ଭୁବନେଶ୍ୱର,୧୬।୭(ବ୍ୟୁରୋ): ରାଜ୍ୟରେ ତଳୁ ଉପର ଯାଏ ଦୁର୍ନୀତି ଖୁନ୍ଦି ହୋଇ ରହିଛି। କେବଳ ତଳିଆ କର୍ମଚାରୀ ଯେ ହାତଗୁଞ୍ଜା ନେଉଛନ୍ତି ତାହା ନୁହେଁ, ବଡ଼ ବାବୁମାନେ ମଧ୍ୟ ଦୁର୍ନୀତିରୁ ଦୂରରେ ନାହାନ୍ତି। ବିଜେଡି ସରକାର ପ୍ରଶାସନିକ ସ୍ବଚ୍ଛତା ଉପରେ ଗୁରୁତ୍ୱ ଦେଇଆସୁଥିବା କହୁଥିବା ବେଳେ ବାସ୍ତବ କ୍ଷେତ୍ରରେ କିନ୍ତୁ ଫଳ ଓଲଟା। ବାବୁମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ୩-ଟି କିମ୍ବା ୫-ଟିକୁ ମଧ୍ୟ ଖାତିର କରୁନାହାନ୍ତି। ୨୦୧୦ ଜାନୁୟାରୀରୁ ୨୦୧୯ ଜୁନ୍ ୩୦ ତାରିଖ ମଧ୍ୟରେ ଦୁର୍ନୀତି ଅଭିଯୋଗରେ ୨୩୬ ଜଣ ବାବୁଙ୍କ ନାମରେ ଭିଜିଲାନ୍ସ ମାମଲା ରୁଜୁ କରିଛି। ସେମାନଙ୍କ ମଧ୍ୟରେ ୯ ଜଣ ଆଇଏଏସ୍ ଅଫିସର ଥିବା ବେଳେ ୨୨୭ ଜଣ ଓଏଏସ୍ ଅଫିସର ଅଛନ୍ତି। ଏହି ୯ ଜଣ ଆଇଏଏସ୍ ଅଫିସରଙ୍କ ବିରୋଧରେ ୧୧ଟି ମାମଲ ରୁଜୁ କରାଯାଇଛି। ସେଥିରୁ ୬ଟି କେସ୍ର ଚାର୍ଜଶିଟ୍ ଭିଜିଲାନ୍ସ ଦାଖଲ କରିଥିବା ବେଳେ ୪ଟିର ତଦନ୍ତ ଜାରି ରହିଛି ଏବଂ ଜଣଙ୍କ ବିରୋଧରେ ଚୂଡ଼ାନ୍ତ ରିପୋର୍ଟ ଉପସ୍ଥାପନ କରାଯାଇଛି। କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ପ୍ରଶ୍ନ ନଂ.୬୦୫ର ଜବାବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଇଥିବା ତଥ୍ୟରୁ ଏ କଥା ସ୍ପଷ୍ଟ ହୋଇଛି। ମୁଖ୍ୟମନ୍ତ୍ରୀ କହିଛନ୍ତି ଯେ, ୨୦୧୦ ମେ ୧୧ ତାରିଖରେ ରାଜ୍ୟ ଦୁର୍ନୀତି ନିବାରଣ ସଂସ୍ଥା ତତ୍କାଳୀନ ମତ୍ସ୍ୟ ଓ ପ୍ରାଣୀସମ୍ପଦ ନିର୍ଦ୍ଦେଶକ ବଷ୍ଣୁପଦ ସେଠୀଙ୍କ ନାମରେ ଭିଜିଲାନ୍ସ ମାମଲା ରୁଜୁ କରିଥିଲା। ତେବେ ଇତିମଧ୍ୟରେ ୮ ବର୍ଷ ବିତିଯାଇଥିଲେ ସୁଦ୍ଧା ସେହି ମାମଲାର କୌଣସି ଅଗ୍ରଗତି ହୋଇପାରିନାହିଁ। ସେହିପରି ଭିଜିଲାନ୍ସ ୨୦୧୦ ଜୁନ୍ ୩୦ ତାରିଖରେ ଆଇଏଏସ୍ ଅଫିସର ଶ୍ରୀକାନ୍ତ ପୃଷ୍ଟି, ୨୦୧୦ ସେପ୍ଟେମ୍ବର ୨୯ ତାରିଖରେ ରବୀନ୍ଦ୍ର ନାଥ ଦାଶ, ୨୦୧୦ ସେପ୍ଟେମ୍ବର ୩୦ରେ ଅମ୍ବିକା ପ୍ରସାଦ ମିଶ୍ର, ୨୦୧୧ ଫେବୃୟାରୀ ୨୪ ତାରିଖରେ ଅଲେଖ ଚନ୍ଦ୍ର ପଢିଆରୀ, ୨୦୧୧ ଓ ୨୦୧୫ରେ ବିନୋଦ କୁମାର, ୨୦୧୨ ଡିସେମ୍ବର ୨୮ ତାରିଖରେ ସଞ୍ଜୀବ ରାୟ, ୨୦୧୪ ସେପ୍ଟେମ୍ବର ୩୦ ତାରିଖରେ ଦେବରାଜ ମିଶ୍ର ଏବଂ ୨୦୧୭ ଫେବୃୟାରୀ ୧୬ ଏବଂ ଏପ୍ରିଲ ୩ ତାରିଖରେ ପାର୍ଥସାରଥି ମିଶ୍ରଙ୍କ ନାମରେ ମାମଲା ରୁଜୁ ହୋଇଛି।
