ନୂଆଦିଲ୍ଲୀ,୨୫।୧୧: ମହାରାଷ୍ଟ୍ରରେ ଭାଜପା ଶାସିତ ସରକାରଙ୍କୁ ଦିଲ୍ଲୀ ଯୁବ କଂଗ୍ରେସ କର୍ମୀମାନେ ବିରୋଧ କରିଛନ୍ତି। ଏମାନେ ଟାୟାର ଜାଳି ରାସ୍ତା ଅବରୋଧ କରିବା ସହ ପୋଲିସ ବାରିକେଡ ଭାଙ୍ଗିବାକୁ ମଧ୍ୟ ଚେଷ୍ଟା କରିଛନ୍ତି। ସୂଚନାଯୋଗ୍ୟ, ମହାରାଷ୍ଟ୍ରରେ ଭାଜପା ଓ ଏନ୍ସିପିର ଅଜିତ ପାଓ୍ବାର ମିଶି ସରକାର ଗଠନ କରିଛନ୍ତି। ଭାଜପାରୁ ଦେବେନ୍ଦ୍ର ଫଡ୍ନବିସ ମୁଖ୍ୟମନ୍ତ୍ରୀ ହୋଇଥିବା ବେଳେ ଏନ୍ସିପିରୁ ଅଜିତ୍ ପାଓ୍ବାର ଉପ ମୁଖ୍ୟମନ୍ତ୍ରୀ ହୋଇଛନ୍ତି। ହେଲେ ସେମାନଙ୍କ ପାଖରେ ଏପର୍ଯ୍ୟନ୍ତ ସଂଖ୍ୟା ଗରିଷ୍ଠତା ନାହିଁ ବୋଲି କହୁଛି ଶିବସେନା, ଏନ୍ସିପି ଓ କଂଗ୍ରେସ। ଏହାକୁ ନେଇ ମାମଲା ସୁପ୍ରିମକୋର୍ଟ ପହଞ୍ଚିଥିବା ବେଳେ ମଙ୍ଗଳବାର ଏହାର ଶୁଣାଣି କରାଯିବ। କିନ୍ତୁ ସୋମବାର ଫଡ୍ନବିସ ମୁଖ୍ୟମନ୍ତ୍ରୀ ଦାୟିତ୍ୱ ନେଇ ସାରିଛନ୍ତି। କିନ୍ତୁ ଏହାକୁ ଏପର୍ଯ୍ୟନ୍ତ କଂଗ୍ରେସ, ଶିବସେନା ଓ ଏନ୍ସିପି ଗ୍ରହଣ କରିପାରୁ ନ ଥିବାରୁ ଆରମ୍ଭ ହୋଇ ଗଲାଣି ବିରୋଧ ପ୍ରଦର୍ଶନ।
