ନୂଆଦିଲ୍ଲୀ/ଓ୍ବାଶିଂଟନ,୧ା୭: ଗୋସୁରକ୍ଷା ନାମରେ ଓ ଜୋର୍ଜବରଦସ୍ତ ‘ଜୟ ଶ୍ରୀରାମ’ କୁହାଇବା ଲାଗି ଭାରତରେ ଭିଡ଼ହିଂସା ବଢ଼ିବାରେ ଲାଗିଛି। ସଂଖ୍ୟାଲଘୁ ଓ ଦଳିତ ସମ୍ପ୍ରଦାୟର ଲୋକଙ୍କୁ ତଥାକଥିତ ହିନ୍ଦୁତ୍ୱବାଦୀମାନେ ଟାର୍ଗେଟ କରୁଛନ୍ତି। ଏହାକୁ ନେଇ ଦେଶରେ ରାଜନୀତି ଜୋର୍ ଧରିଥିବାବେଳେ ବିଦେଶରେ ବିକ୍ଷୋଭ ପ୍ରଦର୍ଶନ କରାଯାଉଛି। ଏହିକ୍ରମରେ ମୁସଲିମ୍ମାନଙ୍କ ଉପରେ ହେଉଥିବା ଆକ୍ରମଣ ପ୍ରତି କେନ୍ଦ୍ର ସରକାରଙ୍କ ଖାମଖିଆଲ ମନୋଭାବକୁ ନିନ୍ଦା କରି ଆମେରିକାରେ ବିକ୍ଷୋଭ ପ୍ରଦର୍ଶନ କରାଯାଇଛି। ସେହିପରି ଏଆଇଏମ୍ଆଇଏମ୍ ଅଧ୍ୟକ୍ଷ ଅସାଦୁଦ୍ଦିନ୍ ଓଓ୍ବାଇସି ଏବଂ ଦିଲ୍ଲୀ ଜାମା ମସ୍ଜିଦ୍ ସାହି ଇମାମ୍ ଇମାମ୍ ବୁଖାରୀ ରବିବାର ଭାଜପା ନେତୃତ୍ୱାଧୀନ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି।
ଭାରତରେ ବଢ଼ିଚାଲିଥିବା ଭିଡ଼ହିଂସା ପ୍ରତିବାଦରେ ଆମେରିକାର ଶିକାଗୋ ଓ ଗ୍ରେଟର ବୋଷ୍ଟନରେ ଶତାଧିକ ଲୋକ ବିକ୍ଷୋଭ ପ୍ରଦର୍ଶନ କରିଛନ୍ତି। ଭିଡ଼ହିଂସା ଏବଂ ଘୃଣା ଅପରାଧ ବନ୍ଦକରିବା ପାଇଁ ତୁରନ୍ତ ପଦକ୍ଷେପ ନେବା ସହ ଆକ୍ରମଣର ଶିକାର ହୋଇଥିବା ବ୍ୟକ୍ତି ଓ ପୀଡ଼ିତଙ୍କ ପରିବାରକୁ ନ୍ୟାୟ ପ୍ରଦାନ କରିବାକୁ ସେମାନେ ଦାବି କରିଛନ୍ତି। ଭାରତୀୟ ବଂଶୋଦ୍ଭବ, ଦକ୍ଷିଣ ଏସୀୟ ଓ ଆମେରିକୀୟଙ୍କ ସମେତ ବିଭିନ୍ନ ସଙ୍ଗଠନର ପ୍ରତିନିଧି ଏହି ବିକ୍ଷୋଭରେ ସାମିଲ ହୋଇଥିଲେ। ସେମାନେ ପ୍ଲାକାର୍ଡ ଧରି ବିଭିନ୍ନ ସ୍ଲୋଗାନ ଦେଇ ଶୋଭାଯାତ୍ରା କରିଥିଲେ। କେତେଜଣଙ୍କ ପ୍ଲାକାର୍ଡରେ ଲେଖାଥିଲା, ‘ଅଖ୍ଲାକ୍, ପେହଲୁ, ଅଫ୍ରାଜୁଲ, ଜୁନୈଦ୍, ତବରେଜ୍। ତୁମ ପାଳି ଆସିବା ପୂର୍ବରୁ ଏହାକୁ ବନ୍ଦ କର।’
‘କେନ୍ଦ୍ର ସରକାର ନୀରବଦ୍ରଷ୍ଟା’
ଗୋବଂଶକୁ ସୁରକ୍ଷା ଦେବା ଆଳରେ ମୁସଲମାନ୍ ସମ୍ପ୍ରଦାୟର ଲୋକଙ୍କୁ ହତ୍ୟା କରାଯାଉଥିବାବେଳେ କେନ୍ଦ୍ରର ଭାଜପା ନେତୃତ୍ୱାଧୀନ ଏନ୍ଡିଏ ସରକାର ନୀରବଦ୍ରଷ୍ଟା ସାଜିଛନ୍ତି ବୋଲି ରବିବାର ଦିଲ୍ଲୀ ଜାମା ମସ୍ଜିଦ୍ର ଇମାମ ବୁଖାରୀ ସମାଲୋଚନା କରିଛନ୍ତି।
ସାହି ଇମାମ୍ଙ୍କ କାର୍ଯ୍ୟାଳୟ ପକ୍ଷରୁ ଜାରି ଏକ ବିବୃତିରେ କୁହାଯାଇଛି ଯେ, ମୁସଲିମ୍ମାନେ ସରକାରଙ୍କ ଭେଦଭାବପୂର୍ଣ୍ଣ ମନୋଭାବର ଶିକାର ହେଉଛନ୍ତି। ଜଣେ ଭାରତୀୟ ମୁସଲମାନ ପ୍ରତିନିଧି ନିଜ ଅସ୍ତିତ୍ୱ ବଞ୍ଚାଇବା ପାଇଁ ସଂଘର୍ଷ କରୁଛି। ତାକୁ ଧମକ ଦେଇ ଦମନ ଓ ଆତଙ୍କିତ କରାଯାଉଛି। ଏଥିଯୋଗୁ ସେମାନଙ୍କ ଧୈର୍ଯ୍ୟର ସୀମା ଟପିଗଲାଣି। ଆକ୍ରମଣ ରୋକିବା ପାଇଁ କେନ୍ଦ୍ର ସରକାର କିଛି କାର୍ଯ୍ୟାନୁଷ୍ଠାନ ନେଉ ନ ଥିବାରୁ ଲୋକେ ଆଇନକୁ ଉପହାସ କରୁଛନ୍ତି।
