ଓ୍ବାଶିଂଟନ,୨୫ା୪ : କୋଭିଡ୍-୧୯ ହେଉଛି ପ୍ରଥମ ଆଧୁନିକ ମହାମାରୀ, ଯାହା ଏହି ଯୁଗର ସଂଜ୍ଞା ନିରୂପଣ କରିବ। ଏହି ସମୟ ଦେଇ ଗତି କରୁଥିବା କୌଣସି ବ୍ୟକ୍ତି ମହାମାରୀକୁ ଭୁଲିପାରିବେ ନାହିଁ ବୋଲି ଆମେରିକାର ବିଶିଷ୍ଟ ଜନହିତୈଷୀ ଶିଳ୍ପପତି ବିଲ୍ ଗେଟ୍ସ କହିଛନ୍ତି।
ବିଲ୍ ଗେଟ୍ସଙ୍କ ମତରେ ବର୍ତ୍ତମାନ ଲୋକେ ଯେଉଁ କଷ୍ଟ ଅନୁଭବ କରୁଛନ୍ତି ତାକୁ ବ୍ୟକ୍ତ କରିହେବ ନାହିଁ। ଏହା ଆଗାମୀ ଅନେକ ବର୍ଷ ଧରି ଅନୁଭୂତ ହେଉଥିବ। ଏହି ରୋଗ ଅବିଚାରିତ ଭାବେ ଗରିବ ସମୁଦାୟ ଜାତିଗତ ସଂଖ୍ୟାଲଘୁଙ୍କୁ କଷ୍ଟ ଦେଇଚାଲିଛି। ଏହାର ମୁକାବିଲା ପାଇଁ ଜାରି ଶଟ୍ଡାଉନ୍ ଯୋଗୁ ସ୍ବଳ୍ପ ଆୟକାରୀ, ସଂଖ୍ୟାଲଘୁ ଶ୍ରମିକ ବହୁଳ ଭାବେ ପ୍ରଭାବିତ। ଦେଶଗୁଡ଼ିକ ଏହି ସ୍ଥିତିରୁ ମୁକୁଳିବାକୁ ଆରମ୍ଭ କଲେ ସମାଧାନ କ୍ଷେତ୍ରରେ ଯେପରି ଅସମାନତା ନ ହୁଏ ସେନେଇ ନୀତି ନିର୍ଦ୍ଧାରକମାନଙ୍କୁ ନିଶ୍ଚିତ କରିବାକୁ ପଡ଼ିବ ବୋଲି ଗେଟ୍ସ ଶୁକ୍ରବାର ଏକ ବିସ୍ତୃତ ପୋଷ୍ଟରେ ଉଲ୍ଲେଖ କରିଛନ୍ତି। ଶିଳ୍ପପତି ଗେଟ୍ସ କହିଛନ୍ତି, ଏହି ଭାଇରସ୍ ସବୁ ବର୍ଗର ଲୋକଙ୍କ କ୍ଷତି ସାଧନ କରିଛି। ସ୍ବାସ୍ଥ୍ୟ, ସମ୍ପଦ ଓ ସୁଖ ସ୍ବାଚ୍ଛନ୍ଦ୍ୟ ସବୁକିଛିକୁ କରୋନା ଛଡ଼ାଇ ନେଇଛି। ଏହା ଏକ ବିଶ୍ୱଯୁଦ୍ଧ ସଦୃଶ। କେବଳ ଫରକ ଏତିକି ଯେ, ଏହି ଯୁଦ୍ଧରେ ଆମେ ସମସ୍ତେ ଗୋଟିଏ ପକ୍ଷରେ ହିଁ ରହିଛୁ। ଏହି ରୋଗ ସମ୍ପର୍କରେ ସମସ୍ତେ ଏକାଠି ହୋଇ ଶିକ୍ଷା ଗ୍ରହଣ କରିପାରିବା ଏବଂ ଏହା ବିରୋଧରେ ଲଢ଼େଇ ପାଇଁ ଅସ୍ତ୍ର ବିକଶିତ କରିପାରିବା। ସଂକ୍ରମଣଜନିତ କ୍ଷତିକୁ ସୀମିତ କରିବା ଲାଗି ବିଶ୍ୱରେ ଏକ ନବପ୍ରବର୍ତ୍ତନ ଦେଖିବାକୁ ମିଳିଛି। ଯାଞ୍ଚ, ଚିକିତ୍ସା, ଟିକା ଓ ନୀତି ସଂକ୍ରମଣକୁ ରୋକିବାରେ ବିଶେଷ ସହାୟକ ହେବା ସଙ୍ଗେ ସଙ୍ଗେ ଅର୍ଥନୀତିର କ୍ଷତିକୁ ମଧ୍ୟ ହ୍ରାସ କରିବ।
ସମ୍ପ୍ରତି ସାରା ବିଶ୍ୱରେ ବିକଶିତ ହେଉଥିବା ୭୦ରୁ ଊର୍ଦ୍ଧ୍ୱ ଭାକ୍ସିନ ବିଭିନ୍ନ ପର୍ଯ୍ୟାୟରେ ରହିଛି। ସେଗୁଡ଼ିକ ମଧ୍ୟରୁ ୪-୫ଟି ଦୌଡ଼ର ଶୀର୍ଷରେ ରହିଥିବାବେଳେ ଏକ ସଫଳ କୋଭିଡ୍-୧୯ ଟିକା ବଜାରକୁ ଆସିବା ପାଇଁ ୧୨ରୁ ୧୮ ମାସ ଲାଗିଯାଇପାରେ। ମୋଟାମୋଟି ଭାବେ ଏହି ମହାମାରୀ ଏବେ ସମଗ୍ର ମାନବ ଜାତିକୁ ଏକାଠି କରିଦେଇଛି ବୋଲି ଗେଟ୍ସ ପ୍ରକାଶ କରିଛନ୍ତି।
ପ୍ରକାଶ ଯେ, କରୋନା ମୁକାବିଲା ପାଇଁ ବିଲ୍ ଓ ମେଲିଣ୍ଡା ଗେଟ୍ସ ଫାଉଣ୍ଡେଶନ ଗତ ସପ୍ତାହରେ ୧୫୦ ନିୟୁତ ଡଲାର ଦାନ କରିଥିଲା। ଗେଟ୍ସଙ୍କ ମତରେ ଅଦ୍ୟାବଧି ଭାରତ ଓ ନାଇଜେରିଆ ଭଳି ବିକାଶଶୀଳ ରାଷ୍ଟ୍ରଗୁଡ଼ିକରେ ବିଶ୍ୱର ମୋଟ ସଂକ୍ରମିତଙ୍କଠାରୁ ବହୁ କମ୍ ଆକ୍ରାନ୍ତ ରହିଛନ୍ତି। ତେଣୁ ଏହି ଦେଶଗୁଡ଼ିକରେ ସନ୍ଦିଗ୍ଧଙ୍କ ସ୍ବାସ୍ଥ୍ୟ ପରୀକ୍ଷା କରି ସ୍ଥିତି ସମ୍ପର୍କରେ ଲୋକଙ୍କୁ ସଚେତନ କରିବା ହେଉଛି ତାଙ୍କ ଫାଉଣ୍ଡେଶନର ପ୍ରାଥମିକତା। ମହାମାରୀର ଭାକ୍ସିନ ଗବେଷଣା କ୍ଷେତ୍ରରେ ନିୟୋଜିତ ଅଗ୍ରଣୀ କମ୍ପାନୀଗୁଡ଼ିକୁ ଗେଟ୍ସ ଫାଉଣ୍ଡେଶନ ସହାୟତା ଦେଉଛି। ସେମାନଙ୍କ ଗବେଷଣା ସଫଳ ହେଲେ ମହାମାରୀ ଉପରେ ବିଜୟ ଲାଭ ସମ୍ଭବ।
