ନୟାଗଡ଼ ଅଫିସ,୨୭।୧୨: ନୟାଗଡ଼ ଜିଲା ନୂଆଗାଁ ବ୍ଲକର ମହୀପୁର ଷ୍ଟେଶନ ଗୁରୁବାର ରେଳ ମାନଚିତ୍ରରେ ସ୍ଥାନ ପାଇଛି। ଫଳରେ ବହୁ ପ୍ରତୀକ୍ଷିତ ଅଞ୍ଚଳବାସୀ ଏ ନେଇ ଖୁସି ବ୍ୟକ୍ତ କରିଛନ୍ତି। ନୟାଗଡ଼ ଟାଉନ ଷ୍ଟେଶନଠାରେ ମହିପୁର ନୂଆ ରେଳ ଲାଇନ୍ର ଲୋକାର୍ପଣ ଓ ଖୋର୍ଦ୍ଧା ରୋଡ଼ଠାରୁ ନୟାଗଡ଼ ଟାଉନକୁ ଯାଉଥିବା ପାସେଞ୍ଜର ଟ୍ରେନକୁ ମହୀପୁର ପର୍ଯ୍ୟନ୍ତ ସମ୍ପ୍ରସାରଣ କାର୍ଯ୍ୟକ୍ରମ ଅପରାହ୍ନରେ ଅନୁଷ୍ଠିତ ହୋଇଯାଇଛି। କେନ୍ଦ୍ର ପେଟ୍ରୋଲିୟମ ଓ ଇସ୍ପାତ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇ ଏହାକୁ ଲୋକାର୍ପଣ କରିଥିଲେ।
କେନ୍ଦ୍ରମନ୍ତ୍ରୀ ପ୍ରଧାନ ନିଜ ବକ୍ତବ୍ୟରେ କହିଥିଲେ, ନୟାଗଡ଼ ଟାଉନ ଷ୍ଟେଶନଠାରୁ ମହୀପୁର ୧୨ କିଲୋମିଟର ଦୀର୍ଘ ରେଳ ଲାଇନ ପାଇଁ ୫୯ କୋଟି ଟଙ୍କା ଖର୍ଚ୍ଚ ହୋଇଛି। ଏହି ରେଳ ଆଗାମୀ ଦିନରେ ଜିଲାର ବିକାଶରେ ସହାୟକ ହେବ। ରେଳ ଗଡ଼ିବ ବିକାଶ ଆସିବ ବୋଲି ନାରା ଦେଇଥିଲେ। ୨୦୨୨ ମାର୍ଚ୍ଚ ସୁଦ୍ଧା ଦଶପଲ୍ଲା ଓ ୨୦୨୩ ଡିସେମ୍ବର ସୁଦ୍ଧା ବଲାଙ୍ଗୀର ପର୍ଯ୍ୟନ୍ତ ରେଳ ଚଳାଚଳ କରିବ। ବର୍ତ୍ତମାନ ଓଡ଼ିଶାରେ ରେଳ ବିଭାଗର ୧୦ ହଜାର କୋଟି ଟଙ୍କାର କାମ ହେଉଛି। ଏଥିପାଇଁ ରାଜ୍ୟ ସରକାରଙ୍କ ସହଯୋଗର ଆବଶ୍ୟକତା ରହିଛି। ରାଜ୍ୟ ସରକାର ଜମି ଅଧିଗ୍ରହଣ, ଜଙ୍ଗଲ ବିଭାଗର ଅନୁମତି ଆଦି କାର୍ଯ୍ୟ ତୁରନ୍ତ ସାରି ଫାଇଲ ପ୍ରଦାନ କଲେ ଭାରତ ସରକାର ଟଙ୍କା ଦେବାରେ କେବେ ଅବହେଳା କରିବେ ନାହିଁ। ସମୃଦ୍ଧ ଓଡ଼ିଶା ଗଠନ କରିବାରେ ବଲାଙ୍ଗୀର-ଖୋର୍ଦ୍ଧା ରେଳ ଲାଇନ୍ଠାରୁ ବଡ଼ କିଛି ଉଦାହରଣ ହୋଇ ନ ପାରେ। ଏହି ରେଳ ଲାଇନ କେବଳ ଯେ ଓଡ଼ିଶାକୁ ଅର୍ଥନୈତିକ ସୁଦୃଢ଼ କରିବ ତା’ନୁହେଁ ଭାବାତ୍ମକ ଭାବେ ଯୋଡ଼ିବାର ପଥ ବୋଲି ସେ କହିଥିଲେ। ଅନ୍ୟପେଟ କେନ୍ଦ୍ର ମନ୍ତ୍ରୀ ଅରୁଣ ସାହୁଙ୍କୁ ଟାର୍ଗେଟ କରି ନୟାଗଡ଼ରେ ବନ୍ଦ ହୋଇ ପଡ଼ିଥିବା ଚିନିକଳ ଖୋଲିବା ପାଇଁ କହିଥିଲେ। ସମ୍ମାନିତ ଅତିଥି ଭାବେ ନୟାଗଡ଼ ବିଧାୟକ ତଥା କୃଷିମନ୍ତ୍ରୀ ଡ. ଅରୁଣ କୁମାର ସାହୁ ଯୋଗଦେଇ ମହୀପୁରକୁ ବିକାଶର ଫର୍ଦ୍ଦ ଯୋଡ଼ିହେଲା ବୋଲି କହିଥିଲେ। ରେଳ ହିଁ ବିକାଶର ଚାବିକାଠି ବୋଲି ସେ ପ୍ରକାଶ କରିଥିଲେ। ଖୋର୍ଦ୍ଧା ଡିଭିଜନର ଡିଆରଏମ ଶଶିକାନ୍ତ ସିଂ, ପୂର୍ବତଟ ରେଳପଥର ମହାପ୍ରବନ୍ଧକ ବିଦ୍ୟାଭୂଷଣ ସିଂ, ଜିଲାପାଳ ଡା. ପୋମା ଟୁଡୁ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ମୃତ୍ୟୁଞ୍ଜୟ ରଥ କାର୍ଯ୍ୟକ୍ରମ ପରିଚାଳନା କରିଥିଲେ। ଏହି ଅବସରରେ ଅପରାହ୍ନ ୪ଟା ୩୦ରେ ନୟାଗଡ଼ ଟାଉନ ଷ୍ଟେଶନରୁ ଏକ ଟ୍ରେନ୍ ବାହାରି ୪ଟା ୫୦ରେ ମହୀପୁର ଷ୍ଟେଶନଠାରେ ପହଞ୍ଚତ୍ଥିଲା। ଶୁକ୍ରବାରଠାରୁ ପ୍ରତିଦିନ ଖୋର୍ଦ୍ଧା ରୋଡ଼ରୁ ବାହାରୁଥିବା ପାସେଞ୍ଜର ଟ୍ରେନ୍ ସକାଳ ୧୦ଟା ୧୫ରେ ମହିପୁର ଷ୍ଟେଶନରେ ପହଞ୍ଚତ୍ବ। ଉକ୍ତ ଟ୍ରେନ୍ଟି ୧୦ଟା ୪୫ରେ ମହୀପୁର ଷ୍ଟେଶନରୁ ଛାଡ଼ି ନୟାଗଡ଼ ଟାଉନ ଷ୍ଟେଶନ ଦେଇ ଖୋର୍ଦ୍ଧା ରୋଡ଼କୁ ଯିବ। ସେହିଭଳି ସନ୍ଧ୍ୟାରେ ଖୋର୍ଦ୍ଧାରୁ ଛାଡ଼ୁଥିବା ଟ୍ରେନ୍ଟି ରାତ୍ର ୧୦ଟା ୧୫ରେ ମହୀପୁର ଷ୍ଟେଶନରେ ପହଞ୍ଚତ୍ବ। ଏହି ଟ୍ରେନ୍ଟି ପରଦିନ ସକାଳ ୪ଟା ୩୦ରେ ମହୀପୁର ଷ୍ଟେଶନରୁ ବାହାରି ଖୋର୍ଦ୍ଧା ରୋଡ଼ ଅଭିମୁଖେ ଯିବ। ସୂଚନାଯୋଗ୍ୟ ୨୫ ଜୁଲାଇରେ ନୟାଗଡ଼ ଟାଉନ ଷ୍ଟେଶନଠାରୁ ମହୀପୁର ପର୍ଯ୍ୟନ୍ତ ପରୀକ୍ଷାମୂଳକ ଭାବେ ଟ୍ରେନ୍ ଗଡ଼ିଥିଲା।
