ଏପରି ଏକ ସହର ରହିଛି ଯେଉଁଠାରେ ସୁନା ଭଳି ସୁନ୍ଦର ଅଳଙ୍କାରମାନ ମାଟିରେ ତିଆରି କରାଯାଉଛି। କଥାଟି ଶୁଣିଲେ ଆଶ୍ଚର୍ଯ୍ୟ ଲାଗୁଥିବ, ହେଲେ ସତ। କିଛି ଏଭଳି ଦୃଶ୍ୟ ଦେଖିବାକୁ ମିଳିଛି ରାଜସ୍ଥାନର ବିକାନେର ଜିଲାର ବିଶାଲା ଗାଁରେ। ଉକ୍ତ ଗଁାରେ ରହୁଥିବା ଏକ ପରିବାର ମାଟିରେ ଅଳଙ୍କାରମାନ ତିଆରି କରିଥାନ୍ତି। ଆଉ ଏହାକୁ ଦେଶର ବହୁ ସହରରେ ବିକ୍ରି କରି ନିଜର ପେଟ ପୋଷିଥାନ୍ତି। ଯେପରି ସୁନାରେ ତିଆରି ହୋଇଥିବା ଅଳଙ୍କାର ଜଣେ ନାରୀର ସୌନ୍ଦର୍ଯ୍ୟକୁ ବଢ଼ାଇଥାଏ। ସେହିପରି ମାଟିରେ ତିଆରି ହୋଇଥିବା ଅଳଙ୍କାର ସୌନ୍ଦର୍ଯ୍ୟକୁ ଆହୁରି ବଢ଼ାଇଦେଇଥାଏ। କିନ୍ତୁ ୨ଟି ଅଳଙ୍କାର ମଧ୍ୟରେ ପାର୍ଥକ୍ୟ ରହିଛି। ଯିଏ ସୁନା ଅଳଙ୍କାର କ୍ରୟ କରିବାକୁ ସକ୍ଷମ ନୁହେଁ ତାଙ୍କ ପାଇଁ ଏହି ମାଟିର ଅଳଙ୍କାର ବହୁ ମୂଲ୍ୟବାନ। ମାଟିରେ ତିଆରି ହୋଇଥିବା ସୁନ୍ଦର ଅଳଙ୍କାରକୁ ପରିଧାନ କରିବା ପରେ ଜଣେ ନାରୀର ସୌନ୍ଦର୍ଯ୍ୟ ଆହୁରି ବୃଦ୍ଧି ପାଇଥାଏ। ଏବେ ହାଇପ୍ରୋଫାଇଲ୍ ସୋସାଇଟିରେ ଏଭଳି ଅଳଙ୍କାରର ଟ୍ରେଣ୍ଡ ମଧ୍ୟ ରହିଛି।
ଏହି ପରିବାର ଗତ ୨୦ ବର୍ଷ ହେବ ମାଟିରେ ଅଳଙ୍କାରମାନ ତିଆରି କରିଆସୁଥିବା ବେଳେ ମାର୍କେଟରେ ଏହାର ବେଶ୍ ଚାହିଦା ରହିଛି। ମହିଳାଙ୍କ ପାଇଁ ବିଭିନ୍ନ ପ୍ରକାରର ଅଳଙ୍କାରମାନ ତିଆରି କରାଯାଇ ବହୁ ସହରରେ କମ୍ ମୂଲ୍ୟରେ ବିକ୍ରି କରାଯାଇଥାଏ। ତେବେ ସୁନାର ଅଳଙ୍କାରକୁ ମାଟିର ଅଳଙ୍କାର ସହ ତୁଳନା କରିବା ଆଦୌ ଉଚିତ ନୁହେଁ। ହେଲେ ଯେଉଁ ବ୍ୟକ୍ତି ନିଜ ପେଟପାଟଣା ପାଇଁ ଏଭଳି ଅଳଙ୍କାର ତିଆରି କରୁଛନ୍ତି ତାଙ୍କ ପାଇଁ ଏହା ସୁନାଠାରୁ କିଛି କମ୍ ନୁହେଁ ।
