କୁଜଙ୍ଗ,୧।୧୧(ସ୍ବ.ପ୍ର.): ସାରା ଦେଶରେ ଗୁରୁବାର ରାଷ୍ଟ୍ରୀୟ ଏକତା ଦିବସ ପାଳିତ ହୋଇଥିବାବେଳେ କୁଜଙ୍ଗର ବିଭିନ୍ନ ଶିକ୍ଷାନୁଷ୍ଠାନ, ସାମାଜିକ ଅନୁଷ୍ଠାନରେ ଏହି ଦିବସ ପାଳନ କରାଯାଇଛି। ତେବେ ଏହି ଅବସରରେ ସନ୍ଧ୍ୟା ସାଢେ ୭ଟାରେ କୁଜଙ୍ଗ ବଜାରର ଏକ ମସ୍ଜିଦ୍ରେ ୧୭ଜଣ ବିଦେଶୀ ନାଗରିକ ପ୍ରବେଶ କରିଥିବା ପ୍ରଚାର ହୋଇଥିଲା। ଯେହେତୁ କୁଜଙ୍ଗ-ପାରାଦୀପ ଭଳି ଉପକୂଳ ଅଞ୍ଚଳ ପ୍ରତି ଆତଙ୍କବାଦୀ ପ୍ରବେଶ ଭୟ ରହିଥିବା ପୂର୍ବରୁ ଗୁଇନ୍ଦା ବିଭାଗ ସତର୍କତା ଜାରି କରିଥିଲା, ତେଣୁ ଏହି ପ୍ରସଙ୍ଗକୁ ନେଇ ସ୍ଥାନୀୟ ଲୋକେ ଭୟଭୀତ ହୋଇପଡିଥିଲେ। ଖବରପାଇ କୁଜଙ୍ଗ ଥାନା ଅଧିକାରୀ ଦିଲୀପ କୁମାର ସାହୁ ସଦଳବଳ ଉକ୍ତ ମସ୍ଜିଦ୍କୁ ଯାଇ ତଦନ୍ତ କରିବା ପରେ ଏହି ୧୭ ଜଣ ବିଦେଶୀ ନାଗରିକ ଇଣ୍ଡୋନେସିଆ ଓ ମାଲେସିଆ ପର୍ଯ୍ୟଟକ ବୋଲି ଜାଣିବାକୁ ପାଇଥିଲେ। ସେମାନେ ହେଲେ ଇଣ୍ଡୋନେସିଆର ମହମଦ୍ ଫରିଦ୍, ମୁସ୍କାର, ଅରାଫ୍, କାଡେମୀ, ସାଣ୍ଡି ରୋହନୀ, ଅବଦୁଲ ରହିମ, ଜଫାରଦ୍ଦିନ, ଏସ୍.ଏମତ୍ କାର୍ସୋ ଆଟ୍ମୀ, ସ୍ୟାମସୁରଜାଲ, ଲା ଓଡେ ତାଜ୍ଲନ୍, ଜଭେଦ୍ ଫର୍ଣ୍ଣାଡୋ, ନଦଜୀବ୍, କଡୋରିନ୍, ସୁୟାନୋ ଓ ଅନ୍ୟ ୩ ଜଣ ହେଲେ ମାଲେସିଆର କମଲ ସୁଆଜିଦ୍ ବିନ୍ ମହମଦ୍ କମଲ, ମହାଦୁଜିମ୍ ମିନ୍ ମାଟ୍ ଦାଉଦ୍, ଅବଦୁଲ ରହିମ ବିନ୍ ବକର। ଏହି ପର୍ଯ୍ୟଟକମାନେ ୨୩ରୁ ୨୭ ତାରିଖ ଜଗତ୍ସିଂହପୁର ଥାନାର ୫ ମସ୍ଜିଦ୍, ତିର୍ତ୍ତୋଲର ୨, ରଘୁନାଥପୁରର ୧, ବିରିଡ଼ିର ୧, କୁଜଙ୍ଗର ୧ ଓ ପାରାଦୀପର ୨ ମସଜିଦ୍ ଭ୍ରମଣ କରିବାର ଯୋଜନା ରହିଛି। ସେମାନେ ଗସ୍ତ ସମ୍ପର୍କରେ ପୂର୍ବରୁ ଜଗତ୍ସିଂହପୁର ଏସ୍ପିଙ୍କ କାର୍ଯ୍ୟାଳୟକୁ ସୂଚନା ଦେଇଥିବା ବେଳେ ଗୁରୁବାର କୁଜଙ୍ଗରେ ପହଞ୍ଚତ୍ଥିଲେ। ଏହି ଅବସରରେ କୁଜଙ୍ଗ ଥାନା ପକ୍ଷରୁ ବିଦେଶୀ ନାଗରିକମାନେ ଆଣିଥିବା ବ୍ୟାଗ୍ ଓ ଅନ୍ୟାନ୍ୟ ସରଞ୍ଜାମ ଯାଞ୍ଚ କରାଯାଇଥିଲା। ସେମାନଙ୍କ ପାଖରେ ଥିବା ଭିସା ସହ ଅନ୍ୟାନ୍ୟ କାଗଜ ପତ୍ର ମଧ୍ୟ ଯାଞ୍ଚ କରାଯାଇଥିଲା।
