ଇସଲମାବାଦ୍, ୨୮।୫: ଆସନ୍ତା ୩୦ ତାରିଖରେ ଭାରତର ପ୍ରଧାନମନ୍ତ୍ରୀ ଭାବେ ଦ୍ୱିତୀୟଥର ଶପଥ ନେବାକୁ ଯାଉଛନ୍ତି ନରେନ୍ଦ୍ର ମୋଦି। ଏହି ଶପଥ ଗ୍ରହଣ ଉତ୍ସବକୁ ୮ ବିମ୍ଷ୍ଟେକ୍ ସଦସ୍ୟ ବାଂଲାଦେଶ, ମ୍ୟାନ୍ମାର, ଶ୍ରୀଲଙ୍କା, ଥାଇଲାଣ୍ଡ, ନେପାଳ ଏବଂ ଭୂଟାନର ନେତାମାନଙ୍କୁ ନିମନ୍ତ୍ରଣ କରାଯାଇଥିଲାବେଳେ ପାକିସ୍ତାନଙ୍କୁ ନିମନ୍ତ୍ରଣ କରାଯାଇନାହିଁ। ଏନେଇ ସଫେଇ ଦେଇଛି ପାକିସ୍ତାନ। ଦେଶର ବୈଦେଶିକ ମନ୍ତ୍ରୀ ଶାହ ମେହମୁଦ କ୍ୟୁରେସୀ କହିଛନ୍ତି, ଏଥର ମୋଦି ପାକିସ୍ତାନ ବିରୋଧୀ କାର୍ଡ ଖେଳି କ୍ଷମତାକୁ ଆସିଛନ୍ତି। ଯଦି ପାକିସ୍ତାନଙ୍କୁ ଶପଥ ଗ୍ରହଣ ଉତ୍ସବରେ ଡକାଯିବ ତେବେ ଭାରତରେ ଏହାକୁ ନେଇ ଖୁବ୍ ଆଲୋଚନା ହେବ। ଏହି ଡରରେ ମୋଦି ପାକିସ୍ତାନକୁ ନିମନ୍ତ୍ରଣ କରିନାହାନ୍ତି ବୋଲି ସେ କହିଛନ୍ତି। ନିର୍ବାଚନରେ ଭାଜପା ଐତିହାସିକ ବିଜୟ ହାସଲ ପରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ମୋଦିଙ୍କୁ ଶୁଭେଚ୍ଛା ଜଣାଇଥିଲେ। ଏହା ନୂଆ କଥା ନୁହେଁ, ଗତବର୍ଷ ଇମ୍ରାନ ନିର୍ବାଚନ ଜିତିବା ପରେ ମୋଦି ମଧ୍ୟ ତାଙ୍କୁ ଶୁଭେଚ୍ଛା ଜଣାଇଥିଲେ। ଶପଥ ଉତ୍ସବକୁ ନ ଡାକିବା ବଡ ମୁଦ୍ଦା ନୁହେଁ,କଶ୍ମୀର ବିବାଦକୁ ସମାଧାନ କରିବା ପାକିସ୍ତାନର ଲକ୍ଷ୍ୟ ବୋଲି କ୍ୟୁରେସୀ କହିଛନ୍ତି।
