ତେଲକୋଇ, ୨୫।୪(ଡି.ଏନ.ଏ.)-ତେଲକୋଇ ବ୍ଲକ ଅନ୍ତର୍ଗତ ଉପାନ୍ତ ଅଞ୍ଚଳ କାଳିଆହତା ପଞ୍ଚାୟତରେ ରହିଛି ରଙ୍ଗମାଟିଆ ବସ୍ତି । ଏହି ବସ୍ତିରେ ୩୦ରୁ ଊର୍ଦ୍ଧ୍ୱ ପରିବାର ବସବାସ କରନ୍ତି । ତେବେ ପ୍ରଶାସନର ଅଣଦେଖା ଓ ପଞ୍ଚାୟତ ପ୍ରତିନିଧିଙ୍କ ଅବହେଳା ଯୋଗୁଁ ମୈାଳିକ ସୁବିଧାରୁ ବଞ୍ଚିତ ହୋଇଛନ୍ତି ଏହି ବସ୍ତି ବାସିନ୍ଦା । ଗାଁ କୁ ରାସ୍ତା ନ ଥିବା ବେଳେ ଶିକ୍ଷା ସ୍ବାସ୍ଥ୍ୟ, ପାନୀୟଜଳ ଏହି ଗ୍ରାମବାସୀଙ୍କ ପାଇଁ ସ୍ବପ୍ନ ହୋଇ ରହିଛି । ଏହି ଗ୍ରାମରେ ଶହେରୁ ଊର୍ଦ୍ଧ୍ୱ ଲୋକେ ବସବାସ କରନ୍ତି । ଅଦ୍ୟାବଧି ଗ୍ରାମରେ ଥିବା ବିଧବା ଓ ବାର୍ଦ୍ଧକ୍ୟଙ୍କ ପାଇଁ ଭତ୍ତା ହୋଇନଥିବା ବେଳେ ଇନ୍ଦିରା ଆବାସ ,ମୋ କୁଡିଆ କେହି ପାଇ ପାରିନାହାନ୍ତି। ଗ୍ରାମରେ ସ୍କୁଲ ନଥିବା ଯୋଗୁଁ ୩ କି.ମି. ଜଙ୍ଗଲ ରାସ୍ତା ଦୂରରେ ରହିଛି ଲକ୍ଷ୍ମୀନାରାୟଣ ପୁରର ପ୍ରାଥମିକ ବିଦ୍ୟାଳୟ। ଦୂରତା ଅଧିକା ହେଉଥିବା ଯୋଗୁଁ ଗ୍ରାମରେ ପ୍ରାୟ ପିଲା ପାଠ ପଢ଼ିବାକୁ ଆଗ୍ରହ ପ୍ରକାଶ କରନ୍ତି ନାହିଁ। ଗାଁ ଲୋକେ ଜଙ୍ଗଲଜାତ ଦ୍ରବ୍ୟ ଓ ମୂଲ ମଜୁରୀ କରି ପରିବାର ଚଳାନ୍ତି । ପାନୀୟଜଳ ପାଇଁ ଝରଣାର ଚୁଆ ପାଣିକୁ ବର୍ଷ ତମାମ ଭରସା କରିଥାନ୍ତି । ସ୍ବାସ୍ଥ୍ୟ ସେବା ପାଇଁ ୧୦ କି.ମି. ଗଲେ କାଳିଆହତା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭର କରନ୍ତି। ହେଲେ ଉକ୍ତ ସ୍ବାସ୍ଥ୍ୟକେନ୍ଦ୍ରରେ ଦିର୍ଘଦିନ ହେବ ଡାକ୍ତର ରହୁନଥିବା ଯୋଗୁଁ ଗ୍ରାମବାସୀ ଚେରମୂଳି ଓ ଝଡାଫୁଙ୍କା ଉପରେ ନିର୍ଭର କରୁଥିବା ଗ୍ରାମର ଦୁଲି ହେମ୍ବ୍ରମ, ମହେଶ୍ୱର ଝୁଡୁ, ଖୁଦିଆ ଝୁଡୁ, ବାନୀ ସୋରେନ ପ୍ରକାଶ କରିଛନ୍ତି। ବିଦ୍ୟୁତ ଏହି ବସ୍ତି ପାଇଁ ସାତ ସପନ ହୋଇ ରହିଛି। ରାସ୍ତା ପାଇଁ କେବଳ ପ୍ରତଶ୍ରୁତି ଦେଇ ପ୍ରତି ପରିବାରର ମୁଖିଆଙ୍କ ନାମ ନେଉଥିବା ଉକ୍ତ ବସ୍ତିର ୱାର୍ଡମେମ୍ବର, ସ୍ଥାନୀୟ ସରପଞ୍ଚ ଓ ବ୍ଲକ ପ୍ରଶାସନ ପାଖରେ ଲୋକଙ୍କ ଦୁଃଖ ଜଣାଇ ଦାବି ହାସଲ କାହିଁକି କରୁନ ପଚରାଯିବାରୁ ବାରମ୍ବାର ଦୁଃଖ ଜଣାଇ ବିଫଳ ହୋଇଛୁ । ଏସମ୍ବନ୍ଧରେ ବିଡିଓ ଦିଲ୍ଲିପ କୁମାର ବାରାଙ୍କ ଦୃଷ୍ଟି ଆକର୍ଷଣ କରିବାରୁ ସେ କହିଲେ ଯେ ଏହି ବସ୍ତି ପାଇଁ ନିଶ୍ଚିତ ଦୃଷ୍ଟି ଦିଆଯିବା ସହ କାର୍ଯ୍ୟ କରାଯିବ ।
