ନୂଆଦିଲ୍ଲୀ,୬।୧: ଜେଏନ୍ୟୁରେ ରବିବାର ରାତି ଅନ୍ଧାରରେ ହୋଇଥିବା ଗୁଣ୍ଡାଗିରିକୁ ଶାସକ-ବିରୋଧୀ ନିନ୍ଦା କରିଛନ୍ତି। ଏହାକୁ ନେଇ ଆରୋପ ପ୍ରତ୍ୟାରୋପ ରାଜନୀତି ଆରମ୍ଭ ହୋଇଛି। କେନ୍ଦ୍ରୀୟ ମନ୍ତ୍ରୀ ଗିରିରାଜ ସିଂ ଏହା ବାମପନ୍ଥୀ ଛାତ୍ରଙ୍କ କାଣ୍ଡ ବୋଲି କହିଛନ୍ତି। ଏହା ଯୋଗୁ ବିଶ୍ୱବିଦ୍ୟାଳୟ ପରିସରରେ ଗୁଣ୍ଡାରାଜ ଜାରି ରହିଥିବା ସେ କହିଛନ୍ତି। ସେହିପରି ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ଏବଂ ପ୍ରକାଶ ଜାଭେଡ୍କର ଏହା ବିଶ୍ୱବିଦ୍ୟାଳୟର ସଂସ୍କୃତି ଏବଂ ପରମ୍ପରାକୁ ଭଙ୍ଗ କରିଥିବା କହିଛନ୍ତି। ଏହି ଘଟଣାକୁ କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନ ନିନ୍ଦା କରିବା ସହିତ ଏଥି ପାଇଁ ଭାଜପାକୁ ଦାୟୀ କରିଛନ୍ତି। କଂଗ୍ରେସ ନେତା କପିଲ୍ ଶିବଲ୍ ଏହି ଘଟଣାର ନିନ୍ଦା କରି ଏହା ଏକ ଷଡ଼ଯନ୍ତ୍ର ବୋଲି କହିଛନ୍ତି। କିଭଳି ଦୁର୍ବୁତ୍ତ ବିଶ୍ୱବିଦ୍ୟାଳୟ ପରିସରରେ ପଶିଲେ, ଏବଂ ପୋଲିସ ବାହିନୀ କଣ କରୁଥିଲେ ବୋଲି ଶିବଲ୍ ସମାଲୋଚନା କରିଛନ୍ତି।
