କୋରୁକୋଣ୍ଡା ୩।୧(ଡି.ଏନ. ଏ) – ଛାତ୍ରୀଛାତ୍ରଙ୍କୁ ସ୍କୁଲମୁହାଁ କରିବାକୁ ସରକାରୀ ବିଦ୍ୟାଳୟରେ ମଧ୍ୟାହ୍ନଭୋଜନ ବ୍ୟବସ୍ଥା କରାଯାଇଛି। କିନ୍ତୁ ସ୍କୁଲ ଛୁଟି ଥିବା ସମୟରେ ମଧ୍ୟ ପିଲାଙ୍କୁ ଏହି ମଧ୍ୟାହ୍ନଭୋଜନ ମିଳିଥିବା ନେଇ ଏକ ତଥ୍ୟ ଅନ୍ଲାଇନ ମାଧ୍ୟମରେ ଜଣାପଡିଛି।
ପ୍ରକାଶ ଯେ, କୋରୁକୋଣ୍ଡା ବ୍ଲକ ପୋଟରେଲ ପଞ୍ଚାୟତ ସିରିଗୁଡ଼ା ପ୍ରାଥମିକ ସ୍କୁଲରେ ପ୍ରଥମରୁ ପଞ୍ଚମ ମଧ୍ୟରେ ୬୪ଜଣ ପିଲା ପାଠ ପଡନ୍ତି। ଗତ ୨୨ ତାରିଖରେ ସ୍କୁଲରେ ଧାନକଟା ଛୁଟି ଦିଆଯାଇଥିଲା। ସ୍କୁଲ ୧ ତାରିଖ ପର୍ଯ୍ୟନ୍ତ ବନ୍ଦ ଥିଲା। କିନ୍ତୁ ୨୩ ତାରିଖରେ ୫୮ ଜଣ ଛାତ୍ରୀଛାତ୍ରଙ୍କୁ ମଧ୍ୟାହ୍ନଭୋଜନ ଦିଆଯାଇଥିବା ନେଇ ଅନ୍ଲାଇନ ତଥ୍ୟ ମିଳିଛି। ସ୍କୁଲ ବନ୍ଦ ଥିବାବେଳେ ଏହା କିଭଳି ସମ୍ଭବ ହେଲା ସେ ନେଇ ପ୍ରଧାନଶିକ୍ଷକ ଜ୍ୟୋତି ମାଡକାମୀଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରିବାରୁ ତାହା ହୋଇ ପାରି ନ ଥିଲା। ଘଟଣା ସମ୍ପର୍କରେ ବ୍ଲକ ଶିକ୍ଷାଧିକାରୀ ପତିତପାବନ ଦାସଙ୍କୁ ପଚାରିବାରୁ ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।
