ବହଳଦା,୨୯ା୬(ଡି.ଏନ.ଏ)- ମୟୂରଭଞ୍ଜ ଜିଲା ବହଳଦା ଥାନା ପୋଲିସ ଏକ ହତ୍ୟା ଘଟଣାର ପର୍ଦ୍ଦାଫାସ କରି ଜଣେ ମହିଳାଙ୍କ ସମେତ ୫ ଜଣଙ୍କୁ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଛି। ଗତ ମେ ୨୩ ତାରିଖ ଦିନ ବହଳଦା ଥାନା ଅନ୍ତର୍ଗତ ଅସନା ପଞ୍ଚାୟତର ଜିଆଲଦା ଓ ଏଦଲବେଡା ଗ୍ରାମ ମଧ୍ୟସ୍ଥଳରୁ ଜଣେ ଯୁବକଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର କରାଯାଇଥିଲା। ମୃତ ଯୁବକ ଜଣକ ରାଇରଙ୍ଗପୁର ଥାନା ଅନ୍ତର୍ଗତ ଅସନବଣି ଗ୍ରାମର ପିଥ ମୁର୍ମୁ (୩୦) ବୋଲି ଜଣା ପଡିଥିଲା। ମୃତକଙ୍କ ବାପା ଏନେଇ ଥାନାରେ ଅଭିଯୋଗ କରିବା ପରେ ପୋଲିସ ମାମଲା(ନଂ.୩୪/୧୯) ରୁଜୁ କରି ଘଟଣାର ତନାଘନା ଚଳାଇଥିଲା। ଗିରଫ ଅଭିଯୁକ୍ତମାନେ ହେଲେ ଚାନ୍ଦୁ ମୁର୍ମୁ, ରାମଦାସ ମୁର୍ମୁ, ଜଗନ୍ନାଥ ଲୋହାର ଓ ପୁନା ମୁର୍ମୁ ।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ମୃତ ପିଥ ମୁର୍ମୁ ଓ ରାଇରଙ୍ଗପୁର ଥାନା ଅନ୍ତର୍ଗତ ଦେଉଳି ଗ୍ରାମର ଛୋଟରାୟ ମାରାଣ୍ଡି ରାଜସ୍ଥାନର ଏକ କମ୍ପାନୀରେ କାମ କରୁଥିଲେ। ପିଥ ଛୁଟିରେ ଘରକୁ ଆସିଲେ ଛୋଟରାୟଙ୍କ ଘରକୁ ଯିବା ଆସିବା କରୁଥିଲେ। ଏହା ମଧ୍ୟରେ ଛୋଟରାୟଙ୍କ ପତ୍ନୀଙ୍କୁ ପିଥ ପରକିୟା ସମ୍ପର୍କ କହି ବିଭିନ୍ନ ସମୟରେ ବ୍ଲାକମେଲିଂ କରୁଥିଲେ। ଏଥିରେ ଅତିଷ୍ଠ ହୋଇ ଛୋଟରାୟଙ୍କ ପତ୍ନୀ ରାଇରଙ୍ଗପୁର ଓ ବହଳଦା ଅଞ୍ଚଳର ଚାନ୍ଦୁ ମୁର୍ମୁ, ରାମଦାସ ମୁର୍ମୁ, ଜଗନ୍ନାଥ ଲୋହାର ଓ ପୁନା ମୁର୍ମୁଙ୍କୁ ଅର୍ଥ ଦେଇ ପିଥଙ୍କୁ ମାରିଦେବା ପାଇଁ ଯୋଜନା କରିଥିଲେ। ଯୋଜନା ମୁତାବକ ଗତ ମେ ୨୨ ତାରିଖରେ ଫୋନ କରି ପିଥଙ୍କୁ ଡାକି ଅଣାଯାଇଥିଲା। ସେ ଆସି ପହଞ୍ଚିବା ପରେ ମହିଳା ଓ ପିଥ ବସ ଯୋଗେ ଆସି କୁମ୍ଭାରମୁଣ୍ଡା ଛକରେ ଓହ୍ଲାଇଥିଲେ। ସେଠାରୁ ଏଦଲବେଡା ଯାଉଥିବା ବେଳେ ଦୁଇଟି ବାଇକରେ ୪ ଯୁବକ ଆସି ପିଥଙ୍କ ମୁଣ୍ଡକୁ ଏକ ଲୁହାରଡରେ ଆକ୍ରମଣ କରିଥିଲେ। ଘଟଣାସ୍ଥଳରେ ପିଥଙ୍କ ମୃତ୍ୟୁ ଘଟିବାରୁ ସେମାନେ ତାଙ୍କ ମୃତଦେହରେ ପେଟ୍ରୋଲ ଢାଲି ନିଆଁ ଲଗାଇ ଦେଇଥିଲେ। ପୋଲିସ ଅଭିଯୁକ୍ତମାନଙ୍କଠାରୁ ୨ଟି ବାଇକ, ୬ଟି ମୋବାଇଲ ଓ ୯ ହଜାର ଟଙ୍କା ସମେତ ହତ୍ୟାରେ ବ୍ୟବହୃତ ଲୁହାରଡ ଜବତ କରିଛି। ଶୁକ୍ରବାର ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି।
