ଭୁବନେଶ୍ୱର,୨୮-୮(ବ୍ୟୁରୋ):ଜାତୀୟସ୍ତରରେ ଅର୍ଥନୈତିକ ଅବସ୍ଥା ଭଲ ନାହିଁ। ଏହାର ପ୍ରଭାବ ରାଜ୍ୟଗୁଡିକ ଅର୍ଥନୀତି ଉପରେ ପଡ଼ିବାର ଆଶଙ୍କା କରାଯାଉଛି। ତେଣୁ ରାଜ୍ୟ ଏହାକୁ କିପରି ମୁକାବିଲା କରିବ, ସେନେଇ ଚର୍ଚ୍ଚା ଜୋର ଧରିଛି। ଏ ସମ୍ପର୍କିତ ଏକ ପ୍ରଶ୍ନର ଉତ୍ତର ଦେଇ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି ଯେ, ଜାତୀୟସ୍ତର ଅର୍ଥନୈତିକ ପରିସ୍ଥିତି ଉପରେ ନଜର ରହିଛି। ବିଭିନ୍ନ ସୂତ୍ରରୁ ଯେପରି ରାଜସ୍ବ ବୃଦ୍ଧି ହୋଇପାରିବ ସେ ଦିଗରେ ଗୁରୁତ୍ୱ ଦିଆଯାଉଛି। ସେହିପରି ବଜେଟ୍ ଖର୍ଚ୍ଚ ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି, ଏହା ଦ୍ୱାରା ଅର୍ଥନୀତିର ମାନ୍ଦାବସ୍ଥା ଜନସାଧାରଣଙ୍କୁ ପ୍ରଭାବିତ କରିବ ନାହିଁ। ପ୍ରତିଦିନ ବଜାର ଉପରେ ନଜର ରଖାଯାଉଛି, ଯେ କୌଣସି ପରିସ୍ଥିତିକୁ ମୁକାବିଲା କରିବାକୁ ପଦକ୍ଷେପ ନିଆଯିବ ବୋଲି ନିରଞ୍ଜନ କହିଛନ୍ତି। ଅପରପକ୍ଷରେ ଜୁଲାଇ ସୁଦ୍ଧା ଖର୍ଚ୍ଚ ହୋଇଥିବା ବଜେଟ୍ ହାର ଗତବର୍ଷ ଏହି ସମୟ ଅପେକ୍ଷା ୨.୮୯ ପ୍ରତିଶତ ରହିଛି। ଭିତ୍ତିଭୂମିରେ ଖର୍ଚ୍ଚର ପରିମାଣ ୮୪ ପ୍ରତିଶତ ଏବଂ ଗୃହ ଓ ନଗର ଉନ୍ନୟନ ବିଭାଗର ୪୩ ପ୍ରତିଶତ କମ୍ ଖର୍ଚ୍ଚ ହୋଇଛି। ସାମାଜିକ କ୍ଷେତ୍ରରେ ୨୬୯୬ କୋଟି ଟଙ୍କା ଖର୍ଚ୍ଚ କରାଯାଇଛି, ଯାହା ଗତବର୍ଷ ୬୭୫୨ କୋଟି ଟଙ୍କା ରହିଥିଲା।
