ପୁରୀ ଅଫିସ,୨୫।୬: ଶ୍ରୀନଅର ସମ୍ମୁଖ ରଥଖଳାରେ ଚାଲିଛି ରଥକାମ। ରଥଖଳାରେ ପ୍ରଥମ ପର୍ଯ୍ୟାୟ ଭୂଇଁ ଖଞ୍ଜା ସରିବା ପରେ ରଥରେ ଛ’କାଠ ଉଠିଥିଲା। ଏବେ ଦ୍ୱିତୀୟ ଭୂଇଁ ଖଞ୍ଜା କାମ ଚାଲିଛି। ସୋମବାର ସୁଦ୍ଧା ତିନିରଥର ୩୬ ନାହାକ କାଠ ଚଉପଟ ସରିଛି। ବଳକା ୬ କାଠକୁ ମହାରଣାମାନେ ଚଉପଟ କରୁଛନ୍ତି। ଅନ୍ୟପଟେ ସୋମବାରଠାରୁ ରଥରେ ରଙ୍ଗ କାମ ଆରମ୍ଭ ହୋଇଛି। ଶ୍ରୀମନ୍ଦିର କାର୍ଯ୍ୟାଳୟରେ ଚିତ୍ରକାର ସେବକମାନେ ରଥ ପାର୍ଶ୍ୱ ଦେବଦେବୀଙ୍କ ମୂର୍ତ୍ତିରେ ରଙ୍ଗ ଦେବାରେ ବ୍ୟସ୍ତ ରହିଛନ୍ତି। ଭୋଇ ସର୍ଦ୍ଦାର ରବି ଭୋଇ କହିଛନ୍ତି, ମହାପ୍ରଭୁଙ୍କ ଚକା ବିଜେ ଲାଗି ନଡ଼ିଆ କାଠ ହଣା ଚାଲିଛି। ଚାରି ନାହାକକୁ ଧରି ରଖିବା ପାଇଁ ଚାରିପଟେ ଖିଅ ବାଡ଼ିିଆ କରାଯାଇଛି। ତାଳଧ୍ୱଜ ରଥର ରୂପକାର ପଞ୍ଚାନନ ମହାପାତ୍ର କହିଛନ୍ତି, ପଟାଗୁଜ ଖୋଦେଇ କାମ ଶେଷ ପର୍ଯ୍ୟାୟରେ ପହଞ୍ଚତ୍ଛି। ପଟାଗୁଜରେ ନରବିରାଳ, ସିଂହବିରାଳ ଓ ଗଜବିରାଳ ଖୋଦେଇ କରାଯାଉଛି। ୩୨ଟି ପଟାଗୁଜ କାମ ସରିଛି। ସେହିପରି ସିଂହାସନ ଓ ନାଟଗୋଡ଼ କାମ ଚାଲିଛି। ନାଟଗୋଡ଼ରେ ଏକ ଅସୁରର ଚିତ୍ର ଏବଂ ସିଂହାସନରେ ଗଛ, ଡାଳି, ପଦ୍ମପାଖୁଡା ଖୋଦେଇ କରାଯାଏ। ପ୍ରଥମ ପର୍ଯ୍ୟାୟରେ ତିନି ରଥର କଣଗୁଜରେ ରଙ୍ଗ ଦିଆଯାଉଛି। ଅନ୍ୟପଟେ ଦୋଳବେଦି କମାରଶାଳରେ କମାର ସେବକମାନେ ଲୁହାକଣ୍ଟା ତିଆରିରେ ବ୍ୟସ୍ତ ରହିଛନ୍ତି।
