ଭୁବନେଶ୍ୱର,୧୦।୧୧ବ୍ୟୁରୋ):ରାଜଧାନୀ ଭୁବନେଶ୍ୱରରେ ମା’ବାପା ନିଜ ଶିଶୁଙ୍କୁ ବିକ୍ରି କରିବା ଭଳି ସ୍ପର୍ଶକାତର ଘଟଣା ବାରମ୍ବାର ଘଟୁଛି। ମଙ୍ଗଳବାର ବଡ଼ଗଡ଼ ଥାନାଞ୍ଚଳରୁ ୩ବର୍ଷର ଜଣେ ଶିଶୁକନ୍ୟାଙ୍କୁ ଚାଇଲ୍ଡଲାଇନ୍ ଉଦ୍ଧାର କରିଥିଲା। ବୁଧବାର ଖଣ୍ଡଗିରି ଥାନା ଅଞ୍ଚଳରେ ସମାନ ଧରଣର ଆଉଏକ ଘଟଣା ସାମ୍ନାକୁ ଆସିଛି। ଶିଶୁକନ୍ୟାକୁ ୨୨ଦିନ ହୋଇଥିବାବେଳେ ମା’ବାପା ୧୦ହଜାର ଟଙ୍କାରେ ବିକ୍ରି କରିଦେଇଥିଲେ। ଚାଇଲ୍ଡ ଲାଇନ୍ ଓ ପୋଲିସ୍ର ମିଳିତ ଟିମ୍ ଚଢ଼ାଉ କରି ଏକ ଦମ୍ପତିଙ୍କଠାରୁ ଶିଶୁକନ୍ୟାଙ୍କୁ ଉଦ୍ଧାର କରିଛି। ବର୍ତ୍ତମାନ ଶିଶୁଟିର ବୟସ ୪ମାସ। ଚାଇଲ୍ଡ ଲାଇନ୍ର ଅଭିଯୋଗ ଆଧାରରେ ପୋଲିସ ଏକ ମାମଲା (ନଂ.୫୫୧/୨୦୨୨) ରୁଜୁ କରି ଘଟଣାର ତଦନ୍ତ କରୁଛି। ଶିଶୁକନ୍ୟାକୁ କିଣିଥିବା ମହିଳା ଓ ତାଙ୍କ ସ୍ବାମୀଙ୍କୁ ଥାନାରେ ପଚରାଉଚରା କରାଯାଇଥିବା ଜଣାପଡିଛି।
ସୂଚନାନୁସାରେ, ଶିଶୁକନ୍ୟାର ମା’ବାପା କଟକରେ ରୁହନ୍ତି। ସେମାନେ ଅତି ଗରିବ ହୋଇଥିବାବେଳେ କାମ କଲେ ପରିବାରରେ ଚୁଲି ଜଳେ। ଦୁଇ ଦୁଇଟି ଶିଶୁକନ୍ୟାକୁ ଚଳାଇବା ତାଙ୍କ ପାଇଁ କଷ୍ଟକର ବ୍ୟାପାର ଥିଲା। ବରମୁଣ୍ଡାର ଜଣେ ମହିଳାଙ୍କର କୌଣସି ସନ୍ତାନ ନ ଥିବାରୁ ସେ ଜଣେ ମଧ୍ୟସ୍ଥ ମାଧ୍ୟମରେ କଟକରେ ରହୁଥିବା ସେହି ବ୍ୟକ୍ତିଙ୍କ ସହ ଯୋଗାଯୋଗ କରିଥିଲେ। ଉକ୍ତ ମଧ୍ୟସ୍ଥ ଜଣକ କଟକର ସେହି ଦମ୍ପତିଙ୍କ ସହ କଥା ହୋଇ ୧୦ହଜାର ଟଙ୍କାରେ ଶିଶୁକନ୍ୟା କିଣିବାକୁ ସମସ୍ତ ପ୍ରକ୍ରିୟା ସାରିଥିଲେ। ନୋଟାରୀ ଏଗ୍ରିମେଣ୍ଟ କରି ଟଙ୍କା କାରବାର ଓ ଶିଶୁକନ୍ୟା ବିକ୍ରି ହୋଇଥିଲା। ଏଥିସହ ଶିଶୁଟିର ନକଲି ଜନ୍ମ ପ୍ରମାଣପତ୍ର ମଧ୍ୟ ପ୍ରସ୍ତୁତ କରାଯାଇଥିଲା। ଏହି ଖବର ଚାଇଲ୍ଡ ଲାଇନ ଜାଣିବା ପରେ ଖଣ୍ଡଗିରି ପୋଲିସ ସହାୟତାର ଚଢ଼ାଉ କରି ବରମୁଣ୍ଡାରୁ ଶିଶୁକନ୍ୟାକୁ ଉଦ୍ଧାର କରିଥିଲେ। ଅପରପକ୍ଷରେ ବେଆଇନ ପୋଷ୍ୟ ଗ୍ରହଣ, ଶିଶୁ ବିକ୍ରି ,ସରକାରୀ ଡକ୍ୟୁମେଣ୍ଟ ଜାଲିଆତି କରିବା ଆଇନ ଅନୁଯାୟୀ ଦଣ୍ଡନୀୟ ଅପରାଧ। ତେଣୁ ଏଭଳି କାର୍ଯ୍ୟରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ଚାଇଲ୍ଡ ଲାଇନ୍ ଅଧ୍ୟକ୍ଷ ବେଣୁଧର ସେନାପତି କହିଛନ୍ତି। ଏଥିସହ ଶିଶୁକନ୍ୟାଟିକୁ ସୁଭଦ୍ରା ମହାତ୍ମା ସେବା ସଦନରେ ରଖାଯାଇଥିବା ସେ ସୂଚନା ଦେଇଛନ୍ତି।
