ମୁମ୍ବାଇ: ବଲିଉଡ୍ ଅଭିନେତ୍ରୀ ଅନୁଷ୍କା ଶର୍ମା ଏବଂ ତାଙ୍କ କ୍ରିକେଟର ସ୍ବାମୀ ବିରାଟ କୋହଲି ବେଶ୍ ସୁନ୍ଦର ତଥା ଚର୍ଚ୍ଚିତ ଯୋଡ଼ି। କିଛି ନା କିଛି ଘଟଣାକୁ ନେଇ ଏହି ଦୁଇଜଣ ସବୁବେଳେ ଚର୍ଚ୍ଚାରେ ରହିଥାନ୍ତି। ଲକ୍ଡାଉନ୍ ସମୟରେ ବିରାଟ ଅନୁଷ୍କାଙ୍କ ବିଷୟରେ କିଛି କଥା କହି ସର୍ବଦା ଚର୍ଚ୍ଚାରେ ରହୁଛନ୍ତି। ଏବେ ଅନୁଷ୍କାଙ୍କ ବିଷୟରେ ବିରାଟ ଆଉ ଏକ ମଜାଳିଆ କଥା କହିଛନ୍ତି। ଏହା ମଧ୍ୟ କହିଛନ୍ତି, ଅନୁଷ୍କା ଏଥିପାଇଁ ତାଙ୍କ ସହ କଥା ମଧ୍ୟ ବନ୍ଦ କରିଦେଇଥଲେ।
ନିକଟରେ ବିରାଟ କୋହଲି ଫୁଟବଲ ତାରକା ସୁନୀଲ ଛେତ୍ରୀଙ୍କ ସହ ଲାଇଭ୍ ଚାଟ୍ କରିଥିଲେ। ଏହି ସମୟରେ ସେ ଅନୁଷ୍କାଙ୍କ ସହ ଜଡ଼ିତ ଅନେକ କଥା କହିଥିଲେ। ବିରାଟ ସୁନୀଲ ଛେତ୍ରୀଙ୍କୁ ତାଙ୍କ ଭୁଟାନ ଯାତ୍ରା ସହ ଜଡ଼ିତ ଏକ ମଜାଳିଆ କଥା କହିଛନ୍ତି ଏବଂ ଏହା ପରେ ଅନୁଷ୍କା ତାଙ୍କ ସହ କଥାବାର୍ତ୍ତା କରି ନ ଥିଲେ ବୋଲି କହିଛନ୍ତି। ଲାଇଭ୍ ଚାଟ୍ରେ ସୁନୀଲ ଛେତ୍ରୀ ବିରାଟଙ୍କୁ ପଚାରିଥିଲେ ଭୁଟାନରେ କ’ଣ ଘଟିଛି ଯେ ତୁମେ ତୁମ ସ୍ତ୍ରୀଙ୍କୁ ରାସ୍ତାରେ ଛାଡ଼ି ପଳାଇଥିଲ?
ସୁନୀଲଙ୍କ ଏହି ପ୍ରଶ୍ନର ଉତ୍ତରରେ ବିରାଟ କହିଛନ୍ତି, ଆମେ ବାଇକ୍ରେ ଭୁଟାନ୍ ଯାଇଥିଲୁ। ଏହି ସମୟରେ ସେଠାକୁ ବହୁ ଭାରତୀୟ ପର୍ଯ୍ୟଟକ ଆସିଥିଲେ। ଏହି ଭିଡ଼ ଭିତରେ କେହି ଜଣେ କହିଲେ ଇୟେ ତ ବିରାଟ କୋହଲି ପରି ଲାଗୁଛନ୍ତି। ଏହି ସମୟରେ ମୋ’ର ଧାରଣା ନ ଥିଲା ଯେ, ଅନୁଷ୍କା ମୋ’ ସହିତ ଅଛନ୍ତି ବୋଲି। ମଁୁ ତାଙ୍କୁ ଛାଡ଼ି ଖୁବ୍ ଜୋର୍ରେ ବାଇକ୍ ଚଳାଇ ବହୁ ଆଗକୁ ପଳାଇଥିଲି। ଏହା ପରେ ଯେତେବେଳେ ମୁଁ ଅନୁଷ୍କାଙ୍କ ପାଖରେ ପହଞ୍ଚିଲି ସେ ମୋ’ ସହିତ କଥାବାର୍ତ୍ତା କଲେ ନାହିଁ। ବିରାଟଙ୍କ ଏହି ଭିଡିଓ ସୋସିଆଲ ମିଡିଆରେ ଖୁବ୍ ତୀବ୍ର ବେଗରେ ଭାଇରାଲ ହେଉଛି। ୟୁଜରମାନେ ଏହି ଭିଡିଓଙ୍କୁ ବହୁମାତ୍ରାରେ ପସନ୍ଦ ମଧ୍ୟ କରିଛନ୍ତି।
