ରାୟଗଡ଼ା ଜିଲାରେ ଖୋଲିଲା ଧାନମଣ୍ଡି
1:50 pmDecember 20, 2022 / 07

ରାୟଗଡ଼ା ଅଫିସ/ରାୟଗଡ଼ା (ସ୍ବ.ପ୍ର.),୨୦ା୧୨: ରାୟଗଡ଼ା ଜିଲା ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ମଣ୍ଡି ଖୋଲିଛି। ସ୍ଥାନୀୟ ଆର୍‌ଏମ୍‌ସି ବଜାର ପ୍ରାଙ୍ଗଣରେ ପୂଜାର୍ଚ୍ଚନା କରି ମଣ୍ଡିର ଶୁଭାରମ୍ଭ କରାଯାଇଛି। ଅତିରିକ୍ତ ଜିଲାପାଳ ଧର୍ମାନନ୍ଦ ବେହେରା ମୁଖ୍ୟ ଅତିଥି ଭାବେ ଯୋଗଦେଇ ଏହାର ଉଦ୍‌ଘାଟନ କରିଥିଲେ। ଜିଲାରେ ଖରିଫ୍‌ ଧାନ କ୍ରୟ ନିମନ୍ତେ ୨୦୨୩ ମାର୍ଚ୍ଚ ୩୧ ପର୍ଯ୍ୟନ୍ତ ଧାନ ମଣ୍ଡି ଚାଲିବା ନେଇ ଆରଏମ୍‌ସି ସମ୍ପାଦକ ବିପିନ୍‌ ସ୍ବାଇଁ ସୂଚନା ଦେଇଛନ୍ତି। ମଣ୍ଡିରେ ଧାନ ବିକ୍ରିର ଲାଭ ବିଷୟରେ ଅତିରିକ୍ତ ଜିଲାପାଳ ସୂଚନା ଦେଇଥିଲେ।
ମଣ୍ଡିରେ ଚାଷୀ ସୁବିଧାରେ ଧାନ ବିକ୍ରି କରିବା ସହ ୭୨ ଘଣ୍ଟା ମଧ୍ୟରେ କିପରି ବ୍ୟାଙ୍କ ଆକାଉଣ୍ଟରେ ନିଜର ଟଙ୍କା ପାଇବେ ସେଥିପ୍ରତି ଧ୍ୟାନ ଦେବାକୁ ଯୋଗାଣ ବିଭାଗ ଏବଂ ସମବାୟ ବିଭାଗକୁ ନିର୍ଦ୍ଦେଶ ଦେଇଥିଲେ ା ସେହିଭଳି ମଣ୍ଡିରେ ଚାଷୀ ବିଶ୍ରାମ ନେବା ପାଇଁ ବ୍ୟବସ୍ଥା କରିବା ସହ ଧାନ ସୁରକ୍ଷିତ ପାଇଁ ପଲିଥିନ୍‌ ବ୍ୟବସ୍ଥା କରିବା ପାଇଁ କହିଥିଲେ। ଚଳିତ ବର୍ଷ ୧୩ ଲାମ୍ପ୍‌ସ ଓ ଗୋଟିଏ ଏମ୍‌ପିସିଏସ୍‌ ଜରିଆରେ ଧାନ କିଣାଯିବ। ଜିଲାରେ ୨୦ ହଜାର ୪୮୨ ଚାଷୀ ଧାନ ବିକ୍ରି ପାଇଁ ପଞ୍ଜୀକରଣ କରିଛନ୍ତି। ପ୍ରଥମ ପର୍ଯ୍ୟାୟରେ ୮ ଲକ୍ଷ ୮୧ ହଜାର ୪ଶହ କୁଇଣ୍ଟାଲ ଟାର୍ଗେଟ ଯୋଗାଣ ବିଭାଗକୁ ଦିଆଯାଇଛି। ଧାନ ସଂଗ୍ରହକୁ ଲକ୍ଷ୍ୟ କରି ଦ୍ୱିତୀୟ ପର୍ଯ୍ୟାୟ ଧାନ କ୍ରୟ ନିମନ୍ତେ ଟାର୍ଗେଟ ଦିଆଯିବ ବୋଲି ସୂଚନା ମିଳିଛି। ଚଳିତ ଥର ୪୨ ସ୍ଥାନରେ ମଣ୍ଡି ବ୍ୟବସ୍ଥା କରାଯାଇଛି। ଉଦ୍‌ଘାଟନି କାର୍ଯ୍ୟକ୍ରମରେ ଉପଜିଲାପାଳ ଭୀମଶେନ ଶବର, ଜିଲା ଯୋଗାଣ ଅଧିକାରୀ ରାଜକିଶୋର ପାଣିଗ୍ରାହୀ, ଆର୍‌ଏମ୍‌ସି ସମ୍ପାଦକ ସ୍ବାଇଁ ପ୍ରମୁଖ ଉପସ୍ଥିତ ଥିଲେ। ସେହିଭଳି କଲ୍ୟାଣସିଂହପୁର ବ୍ଲକ ବୁଡ଼ାଗୁଡ଼ା ଗ୍ରାମର ଆର୍‌ଏମ୍‌ସି ବଜାର ପ୍ରାଙ୍ଗଣରେ ମଣ୍ଡି ଆରମ୍ଭ ହୋଇଛି। ସହକାରୀ ସମବାୟ ନିବନ୍ଧକ ଦୀପକ କୁମାର ବାରା ମୁଖ୍ୟ ଅତିଥି ଏବଂ ଲାମ୍ପ୍‌ସ ସଭାପତି ଶଙ୍କର ହୁଇକା ସମ୍ମାନିତ ଅତିଥି ରୂପେ ଯୋଗଦେଇ ମଣ୍ଡି ଉଦ୍‌ଘାଟନ କରିଥିଲେ। ତେବେ ସୋମବାର ପ୍ରଥମ ଦିନରେ ଜଣେ ମଧ୍ୟ ଚାଷୀ ଧାନ ବିକ୍ରି କରିପାରି ନାହାନ୍ତି। ଟୋକନ୍‌ ପାଇଥିଲେ ମଧ୍ୟ ଆର୍‌ଏମସିକୁ ଟାର୍ଗେଟ ମିଳି ନଥିବା ଯୋଗୁ ଚାଷୀ ଧାନ ବିକ୍ରି କରିପାରି ନ ଥିବା ଜଣାପଡ଼ିଛି।