହୋଇଥିବା ଅର୍ଥନୀତିଜ୍ଞଙ୍କ ସର୍ଭେରେ ପ୍ରକାଶ ପାଇଥିଲା। ଅର୍ଥ ବ୍ୟବସ୍ଥାକୁ ସୁଧାରିବା ଲାଗି ରିଜର୍ଭ ବ୍ୟାଙ୍କ ପକ୍ଷରୁ ବିଭିନ୍ନ ପଦକ୍ଷେପ ହାତକୁ ନିଆଯାଇଛି। ଏହାବାଦ ସରକାର ଲୋକଙ୍କ ଲାଗି ୧.୭ ଲକ୍ଷ କୋଟିର ଏକ ପ୍ୟାକେଜ ଘୋଷଣା କରିଥିବା ବେଳେ ଆଉ ଏକ ପ୍ୟାକେଜ ଆଣିବାକୁ ପ୍ରସ୍ତୁତି କରୁଛନ୍ତି।
ମାନୁଫାକ୍ଚରିଂ ୟୁନିଟ୍ଗୁଡିକରୁ ଉତ୍ପାଦନ ହ୍ରାସ ହୋଇଥିବା ବେଳେ ୟୁନିଟ୍ଗୁଡିକୁ ନୂଆ ଅର୍ଡର ଆସିବା ଏବେ ବାଧାପ୍ରାପ୍ତ ହୋଇଛି। ଏଭଳି ସ୍ଥିତିରେ ଚାହିଦା ନ ଥିବାରୁ କମ୍ପାନୀଗୁଡିକରେ ଛଟେଇ ବଢ଼ିବା ନେଇ ରିପୋର୍ଟରେ ଆଶଙ୍କା କରାଯାଇଛି। ବଜାର ମାନ୍ଦାବସ୍ଥା ସହ ଲଢୁଥିବା ବେଳେ ଆଗାମୀ ଦିନରେ ସ୍ଥିତି ଆହୁରି ବିଗିଡ଼ିବ ବୋଲି ବିଶେଷଜ୍ଞ ମତ ପ୍ରକାଶ କରିଛନ୍ତି। ବଜାରର ସ୍ଥିତି ସୁଧୁରିବା ଲାଗି ଗୋଟିଏ ବର୍ଷରୁ ଅଧିକ ସମୟ ଲାଗିବ ବୋଲି ସିଆଇଆଇ ପକ୍ଷରୁ ହୋଇଥିବା ସର୍ଭେରେ କୁହାଯାଇଥିଲା।
