ଭୁବନେଶ୍ୱର, ୫।୧(ବ୍ୟୁରୋ)- ସାରା ରାଜ୍ୟରେ ଧାନ ସଂଗ୍ରହ ଆରମ୍ଭ ହୋଇଛି। ହେଲେ କେତେକ ସ୍ଥାନରେ ମଣ୍ଡିରୁ ଧାନ ଉଠି ନ ଥିବା ଅଭିଯୋଗ ହୋଇଛି। ଏପରି କି ରାଜଧାନୀ ଭୁବନେଶ୍ୱରସ୍ଥିତ ଶିଶୁପାଳଗଡ଼ ମଣ୍ଡିରୁ ଧାନ ଉଠି ନ ଥିବା ଅଭିଯୋଗ ହୋଇଛି। ଏହି କାରଣରୁ କେତେକ ବ୍ୟକ୍ତି ଟୁଇଟର ଜରିଆରେ ସମବାୟ, ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁଙ୍କ ଦୃଷ୍ଟିଆକର୍ଷଣ କରିଛନ୍ତି। ଅନୁରୂପଭାବେ ପୁରୀ ଜିଲା ଡେଲାଙ୍ଗ ବ୍ଲକ ଅନ୍ତର୍ଗତ ଗଡକାଳୁପଡା ସୋସାଇଟିରୁ ଏ ପର୍ଯ୍ୟନ୍ତ ଧାନ ଉଠୁ ନ ଥିବା ଅଭିଯୋଗ ହୋଇଛି। ଏହି ସୋସାଇଟିରେ ପଞ୍ଜୀକୃତ ହୋଇଥିବା ୨୦୪ ଜଣ ଚାଷୀ ଧାନ ଉଠୁ ନ ଥିବାରୁ ପ୍ରଭାବିତ ହୋଇଛନ୍ତି। ଶିଶୁପାଳଗଡ ମଣ୍ଡିରୁ ଧାନ ନ ଉଠିବା ନେଇ ମନୋଜ କୁମାର ତ୍ରିପାଠୀ ନାମକ ଜଣେ ବ୍ୟକ୍ତି ଟୁଇଟର ମାଧ୍ୟମରେ ମନ୍ତ୍ରୀଙ୍କୁ ଅବଗତ କରାଇଛନ୍ତି। ସେହିପରି ଡେଲାଙ୍ଗବାସିନ୍ଦା ତଥା ଚାଷୀ ପ୍ରତାପ ସ୍ବାଇଁ, ମହେନ୍ଦ୍ର ଖଟେଇ , ପ୍ରମୋଦ ଆଚାର୍ଯ୍ୟ, ଧୋଇଆ ସ୍ବାଇଁ ଏବଂ ଜଗନ୍ନାଥ ମାଣ୍ଡିଆ ପ୍ରମୁଖ ଚିଠି ଲେଖି ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ଚାଷୀମାନଙ୍କ ଅଭିଯୋଗ ଅନୁଯାୟୀ ଟୋକନ୍ ବ୍ୟବସ୍ଥା ପୂର୍ବପେକ୍ଷା ସ୍ବଚ୍ଛତା ଆଣିଛି। ହେଲେ ତୃଣମୂଳର କେତେକ ଅଧିକାରୀଙ୍କ ଖାମଖିଆଲ ନୀତି ଯୋଗୁ ଏପରି ଅସୁବିଧା ହୋଇଛି। ଏହି ପ୍ରସଙ୍ଗରେ ଯୋଗାଣ ମୁଖ୍ୟାଳୟ ଅଧିକାରୀ ନେତ୍ରମଣି ପଣ୍ଡା କହିଛନ୍ତି ଯେ, ଏହି ୨ ଅଞ୍ଚଳରେ ଧାନ କ’ଣ ପାଇଁ ଉଠାଯାଇନାହିଁ, ସେ ସମ୍ପର୍କରେ ସ୍ଥାନୀୟ ଅଧିକାରୀଙ୍କଠାରୁ ରିପୋର୍ଟ ସଂଗ୍ରହ କରାଯାଇ ବିହିତ ପଦକ୍ଷେପ ନିଆଯିବ।
