ବାରଙ୍ଗ,୯।୮(ଲିଙ୍ଗରାଜ ରାଉତ): ନରାଜ ପାଖ ମହାନଦୀରେ ମଙ୍ଗଳବାର ବୁଡ଼ିଯାଇ ୨ଜଣ ଛାତ୍ର ନିଖୋଜ ହୋଇଛନ୍ତି। ସେମାନେ ହେଲେ କଟକସ୍ଥିତ ମଙ୍ଗଳାବାଗ ଅଞ୍ଚଳର ଆଦିତ୍ୟ ଅଭିଷେକ ମଲ୍ଲିକ ଓ ଦେଉଳ ସାହିର ଦେବପ୍ରିୟ ଚୌଧୁରୀ। ଏମାନେ କଟକ ଷ୍ଟୁଆଟର୍ସ ସ୍କୁଲରେ ପଢୁଥିବା ଯୁକ୍ତଦୁଇ ପ୍ରଥମବର୍ଷର ଛାତ୍ର। ଖବରପାଇ ବାରଙ୍ଗରୁ ଏକ ଅଗ୍ନିଶମ ବାହିନୀ ଓ ଏନ୍ଡିଆର୍ଏଫ୍ ଟିମ୍ ଆସି ବୋଟ ଦ୍ୱାରା ଖୋଜାଖୋଜି ଜାରି ରଖିଛନ୍ତି। ପରେ ଗୋଡ଼ିସାହି ଫାଣ୍ଡି ଓ ବାରଙ୍ଗ ଥାନା ପୋଲିସ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଚଳାଇଛି। ସୂଚନା ଅନୁଯାୟୀ, ମଙ୍ଗଳବାର ସ୍କୁଲରେ ଏକ କାର୍ଯ୍ୟକ୍ରମ ଥିଲା। କିନ୍ତୁ ସ୍କୁଲର ୮ଜଣ ଛାତ୍ର ସାଙ୍ଗ ହୋଇ ସ୍କୁଲକୁ ନଯାଇ ମହାନଦୀରେ ଗାଧୋଇବାର ଯୋଜନାକରି ୪ଟି ସ୍କୁଟିରେ ନରାଜ ଆସିଥିଲେ। ସେଠାରୁ ସେମାନେ ସିଦ୍ଧେଶ୍ୱର ମନ୍ଦିର ମୁଣ୍ଡିଆତଳ ମହାନଦୀରେ ଗାଧୋଇବା ପାଇଁ ଯାଇଥିଲେ। ୮ଜଣ ସାଙ୍ଗ ଗାଧୋଇବା ପୂର୍ବରୁ ଫଟୋ ଉଠାଇ ହସମଜା କରିଥିଲେ। ପ୍ରାୟ ସାଢେ ୩ଟା ପାଖାପାଖି ୩ଜଣ ସାଙ୍ଗ ଜଳଖିଆ ଆଣିବାକୁ ଯାଇଥିବା ବେଳେ ଅନ୍ୟ ୫ଜଣ ଆଣିଥିବା ବ୍ୟାଗକୁ ନେଇ ଲୁଚାଲୁଚି ଖେଳିଥିଲେ। ଏହି ସମୟରେ ଆଦିତ୍ୟ ଓ ଦେବପ୍ରିୟ ପ୍ରଥମେ ଗାଧୋଇବାକୁ ଯାଇଥିଲେ। ହେଲେ ଅସାବଧାନତାବଶତଃ ଦୁହେଁ ମହାନଦୀରେ ବୁଡ଼ିଯାଇଥିଲେ। ଉପରେ ଖେଳରେ ବ୍ୟସ୍ତ ଥିବା ଅନ୍ୟ ୩ଜଣ ସାଙ୍ଗ ଏହାଦେଖି ପାଟି କରିବା ସହ ଅଗ୍ନିଶମ ବିଭାଗକୁ ଫୋନ କରିଥିଲେ। ପାଖରେ ଥିବା ସ୍ଥାନୀୟ ଗ୍ରାମର କେତେଜଣ ଯୁବକ ପାଟିଶୁଣି ପାଖକୁ ଆସିବାବେଳକୁ ବୁଡିଯାଇଥିବା ଦୁଇଜଣ ଛାତ୍ରଙ୍କୁ ଦେଖିପାରି ନ ଥିଲେ। ପରେ ଅଗ୍ନିଶମ ବିଭାଗର କର୍ମଚାରୀମାନେ ଆସି ଦୀର୍ଘ ସମୟ ପର୍ଯ୍ୟନ୍ତ ଖୋଜୁଥିବା ବେଳେ ପରେ ଏକ ଏନ୍ଡିଆର୍ଏଫ୍ ଟିମ୍ ମଧ୍ୟ ପହଞ୍ଚତ୍ ସନ୍ଧାନ ଚଳାଇଛନ୍ତି।
