କେନ୍ଦ୍ରାପଡ଼ା ଅଫିସ,୧୬।୮: ମହାନଦୀରେ ବନ୍ୟାଜଳ ପ୍ରବାହିତ ହେତୁ କେନ୍ଦ୍ରାପଡ଼ା ଜିଲାର ମହାକାଳପଡ଼ା, ଗରଦପୁର ଓ ମାର୍ଶାଘାଇ ବ୍ଲକର ୩୦ରୁ ଊର୍ଦ୍ଧ୍ୱ ଗ୍ରାମରେ ପାଣି ପଶିଛି। ଏହି ସମସ୍ୟାର ସମାଧାନ ହୋଇ ନ ଥିବା ବେଳେ ଅପରାହ୍ନରେ ହୋଇଥିବା ବର୍ଷା ସ୍ଥାନୀୟ ଅଧିବାସୀଙ୍କୁ ଆତଙ୍କିତ କରି ପକାଇଛି। ପାଇକା, ଚିତ୍ରୋତ୍ପଳା, ଲୁଣା ଓ କରାଣ୍ଡିଆ ନଦୀରେ ବୁଧବାର ରାତିରୁ ବନ୍ୟାଜଳ ବଢ଼ିଥିଲା। ମାର୍ଶାଘାଇ ବ୍ଲକର ଡିହବଳରାମପୁରସ୍ଥ ୮,୯ ଓ ୧୦ ନମ୍ବର ୱାର୍ଡରେ ଗୁରୁବାର ସକାଳ ସୁଦ୍ଧା ବନ୍ୟାଜଳ ପ୍ରବାହିତ ହୋଇଥିଲା। ସେହିପରି ମହାକାଳପଡ଼ା ଓ ଗରଦପୁର ବ୍ଲକ ଅଞ୍ଚଳର ନଦୀକୂଳ ନିକଟ ଗ୍ରାମରେ ପାଣି ପଶିଥିଲା। ଗୁରୁବାର ସନ୍ଧ୍ୟା ସୁଦ୍ଧା ୨୧ଟି ଗାମରେ ବନ୍ୟାଜଳ ପଶିଥିବା ବେଳେ ଶୁକ୍ରବାର ଅପରାହ୍ନ ସୁଦ୍ଧା ଏହି ସଂଖ୍ୟା ୩୦ରୁ ଊର୍ଦ୍ଧ୍ୱ ଥିବା ସୂଚନା ମିଳିଛି। ଜିଲା ପ୍ରଶାସନ ପକ୍ଷରୁ ବନ୍ୟା ଜନିତ ସମସ୍ୟା ନିୟନ୍ତ୍ରଣ ପାଇଁ ବିଭିନ୍ନ ସ୍ଥାନରେ ରିଲିଫ୍ ବ୍ୟବସ୍ଥା ଆରମ୍ଭ ହୋଇଛି।ଏବେସୁଦ୍ଧା ମାତ୍ର ୧୮ଜଣଙ୍କୁ ଜିଲା ପ୍ରଶାସନ ସ୍ଥାନାନ୍ତର କରିଥିବା ଜିଲା ଜରୁରୀକାଳିନ ବିଭାଗ ପକ୍ଷରୁ ସୂଚନା ମିଳିଛି। ତେବେ ପ୍ରଭାବିତ ଲୋକଙ୍କ ସଂଖ୍ୟା ୧୦ ହଜାରରୁ ଊର୍ଦ୍ଧ୍ୱ ହେବ ବୋଲି ଆଶଙ୍କା କରାଯାଉଛି।
