ନୂଆଦିଲ୍ଲୀ,୫।୫:ସୋମବାର ଦେଶର ପୁଞ୍ଜିବଜାର କାରବାର କ୍ଷତିଗ୍ରସ୍ତ ସ୍ଥିତିରେ ରହିଛି। ବମ୍ବେ ଷ୍ଟକ ଏକ୍ସଚେଞ୍ଜର ସେନ୍ସେକ୍ସ ୨୦୦୨ ପଏଣ୍ଟ ଖସିବା ଯୋଗୁ ନିବେଶକଙ୍କ ସମ୍ପତ୍ତିରେ ୫.୮୨ ଲକ୍ଷ କୋଟି ଟଙ୍କା ହ୍ରାସ ହୋଇଥିବା ଦେଖାଯାଇଛି। ସୂଚକାଙ୍କ ୨,୦୦୨. ୨୭ ପଏଣ୍ଟ ବା ୫.୯୪% ଖସିବା ଫଳରେ ୩୧,୭୧୫.୩୫ ପଏଣ୍ଟ ସ୍ତରରେ ବନ୍ଦ ହୋଇଛି। ଦିନ ମଧ୍ୟରେ ୩୧,୬୩୨.୦୨ ପଏଣ୍ଟ ସ୍ତରକୁ ଖସିଥିବା ନଜରକୁ ଆସିଥିଲା। ଆମେରିକା ଏବଂ ଚାଇନା ମଧ୍ୟରେ ପୁଣି ଥରେ ବାଣିଜ୍ୟ ଯୁଦ୍ଧ ଘନଉଥିବାରୁ ଏହାର ପ୍ରଭାବ ଭାରତୀୟ ଶେୟାର ବଜାର ଉପରେ ପଡ଼ିଛି। ଏଥିଯୋଗୁ ନିବେଶକଙ୍କ ମନୋଭାବରେ ପରିବର୍ତ୍ତନ ଦେଖାଯାଇଛି ବୋଲି ମୋତିଲାଲ ଓସସ୍ବାଲ ଫାଇନାନ୍ସିଆଲ ସର୍ଭିସେସ୍ ଲିମିଟେଡ୍ର ରିଟେଲ ରିସର୍ଚ୍ଚ ମୁଖ୍ୟ ସିଦ୍ଧାର୍ଥ ଖେମ୍କା ସୂଚନା ଦେଇଛନ୍ତି। କରୋନା ବ୍ୟାପିବା ପ୍ରସଙ୍ଗକୁ ବିଚାରକରି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ଚାଇନା ଉପରେ ବ୍ୟାପାର କଟକଣା ଲାଗୁ କରିବାକୁ ଯାଉଛି। ବିଶେଷକରି ଟାରିଫ ଉପରେ ଆମେରିକା ନୂଆ ଆଭିମୁଖ୍ୟ ଗ୍ରହଣ କରିବ ବୋଲି ଜଣାପଡିଛି।
ଏହାବାଦ ଘରୋଇ ବଜାର ସ୍ଥିତି ମଧ୍ୟ ଶେୟାର ବଜାରକୁ ପ୍ରଭାବିତ କରିଛି। କମ୍ପାନୀଙ୍କ ତ୍ରୈମାସିକ ଲାଭ ହ୍ରାସ, ଅଟୋ କମ୍ପାନୀଙ୍କ ବିକ୍ରି ଠପ୍, ଲକ୍ଡାଉନ ଆଉ ସପ୍ତାହ ବଢ଼ିବା ଏବଂ ମାନୁଫାକ୍ଚରିଂ କାର୍ଯ୍ୟକଳାପ କମିବା ଯୋଗୁ ଏହା ନିବେଶକଙ୍କ ଉପରେ ପ୍ରଭାବ ପକାଇଛି। ଆଇସିଆଇସିଆଇ ବ୍ୟାଙ୍କ, ବଜାଜ ଫାଇନାନ୍ସ, ଏଚ୍ଡିଏଫ୍ସି ଏବଂ ଇଣ୍ଡସଇଣ୍ଡ ବ୍ୟାଙ୍କର ଶେୟାର କାରବାର ଏହି ସମୟରେ ସବୁଠାରୁ କ୍ଷତିଗ୍ରସ୍ତ ହୋଇଛି। ବିଏସ୍ଇ ଇଣ୍ଡେକ୍ସରେ ଭାରତୀ ଏୟାରଟେଲ ଏବଂ ସନ୍ଫାର୍ମର କାରବାର କେବଳ ଉନ୍ନତ ରହିଛି। ଫାଇନାନ୍ସ, ବ୍ୟାଙ୍କ, ମେଟାଲ, କଞ୍ଜ୍ୟୁମର ଡ୍ୟୁରେବଲ, ରିୟଲିଟି ଏବଂ ଅଟୋ ସେକ୍ଟର ଶେୟାର ୮.୨୬% କମିଛି।
