ଢେଙ୍କାନାଳ ଅଫିସ, ୧୦।୬ – ରାଜ୍ୟର ପର୍ଯ୍ୟଟନ ଶିଳ୍ପକୁ ପ୍ରୋତ୍ସାହିତ କରିବାକୁ ସରକାରଙ୍କ ପକ୍ଷରୁ ଆରମ୍ଭ ହୋଇଥିଲା ‘ଯାଯାବର’। ଏହାର ଉଦ୍ଦେଶ୍ୟ ଥିଲା ଏକ ବର୍ଣ୍ଣାଢ଼୍ୟ ପରିବେଶରେ ପର୍ଯ୍ୟଟକ ଏବଂ ଯାତ୍ରୀଙ୍କ ସାମୟିକ ରହଣି ବ୍ୟବସ୍ଥା ସହ ସର୍ବୋତ୍ତମ ଆତିଥ୍ୟ ପ୍ରଦାନ କରିବା। ଏହାଦ୍ୱାରା ଅତିଥି ପର୍ଯ୍ୟଟକମାନେ କ୍ଲାନ୍ତି ଦୂର କରିପାରିବେ ଏବଂ ପର୍ଯ୍ୟଟନସ୍ଥଳୀରେ ଅଧିକ ସମୟ ବିତାଇବାକୁ ସୁଯୋଗ ପାଇବେ। ତେବେ ପରିଚାଳନାଗତ ତ୍ରୁଟି ଏବଂ ପର୍ଯ୍ୟଟନ ବିଭାଗର ଆଗ୍ରହର ଅଭାବ ଯୋଗୁ ଢେଙ୍କାନାଳରେ ଆରମ୍ଭ ହୋଇଥିବା ଏହି ପ୍ରକଳ୍ପର ଭବିଷ୍ୟତ ଅନିଶ୍ଚିତତାକୁ ଠେଲି ହୋଇଯାଇଛି। ଏହାକୁ ଦେଖି ପର୍ଯ୍ୟଟକମାନେ କହିବା ଆରମ୍ଭ କଲେଣି ‘ଯାଯାବର’ ଏବେ ହତାଦରର ଶିକାର ହୋଇଛି।
ରାଜ୍ୟ ପର୍ଯ୍ୟଟନ ମାନଚିତ୍ରରେ ସ୍ବତନ୍ତ୍ର ସ୍ଥାନ ହାସଲ କରିଛି ଢେଙ୍କାନାଳ। ଏଠାରେ ବର୍ଷତମାମ ହଜାର ହଜାର ପର୍ଯ୍ୟଟକଙ୍କ ସମାଗମ ହୋଇଥାଏ। ଜିଲାର ପର୍ଯ୍ୟଟନ କ୍ଷେତ୍ରର ବିକାଶ ଏବଂ ଏଥିରୁ ରାଜସ୍ବ ଆଦାୟ କରିବା ଲକ୍ଷ୍ୟରେ ସଦର ବ୍ଲକ ଗୋବିନ୍ଦପୁର ନିକଟ ୫୫ନଂ. ଜାତୀୟ ରାଜପଥ ପାର୍ଶ୍ୱରେ ୨୦୧୮ରେ ପର୍ଯ୍ୟଟନ ବିଭାଗ ପକ୍ଷରୁ ଆରମ୍ଭ ହୋଇଥିଲା ଯାଯାବର ପ୍ରକଳ୍ପ। ୧ ଏକର ୨୦ ଡେସିମିଲ ଜାଗାରେ ପରିକଳ୍ପିତ ଏହି ପ୍ରକଳ୍ପ ଲାଗି ଦେଢ଼ କୋଟି ଟଙ୍କା ଖର୍ଚ୍ଚ କରିବାକୁ ଅଟକଳ କରାଯାଇଥିଲା। ୨୦୨୦ ସୁଦ୍ଧା ଏହା ଶେଷ ହୋଇ କାର୍ଯ୍ୟକ୍ଷମ ହେବାକୁ ଲକ୍ଷ୍ୟ ରଖାଯାଇଥିଲା। ଜାତୀୟ ରାଜପଥ ଦେଇ ଯାତାୟତ କରୁଥିବା ଯାତ୍ରୀ, ପର୍ଯ୍ୟଟକମାନେ ‘ଯାଯାବର’ରେ ବିଶ୍ରାମ ନେବା ଏବଂ ସେମାନଙ୍କୁ ହାତପାଆନ୍ତାରେ ଜଳଖିଆ, ପାନୀୟ, ଚା, କଫି ଯୋଗାଇ ଦେବା ଉଦ୍ଦେଶ୍ୟରେ ପ୍ରକଳ୍ପ ନିର୍ମାଣ ଆରମ୍ଭ ହୋଇଥିଲା। ହେଲେ ସମୟ ଅବଧି ମଧ୍ୟରେ କେବଳ ବିଶ୍ରାମ ଲାଗି ଉଦ୍ଦିଷ୍ଟ ଘର ନିର୍ମାଣ ସରିଛି। କରୋନା ଲକ୍ଡାଉନ୍ ଯୋଗୁ ନିର୍ମାଣ କାର୍ଯ୍ୟ ବନ୍ଦ ରହିଥିଲା। କଟକଣା କୋହଳ ପରେ ବି କାମ ଆଉ ଆଗଉନି କି କାହାର ଦେଖା ମିଳୁନି। ଫଳରେ ଆନୁଷଙ୍ଗିକ ଭିତ୍ତିଭୂମି ବିକାଶ କାର୍ଯ୍ୟ ଅଟକି ଯାଇଛି। କରୋନା ସଙ୍କଟ ମଧ୍ୟରେ ପ୍ରକଳ୍ପ କାର୍ଯ୍ୟ କେବେ ସରିବ ଏବଂ ଏହା କିଭଳି କାର୍ଯ୍ୟକ୍ଷମ ହେବ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ଏ ସଂକ୍ରାନ୍ତରେ ଢେଙ୍କାନାଳ ଦାୟିତ୍ୱରେ ଥିବା ଅନୁଗୋଳ ଜିଲା ପର୍ଯ୍ୟଟନ ଅଧିକାରୀ ଜଗଦୀଶ ରାୟ କୁହନ୍ତି, ଯାଯାବର ପ୍ରକଳ୍ପକୁ ପିପିପି ମୋଡ୍ରେ ଚଳାଇବା ଲାଗ ନିଷ୍ପତ୍ତି ନିଆଯାଇଛି। ସେ କିଛିଦିନ ତଳେ ପ୍ରକଳ୍ପ କାର୍ଯ୍ୟସ୍ଥଳ ପରିଦର୍ଶନ କରିଥିଲେ। ଏବେ ସୁଦ୍ଧା ଏ ସଂକ୍ରାନ୍ତରେ କୌଣସି ବିଜ୍ଞାପନ କିମ୍ବା ନିର୍ଦ୍ଦେଶନାମା ଜାରି ହୋଇ ନ ଥିବା ସେ ସୂଚନା ଦେଇଛନ୍ତି।
