ଢେଙ୍କାନାଳ ଅଫିସ, ୨୫।୪ – କୋଭିଡ୍-୧୯ ଭୂତାଣୁ ଠାବ ହୋଇଥିବା ଏକମାତ୍ର ରୋଗୀ ସୁସ୍ଥ ହୋଇ ଫେରିବା ପରେ କରୋନା ମୁକ୍ତ ହୋଇଛି ଢେଙ୍କାନାଳ ଜିଲା। ଏପ୍ରିଲ ୯ ତାରିଖ ପରଠାରୁ ଆଉ ନୂଆ ସଂକ୍ରମଣ ମାମଲା ସାମ୍ନାକୁ ଆସିନାହିଁ। ତଥାପି ବିପଦ ସମ୍ପୂର୍ଣ୍ଣ ଟଳିନାହିଁ। ସୀମାନ୍ତ ଯାଜପୁର ଜିଲାରେ କରୋନା ପ୍ରକୋପ ବଢୁଥିବାବେଳେ ସାମାନ୍ୟ ଅବହେଳା ଏଯାଏ ଗ୍ରହଣ କରାଯାଇଥିବା ସମସ୍ତ ସତର୍କତାମୂଳକ ପଦକ୍ଷେପକୁ ମାଟିରେ ମିଶାଇଦେଇପାରେ। ଏହାକୁ ହୃଦୟଙ୍ଗମ କରିଛି ଜିଲା ପ୍ରଶାସନ। ହେଲେ କେତେଜଣ ଅମାନିଆଙ୍କ ଲାଗି ଚିନ୍ତା ବଢ଼ୁଛି। ବାରମ୍ବାର ସଚେତନ କରାଯିବା ସତ୍ତ୍ୱେ ସେମାନେ ଖୋଲାମେଲାରେ ବୁଲୁଛନ୍ତି। ଏପରି ନିୟମ ଭଙ୍ଗକାରୀଙ୍କୁ ସାବାଡ଼ କରିବାକୁ ଆକ୍ସନ୍ ମୁଡ୍କୁ ଆସିଛନ୍ତି ଜିଲାପାଳ ଭୂମେଶ ଚନ୍ଦ୍ର ବେହେରା। ଶୁକ୍ରବାର ପୂର୍ବାହ୍ନରେ ଜିଲାପାଳ ସ୍ଥାନୀୟ କୁଞ୍ଜସାହୁ ଛକରେ ପହଞ୍ଚତ୍ ସେଠାରୁ ପାଦରେ ଚାଲିଚାଲି ଲକ୍ଡାଉନ୍ ନିୟମ କଡ଼ାକଡ଼ି ଭାବେ ପାଳନ କରିବାକୁ ଲୋକଙ୍କୁ ସଚେତନ କରାଇଥିଲେ। ଏଥିସହ ଅଯଥାରେ ବାଇକ୍ରେ ବୁଲୁଥିବା ଲୋକଙ୍କୁ ତାଗିଦ୍ କରିଥିଲେ। ଏକାଧିକ ଆରୋହୀ ଯାଉଥିବା ବାଇକ୍କୁ ଅଟକାଇ ଜରିମାନା ଆଦାୟ କରାଯାଇଥିଲା। ମାସ୍କ ବ୍ୟବହାର, ସାମଗ୍ରୀ କିଣାକିଣି ସମୟରେ ସାମାଜିକ ଦୂରତ୍ୱ ରଖିବା, ବାରମ୍ବାର ସାବୁନରେ ହାତ ଧୋଇବା, ପରିଚ୍ଛନ୍ନ ପ୍ରତି ଗୁରୁତ୍ୱ ଦେବା, ବିନା କାରଣରେ ଘରୁ ନ ବାହାରିବା, ବାଇକ୍ରେ ଦୁଇଜଣ ବସି ନ ଯିବା ପାଇଁ ଜିଲାପାଳ ସହରବାସୀଙ୍କୁ ନିବେଦନ କରିଛନ୍ତି। ତହସିଲଦାର ଲକ୍ଷ୍ମୀଧର ରାଉତ, ପୌର ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ, ଟାଉନ ଥାନାଧିକାରୀ ଜ୍ଞାନରଞ୍ଜନ ସାମଲ ପ୍ରମୁଖ ସଚେତନତା କାର୍ଯ୍ୟକ୍ରମରେ ସାମିଲ ହୋଇଥିଲେ।
ଏ ସମ୍ପର୍କରେ ଜିଲାପାଳ କୁହନ୍ତି, ସହରର ୯୦% ଲୋକ ଲକ୍ଡାଉନ୍ ନିୟମକୁ ମାନୁଛନ୍ତି। ସହଯୋଗ ମଧ୍ୟ କରୁଛନ୍ତି। ହେଲେ ୧୦% ଅମାନିଆଙ୍କ ଲାଗି ସଂକ୍ରମଣ ବ୍ୟାପିବା ଆଶଙ୍କା ରହିଛି। ପଡ଼ୋଶୀ ଜିଲାରେ କରୋନା ପ୍ରକୋପ ବଢୁଥିବାବେଳେ ସରକାରୀ ଗାଇଡ୍ଲାଇନ ପାଳନ କରିବାକୁ ସଚେତନ କରାଯାଉଛି। ଆଇନ ଭଙ୍ଗ ହେଉଥିବା ଜଣାପଡ଼ିଲେ ଜରିମାନା ସହ ଅମାନିଆଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି ଜିଲାପାଳ କହିଛନ୍ତି।
