ବେଙ୍ଗାଲୁରୁ, ୨୪।୭: କୁମାରସ୍ବାମୀ ସରକାରଙ୍କ ଆସ୍ଥାଭୋଟ ବେଳେ ବିଧାନସଭାରେ ଅନୁପସ୍ଥିତ ରହିଥିବା ବହୁଜନ ସମାଜ ପାର୍ଟି (ବିଏସ୍ପି)ର ଏକମାତ୍ର ବିଧାୟକ ଏନ୍. ମହେଶଙ୍କୁ ମଙ୍ଗଳବାର ରାତିରେ ନିଲମ୍ବନ କରାଯାଇଛି। ଆସ୍ଥାଭୋଟ ବେଳେ ଉପସ୍ଥିତ ରହି ସରକାରଙ୍କ ସପକ୍ଷରେ ମତଦାନ କରିବାକୁ ବିଏସ୍ପି ସୁପ୍ରିମୋ ମାୟାବତୀ ରବିବାର ବିଧାୟକ ମହେଶଙ୍କୁ ନିର୍ଦ୍ଦେଶ ଦେଇଥିଲେ। ହେଲେ ସେ ଦଳର ହାଇକମାଣ୍ଡଙ୍କ ନିର୍ଦ୍ଦେଶକୁ ଅବଜ୍ଞା କରିଥିବାରୁ ତାଙ୍କୁ ତତ୍କାଳ ନିଲମ୍ବନ କରାଯାଇଛି ବୋଲି ମାୟବତୀ ଟୁଇଟ୍ କରିଛନ୍ତି। ଦଳରୁ ନିଲମ୍ବିତ ହେବାପରେ ଏନ୍. ମହେଶ କହିଛନ୍ତି, ମାୟାବତୀ ଟୁଇଟ୍ କରିଥିବାର ମୋତେ ଜଣା ନ ଥିଲା। ଦଳରୁ ମୋତେ କାହିଁକି ନିଲମ୍ବିତ କରାଯାଇଛି ତାହା ମଧ୍ୟ ମୁଁ ଜାଣିନାହିଁ। ମୋତେ ତ କେବଳ ଆସ୍ଥା ଭୋଟରୁ ଦୂରେଇ ରହିବାକୁ କୁହାଯାଇଥିଲା ବୋଲି ସେ କହିଛନ୍ତି। ସୂଚନାଯୋଗ୍ୟ, ୨୦୧୮ ବିଧାନସଭା ନିର୍ବାଚନରେ ଜେଡିଏସ୍ ସହ ବିଏସ୍ପି ମେଣ୍ଟ କରି ଲଢ଼ିଥିଲା। କେବଳ ମହେଶ ଜିତିଥିବାବେଳେ କ୍ୟାବିନେଟରେ ତାଙ୍କୁ ଶିକ୍ଷାମନ୍ତ୍ରୀ କରାଯାଇଥଲା। ୨୦୧୮ ଅକ୍ଟୋବରରେ ସେ ବ୍ୟକ୍ତିଗତ କାରଣ ଦର୍ଶାଇ ଇସ୍ତଫା ଦେଇଥିଲେ ହେଁ ମେଣ୍ଟ ସରକାରକୁ ସମର୍ଥନ ଜାରି ରହିବ ବୋଲି ଘୋଷଣା କରିଥିଲେ।
