କଟକ ଅଫିସ,୨୯ା୧୨-ଚଳିତ ରଣଜୀ ଟ୍ରଫିରେ ଓଡ଼ିଶା ଦଳର ବିଜୟ ଧାରା ଅବ୍ୟାହତ ରହିଛି। ଡ୍ରିମ୍ସ ଗ୍ରାଉଣ୍ଡରେ ଚାଲିଥିବା ଓଡ଼ିଶା-ଉତ୍ତରାଖଣ୍ଡ ବିପକ୍ଷ ମ୍ୟାଚ୍କୁ ଶନିବାର ୧୦ ଉଇକେଟରେ ଜିତିଛି ଓଡ଼ିଶା। ଏଥିସହିତ ଚଳିତ ଟୁର୍ନାମେଣ୍ଟରେ ଲଗାତର ୩ୟ ବିଜୟ ହାସଲ କରିଛି। ପେସ୍ ବୋଲିଂକୁ ସୁହାଉଥିବା ଡ୍ରିମ୍ସର ଏହି ପିଚ୍ରେ ଶତକୀୟ ଇନିଂସ ଖେଳିଥିବା ଓଡ଼ିଶା ଓପନର ଶାନ୍ତନୁ ମିଶ୍ର ମ୍ୟାନ୍ ଅଫ୍ ଦି ମ୍ୟାଚ୍ ହୋଇଛନ୍ତି। ଅନ୍ୟପକ୍ଷରେ ୩ଟି ମ୍ୟାଚ୍ରୁ ୨୧ ପଏଣ୍ଟ ହାସଲ କରି ଓଡ଼ିଶା ଏଲିଟ୍ ଗ୍ରୁପ-ସି ପଏଣ୍ଟ ଟେବୁଲର ଶୀର୍ଷ ସ୍ଥାନରେ ରହିଛି।
ଉତ୍ତରାଖଣ୍ଡର ପ୍ରଥମ ଇନିଂସ ୧୧୭ ରନ ଜବାବରେ ଓଡ଼ିଶା ସମସ୍ତ ଉଇକେଟ ହରାଇ ୨୫୩ରନ କରିଥିଲା। ପ୍ରଥମ ଇନିଂସରେ ୧୩୬ରନ ଅଗ୍ରଣୀ ନେଇଥିଲା ଓଡ଼ିଶା। ଶୁକ୍ରବାର ତଥା ମ୍ୟାଚ୍ର ୩ୟ ଦିବସ ଷ୍ଟମ୍ପ ଅପସାରଣ ସୁଦ୍ଧା ଉତ୍ତରାଖଣ୍ଡ ଦ୍ୱିତୀୟ ଇନିଂସ ବ୍ୟାଟିଂ କରି ୪ ଉଇକେଟ ବିନିମୟରେ ୫୪ରନ କରିଥିଲା। ଦୀକ୍ଷାଂଶୁ ନେଗି ୨୩ ରନରେ ଓ କର୍ନ କୌଶଲ ୦ରେ ଅପରାଜିତ ଥିଲେ। ଶନିବାର ଅନ୍ତିମ ଦିବସରେ କର୍ନ ୧୨ରନ କରି ପ୍ରଥମ ବ୍ୟାଟ୍ସମ୍ୟାନ ଭାବେ ଆଉଟ ହୋଇଥିଲେ। ତାଙ୍କୁ ବସନ୍ତ ମହାନ୍ତି ବୋଲ୍ଡ କରି ଓଡ଼ିଶା ନିମନ୍ତେ ୫ମ ସଫଳତା ଦେବା ସହ ବିଜୟ ଆଶାକୁ ମଜଭୁତ କରିଥିଲେ। ପରେ ନେଗି ୪୦ରନରେ ସୂର୍ଯ୍ୟକାନ୍ତ ପ୍ରଧାନଙ୍କ ଶିକାର ହୋଇଥିଲେ। ୯୪ ରନରେ ଉତ୍ତରାଖଣ୍ଡ ୬ଟି ଉଇକେଟ ହରାଇଥିଲା। ବ୍ୟାଟିଂ କ୍ରମ ୮ନଂରେ କ୍ରିଜକୁ ଆସିଥିବା ଧନରାଜ ଶର୍ମା ଧୂଆଁଧାର ବ୍ୟାଟିଂ କରୁଥିବା ଦେଖିବାକୁ ମିଳିଥିଲା। ଧନରାଜ ୩୩ଟି ବଲରୁ ୪ଟି ଲେଖାଏ ଚୌକା ଓ ଛକା ବଳରେ ୫୦ରନ ପୂରଣ କରିଥିଲେ। ଅନ୍ୟପକ୍ଷରେ ଓଡ଼ିଶା ବୋଲରମାନେ ଅପର ପାର୍ଶ୍ୱରୁ ଉଇକେଟ ଦଖଲ ଜାରି ରଖିଥିଲେ। ରାହିଲ ଶାହା ୧୧ରନରେ ଓ ସନ୍ନି ରାଣା ଖାତା ଖୋଲିବା ପୂର୍ବରୁ ସୂର୍ଯ୍ୟକାନ୍ତଙ୍କ ଦ୍ୱାରା ଆଉଟ ହୋଇଥିଲେ। ଅର୍ଦ୍ଧଶତକ ହାସଲ କରିବାର ପରବର୍ତ୍ତୀ ବଲରେ ସୂର୍ଯ୍ୟକାନ୍ତଙ୍କ ୫ମ ଶିକାର ହୋଇଥିଲେ ଧନରାଜ। ଗୋଟିଏ ମ୍ୟାଚ୍ରେ ୫ଟି ଉଇକେଟ ଦଖଲ କରିବା କ୍ଷେତ୍ରରେ ସୂର୍ଯ୍ୟକାନ୍ତଙ୍କ ଏହା ୫ମ ସଫଳତା। ଅନ୍ତିମ ଉଇକେଟ ଭାଗୀଦାରିରେ ଉତ୍ତରାଖଣ୍ଡ ୩୯ରନ ସଂଗ୍ରହ କରିଥିଲା। ପ୍ରଦୀପ ଚାମୋଲି ଓ ଆକାଶ ମାଣ୍ଡୱାଲ ଏହି ଭାଗୀଦାରି ସୃଷ୍ଟି କରିଥିଲେ। ମାଣ୍ଡୱାଲଙ୍କୁ ୨୦ରନରେ ବୋଲ୍ଡ କରି ଦେବବ୍ରତ ଓଡ଼ିଶା ପାଇଁ ବିଜୟ ଆଶା ନିକଟତର କରିଦେଇଥିଲେ। ପ୍ରଦୀପ ୨୫ରନରେ ଅପରାଜିତ ଥିଲେ। ଓଡ଼ିଶା ପକ୍ଷରୁ ସୂର୍ଯ୍ୟକାନ୍ତ ସର୍ବାଧିକ ୫ଟି, ବସନ୍ତ ମହାନ୍ତି ୩ଟି, ରାଜେଶ ମହାନ୍ତି ଓ ଦେବବ୍ରତ ଗୋଟିଏ ଲେଖାଏ ଉଇକେଟ ଅକ୍ତିଆର କରିଛନ୍ତି। ଦ୍ୱିତୀୟ ଇନିଂସରେ ଉତ୍ତରାଖଣ୍ଡ ୧୯୫ରନ ସଂଗ୍ରହ କରିବା ଯୋଗୁ ଓଡ଼ିଶା ସମ୍ମୁଖରେ ୬୦ରନର ବିଜୟ ଲକ୍ଷ୍ୟ ଧାର୍ଯ୍ୟ ହୋଇଥିଲା। ଦେବାଶିଷ ସାମନ୍ତରାୟ ଓ ଶାନ୍ତନୁ ଓପନିଂ କରିବାକୁ ଆସିଥିଲେ। ମୁଣ୍ଡରେ ବଲ ବାଜିବା ଯୋଗୁ ଦେବାଶିଷ ୭ରନରେ ରିଟାୟର୍ଡ ହଟ୍ ହୋଇଥିଲେ। ଦେବାଶିଷଙ୍କ ସ୍ବାସ୍ଥ୍ୟାବସ୍ଥା ଭଲ ଅଛି ବୋଲି ଫିଜିଓ ଶୁଭକାନ୍ତ ସାହୁ ସୂଚନା ଦେଇଛନ୍ତି। ଶାନ୍ତନୁ ଅପରାଜିତ ୨୯ରନ ଓ ଗୋବିନ୍ଦ ପୋଦ୍ଦାର ଅପରାଜିତ ୨୬ ରନ କରି ଓଡ଼ିଶାକୁ ବିଜୟୀ କରାଇଥିଲେ।
