ଖଇରା,୧୯।୩(ଡି.ଏନ୍.ଏ): ବାଲେଶ୍ବର ଜିଲା ଔପଦା ବ୍ଲକ ଅଧୀନ ଜାନିକାପାଳ ଗ୍ରାମର ଜଣେ ଯୁବକ ଥାଇଲାଣ୍ଡରୁ ଫେରିବାର ୧୩ ଦିନ ପରେ ଅସୁସ୍ଥ ହୋଇଛନ୍ତି। ତାଙ୍କୁ ଥଣ୍ଡା,କାଶ ହେଉଛି। ଗୁରୁବାର ଖଇରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଆୟୁଷ ଡାକ୍ତର ସଞ୍ଜିବ ବିଶ୍ବାଳ ତାଙ୍କୁ କଟକ ଯିବା ପାଇଁ ପରାମର୍ଶ ଦେଇଛନ୍ତି। ତେବେ ଯୁବକ ଜଣକ ନିଜ ଘରେ କିଛି ଦିନ ରହିଥିଲେ। ସେଠାରେ ତାଙ୍କୁ ଥଣ୍ଡା ହେବା ପରେ ଖଇରା ବ୍ଲକ ପୂର୍ବପଡା ଗ୍ରାମର ସମ୍ପର୍କୀୟଙ୍କ ଘରେ ଆଶ୍ରୟ ନେଇଥିଲେ। ମାର୍ଚ୍ଚ ୫ରେ ସେ ଥାଇଲାଣ୍ଡରୁ କଲିକତା ବିମାନବନ୍ଦର ଦେଇ ଘରକୁ ଫେରିଥିଲେ। ଜାନିକାପାଳରେ କିଛି ଦିନ ରହିବା ପରେ ଥଣ୍ଡାରେ ଆକ୍ରାନ୍ତ ହେବାରୁ ପୂର୍ବପଡା ଗ୍ରାମକୁ ଚାଲି ଆସିଥିଲେ। ଥଣ୍ଡା ନ ଛାଡିବାରୁ ସେ ଗୁରୁବାର ସ୍ବାସ୍ଥ୍ୟକେନ୍ଦ୍ରକୁ ଆସିଥିବା କୁହାଯାଉଛି। ଏହାକୁ ନେଇ ବର୍ତ୍ତମାନ ଗ୍ରାମବାସୀ ଆତଙ୍କିତ ଅବସ୍ଥାରେ ଅଛନ୍ତି।
