ଜଳେଶ୍ୱର, ୧।୨(ସ୍ବ.ପ୍ର.)-ବାଲେଶ୍ୱର ଜିଲା ଜଳେଶ୍ୱର ବ୍ଲକ ରାଇବଣିଆ ଥାନା ଅଧୀନ ଶ୍ୟାମନଗର, କାଳିକ, ସର୍ଦ୍ଦାରବନ୍ଧ, କଳମା, ଖୁଆଡ଼ ପଞ୍ଚାୟତର ବିଭିନ୍ନ ଗ୍ରାମରେ ଗତ ୭ଦିନ ଧରି ହାତୀପଲ ଉପଦ୍ରବ ଚଳାଇଛନ୍ତି। ଅଦ୍ୟାବଧି ରଂଞ୍ଝା, ରଘୁନାଥପୁର, ଗୋରୁଡ଼ବାସୀ, ଘଡ଼ଘଡ଼ା, ସରାଳିବସା, ଧାନଘେରା, ଫୁଲଝରୀ, ଘାସିପଦା, କଣ୍ଡରାଡିହା, ସୁଖଯୋଡି, ରଙ୍ଗାମାଟିଆ, ଉପରତୋଟା, ଦୁଧିଆଶୋଳ, ବାଗବୁଡ଼ା, ଭୋଳଛକ ଆଦି ଗ୍ରାମରେ ହାତୀପଲ ଘରଗୁଡ଼ିକୁ ଭାଙ୍ଗିପକାଇଛନ୍ତି। ଫଳରେ ଲୋକମାନେ ଦୁର୍ଦ୍ଦିନରେ ବାସ କରୁଛନ୍ତି। ହାତୀପଲ ଗୁରୁବାର ରାତିରେ ଶ୍ୟାମନଗର ପଞ୍ଚାୟତରେ ୨୭ଟି ଘର ଭାଙ୍ଗି ଦେଇଛନ୍ତି। ସେହିପରି ପୂର୍ବରୁ କାଳିକ ପଞ୍ଚାୟତର ୨୪ଟି ଘର ଭାଙ୍ଗିଥିବା ବନବିଭାଗ ପକ୍ଷରୁ ସୂଚନା ମିଳିଛି। ଅଳ୍ପ ସଂଖ୍ୟକ ବନକର୍ମଚାରୀ ଓ ହାତୀ ସୁରକ୍ଷା ବାହିନୀ ହାତୀ ଘଉଡାଇବା କାର୍ଯ୍ୟରେ ଲିପ୍ତ ଥିବାରୁ ଏହା ଫଳପ୍ରଦ ହୋଇପାରୁନାହିଁ। ଅନ୍ୟପକ୍ଷରେ ଲଗାତାର ବିଦ୍ୟୁତକାଟ୍ ଫଳରେ ରବି ଚାଷ କାର୍ଯ୍ୟ ବିଳମ୍ବ ହେବା ସହ ଅଞ୍ଚଳ ଅନ୍ଧାରରେ ଥିବାରୁ ହାତୀପଲ ଗାଁ ଭିତରେ ପ୍ରବେଶ କରି ନଷ୍ଟ କରୁଥିବା ଅଭିଯୋଗ ହୋଇଛି। ଅଞ୍ଚଳବାସୀମାନେ ମଞ୍ଚାରେ ରାତ୍ରିଯାପନ କରୁଛନ୍ତି। ପ୍ରଶାସନ ପକ୍ଷରୁ ଉପଜିଲାପାଳ ନିଲୁ ମହାପାତ୍ର, ଏସିଏଫ୍ଓ ତପନ ପରିଡ଼ା, ତହସିଲଦାର କ୍ଷୀରୋଦ କୁମାର ପଣ୍ଡା, ନେସ୍କୋ ନିର୍ବାହୀ ଯନ୍ତ୍ରୀ ହରିଶ୍ଚନ୍ଦ୍ର ପଣ୍ଡା ପ୍ରମୁଖ ଶୁକ୍ରବାର ଉକ୍ତ ଗ୍ରାମଗୁଡିକୁ ଯାଇ ପରିସ୍ଥିତି ଅନୁଧ୍ୟାନ କରିବା ସହ କ୍ଷତିଗ୍ରସ୍ତମାନଙ୍କୁ ପଲିଥିନ୍ ବଣ୍ଟନ କରିଛନ୍ତି। ସ୍ଥାନୀୟ ସରପଞ୍ଚ ସସ୍ମିତା ପାତ୍ର, ସମିତିସଦସ୍ୟ ଲଛମନ ପାତ୍ର, ଚନ୍ଦନ ପାତ୍ର, ସୁରେଶ ମହନ୍ତ, ଗିରିଜା ଶାସମଲ, ସତ୍ୟ ଶାସମଲ, କାଳୀକ ସରପଞ୍ଚ ବିଜୟ ବେହେରା, ଓଲମରା ସମିତି ସଦସ୍ୟ ଉଦୟନାଥ ମୁର୍ମୁ ପ୍ରମୁଖ ପ୍ରମୁଖ ଉପସ୍ଥିତ ଥିଲେ। ମାତ୍ର ଏକ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରି ରନ୍ଧାଖାଦ୍ୟ ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି। ହାତୀଦାଉରୁ ରକ୍ଷା ପାଇବାପାଇଁ ଲୋକେ ଗ୍ରାମଦେବତୀଙ୍କ ନିକଟରେ ସମୂହ ଜାହିରା ପୂଜାର୍ଚ୍ଚନା କରୁଥିବା ଦେଖିବାକୁ ମିଳିଛି।
ଏ ସମ୍ପର୍କରେ ନେସ୍କୋର ଏଜିଏମ୍ ବ୍ରଜସୁନ୍ଦର ପରିଡ଼ାଙ୍କୁ ପଚାରିବାରୁ ଆଜିଠାରୁ ବିଦ୍ୟୁତ୍ ସ୍ବାଭାବିକ ହେବ ବୋଲି କହିଛନ୍ତି। ଜିଲା ବନ ଅଧିକାରୀ ବିଶ୍ୱରାଜ ପଣ୍ଡାଙ୍କ କହିବାନୁସାରେ ହାତୀଙ୍କୁ ଘଉଡ଼ାଇବା ପାଇଁ ଅଧିକ କର୍ମଚାରୀ ନିୟୋଜିତ ସହ କ୍ଷୟକ୍ଷତି ହୋଇଥିବା ଲୋକଙ୍କ ପାଇଁ ସହାୟତା ଯୋଗାଇ ଦିଆଯିବ ବୋଲି କହିଛନ୍ତି।
