ଢେଙ୍କାନାଳ ଅଫିସ, ୧।୩ – ଢେଙ୍କାନାଳ ଜିଲା କାର୍ଯ୍ୟାଳୟ ସଦ୍ଭାବନା ଗୃହରେ ଶନିବାର ସନ୍ଧ୍ୟାରେ ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକ ଜିଲାପାଳ ଭୂମେଶ ଚନ୍ଦ୍ର ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଏଥିରେ ଖଣିମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ ଯୋଗଦେଇ ମାର୍ଚ୍ଚ ୩୧ ସୁଦ୍ଧା ସମସ୍ତ ପଞ୍ଜୀକୃତ ଚାଷୀଙ୍କ ଧାନ ସଂଗ୍ରହ କରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ବିଧାୟକ ସୁଧୀର ସାମଲ ମିଲରଙ୍କ ଧାନ ସଂଗ୍ରହ କରିବା କ୍ଷମତା ସମ୍ପର୍କରେ ତଥ୍ୟ ସଂଗ୍ରହ କରିବା ପାଇଁ ପରାମର୍ଶ ଦେଇଛନ୍ତି।
ଜିଲାରେ ୧୨ଲକ୍ଷ ୯୨ହଜାର କୁଇଣ୍ଟାଲ ଧାନ ସଂଗ୍ରହ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ଏବେ ସୁଦ୍ଧା ୧୪ଲକ୍ଷ ୨୦ହଜାର ୩୦୦ କୁଇଣ୍ଟାଲ ଧାନ ବିକ୍ରି ପାଇଁ ଚାଷୀ ପଞ୍ଜୀକରଣ କରିଛନ୍ତି। ଅବଶିଷ୍ଟ ୧ଲକ୍ଷ ୨୮ହଜାର ୩୦୦ କୁଇଣ୍ଟାଲ ଧାନ ବିକ୍ରି ପାଇଁ ସରକାରଙ୍କୁ ଅନୁମତି ମାଗିବା ଲାଗି ନିଷ୍ପତ୍ତି ହୋଇଛି। ଧାନ ଅଖା ବାବଦ ଟଙ୍କା ସିଧାସଳଖ ଚାଷୀଙ୍କୁ ପ୍ରଦାନ, ଅଧା ଧାନ ବିକିଥିବା ଟୋକନଧାରୀ ଚାଷୀଙ୍କ ପୁନର୍ବାର ଟୋକନ ପ୍ରଦାନ କରିବା, ଧାନ ଥିବା ଯାଏ ମଣ୍ଡି ଖୋଲା ରଖିବା, ଜିଲାରେ ଅମଳ ହେଉଥିବା ପ୍ରାୟ ୩୦ ହଜାର କୁଇଣ୍ଟାଲ ରବି ଧାନ ସଂଗ୍ରହ ଲାଗି ମଣ୍ଡି ଖୋଲିବାକୁ ବିଧାୟକ ଏବଂ ଚାଷୀ ପ୍ରସ୍ତାବ ଦେଇଥିଲେ।
ବିଧାୟିକା ସୀମାରାଣୀ ନାୟକ, ଜିଲା ପରିଷଦ ଅଧ୍ୟକ୍ଷା ମିନତି ନାୟକ, ଉପଜିଲାପାଳ ବିଷ୍ଣୁ ପ୍ରସାଦ ଆଚାର୍ଯ୍ୟ, ଉଦୟ କୁମାର ମହାପାତ୍ର, ସମବାୟ ସମିତି ଉପନିବନ୍ଧକ ସଂଗ୍ରାମ ରାଉତ, ଏମ୍ପିଙ୍କ ପ୍ରତିନିଧି ପୂର୍ଣ୍ଣଚନ୍ଦ୍ର ସାହୁ, ଜିଲା ଯୋଗାଣ ଅଧିକାରୀ ସଞ୍ଜୀବ କୁମାର ସାହୁ, ଅଗ୍ରଣୀ ଚାଷୀ, ମିଲରଙ୍କ ସମେତ ବିଭାଗୀୟ ଅଧିକାରୀ ଉପସ୍ଥିତ ଥିଲେ।
