ନୂଆଦିଲ୍ଲୀ,୨୫।୫: ଲୋକ ସଭା ନିର୍ବାଚନରେ କଂଗ୍ରେସର ବିଫଳତା ପରେ ରାଷ୍ଟ୍ରୀୟ ଅଧ୍ୟକ୍ଷ ରାହୁଲ ଗାନ୍ଧୀ ନୈତିକତା ଦୃଷ୍ଟିରୁ ଇସ୍ତଫା ଦେବେ ବୋଲି କୁହାଯାଉଥିଲା। ଶନିବାର କଂଗ୍ରେସ ଓ୍ବାର୍କିଂ କମିଟି ପକ୍ଷରୁ ଅନୁଷ୍ଠିତ ବିଚାର ବିମର୍ଷ ବୈଠକରେ ରାହୁଲ ଅଧ୍ୟକ୍ଷ ପଦରୁ ଇସ୍ତଫା ଦେବାକୁ ଚାହୁଁଥିବା ପ୍ରକାଶ କରିଥିଲେ। ତେବେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ ନିର୍ବାଚନରେ ହାର୍ ଜିତ୍ ସବୁବେଳେ ଲାଗି ରହିଥାଏ। ତେବେ ଏଥି ପାଇଁ ରାହୁଲଙ୍କର ଇସ୍ତଫା ଦେବାର ଆବଶ୍ୟକତା ନାହିଁ ବୋଲି ପରାମର୍ଶ ଦେଇଥିଲେ। ସେହିପରି ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀ ମଧ୍ୟ ରାହୁଲଙ୍କୁ ଇସ୍ତଫା ଦେବାର କୌଣସି କାରଣ ନ ଥିବା କହିଥିଲେ। କଂଗ୍ରେସ ମହାସଚିବ ଅବିନାଶ ପାଣ୍ଡେ କେବଳ ରାହୁଲ ହିଁ ଦଳକୁ ଉଚିତ୍ ମାର୍ଗରେ ପରିଚାଳିତ କରାଇ ପାରିବେ ବୋଲି ପ୍ରକାଶ କରିଥିଲେ। ରାହୁଲଙ୍କ ନେତୃତ୍ୱରେ କର୍ମୀମାନେ ସଂଘର୍ଷ କରିବାକୁ ସବୁବେଳେ ପ୍ରସ୍ତୁତ ବୋଲି ସେ କହିଥିଲେ।ଏହାପରେ ଇସ୍ତଫା ନାଟକର ଯବନିକା ପଡ଼ିଥିଲା। ଶେଷରେ ରାହୁଲ ମାନିଥିବା ଜଣାପଡ଼ିଛି। ବୈଠକରେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସମେତ ବରିଷ୍ଠ ଅଧିକାରୀମାନେ ଯୋଗଦେଇଥିଲେ।
