ମେଲବୋର୍ନ,୨୭।୧୨: ଏଠାରେ ଅଷ୍ଟ୍ରେଲିଆ ବିପକ୍ଷରେ ଚାଲିଥିବା ବକ୍ସିଂ ଡେ’ ଟେଷ୍ଟର ଦ୍ୱିତୀୟ ଦିନ ଭାରତୀୟ ଦଳର କାମଚଳା ଅଧିନାୟକ ଅଜିଙ୍କ୍ୟ ରାହାନେ ଧୈର୍ଯ୍ୟପୂର୍ଣ୍ଣ ଶତକ ହାସଲ କରିଛନ୍ତି। ତାଙ୍କ କ୍ୟାରିୟରର ଦ୍ୱାଦଶ ଶତକ ଯୋଗୁ ଦ୍ୱିତୀୟ ଟେଷ୍ଟକୁ ନିୟନ୍ତ୍ରଣକୁ ଆଣିପାରିଛି ଟିମ୍ ଇଣ୍ଡିଆ। ଅଧିନାୟକ ଭାବେ ଅଷ୍ଟ୍ରେଲିଆରେ ପଦାର୍ପଣ ମ୍ୟାଚ୍ରେ ଶତକ ହାସଲ କରିବାରେ ରାହାନେ ଦ୍ୱିତୀୟ ଭାରତୀୟ। ଏହାକୁ ପ୍ରଶଂସା କରିଛନ୍ତି ଭାରତୀୟ ଦଳର ନିୟମିତ ଅଧିନାୟକ ବିରାଟ କୋହଲି। ସେ ଟୁଇଟ୍ କରି ଲେଖିଛନ୍ତି, ଆମ ପାଇଁ ଆଉ ଏକ ଭଲ ଦିନ। ସର୍ବଶ୍ରେଷ୍ଠ ଟେଷ୍ଟ କ୍ରିକେଟ। ଅଜିଙ୍କ୍ୟଙ୍କ ଶ୍ରେଷ୍ଠ ଇନିଂସ। କୋହଲିଙ୍କ ବ୍ୟତୀତ ବୀରେନ୍ଦ୍ର ସେହ୍ବାଗ, ଯୁବରାଜ ସିଂଙ୍କଠାରୁ ଆରମ୍ଭ କରି ବହୁ ପୂର୍ବତନ କ୍ରିକେଟର ଏମ୍ସିଜିରେ ରାହାନେଙ୍କ ଶତକକୁ ପ୍ରଶଂସା କରିଛନ୍ତି।
ଉଲ୍ଲେଖଥାଉ କି, ଦ୍ୱିତୀୟ ଦିନ ଷ୍ଟମ୍ପ୍ସ ଅପସାରଣ ସୁଦ୍ଧା ଭାରତୀୟ ଦଳ ହାତରେ ୪ ଉଇକେଟ ରଖି ପ୍ରଥମ ଇନିଂସରେ ୮୨ ରନ୍ର ଅଗ୍ରଣୀ ହାସଲ କରିଛି। ରାହାନେ ୧୦୪ ଓ ରବୀନ୍ଦ୍ର ଜାଡେଜା ୪୦ ରନ୍ କରି ଅପରାଜିତ ଅଛନ୍ତି।
