ଚଳିତ ଅପେରା ସିଜନରେ ନିଜ ନିଜ ନାଟକକୁ ଶତ ପ୍ରତିଶତ ଜଷ୍ଟିସ ଦେବାକୁ କେବଳ ପାର୍ଟିରେ ପ୍ରୋପ୍ରାଇଟର ନୁହନ୍ତି, କଳାକାରମାନେ ଅଣ୍ଟା ଭିଡ଼ିଛନ୍ତି। ନିକଟରେ ଶେଷ ହୋଇଛି ବେଲପାହାଡ଼ ଦଶହରା ମହୋତ୍ସବ। ଏହି ଅପେରା ଲଢ଼େଇରେ ଦୁଇଟି ପାର୍ଟି-ନବଗଠିତ ତଥା ବଙ୍କିମ ସ୍ବାଇଁଙ୍କ ଦ୍ୱାରା ପରିଚାଳିତ ସୂର୍ଯ୍ୟମହଲ ଏବଂ ଅପେରା ଜଗତର ଅନ୍ୟତମ ଆଗଧାଡିର ପାର୍ଟି ତୁଳସୀ ଗଣନାଟ୍ୟ ମୁହଁାମୁହିଁ ହୋଇଥିଲେ। ଦୁଇ ପାର୍ଟି ଦ୍ୱାରା ପରିବେଷିତ ନାଟକଗୁଡ଼ିକ ଯାତ୍ରାପ୍ରେମୀଙ୍କୁ ଭରପୂର ଏଣ୍ଟରଟେନମେଣ୍ଟ ଯୋଗାଇଥିଲା। ବିଶେଷଭାବରେ ଜଲିଉଡ୍ର ନିଆରା ଅଭିନେତା ତଥା ଅପେରା ସୂର୍ଯ୍ୟମନ୍ଦିରର ଷ୍ଟାର ଆକ୍ଟର ବିନୋଦ ନାଥ ଏବଂ ତୁଳସୀର ରୋମାଣ୍ଟିକ ନାୟକ ସତ୍ୟ ସେଠାରେ ଆଲୋଚନାର କେନ୍ଦ୍ରବିନ୍ଦୁ ସାଜିଥିଲେ। କେବଳ ଅତ୍ୟାଧୁନିକ ସାଜସଜ୍ଜାରେ ସଜ୍ଜିତ ତୁଳସୀ ଗଣନାଟ୍ୟ ନୁହେଁ ହାଇବଜେଟରେ ନବଗଠିତ ସୂର୍ଯ୍ୟମନ୍ଦିରର ମେଲୋଡି ଏବଂ ଆଙ୍କରିଂ ମଧ୍ୟ କୌଣସି ଗୁଣରେ କମ୍ ନ ଥିଲା। ଏହି ପାଞ୍ଚ ଦିନବ୍ୟାପୀ ଲଢ଼େଇରେ ସୂର୍ଯ୍ୟମନ୍ଦିର ପରିବେଷିତ ନାଟକ ‘ମାୟାବିନୀ ମୌସୁମୀ’, ‘ପୁଅ ଯିବ ଶାଶୁଘର’, ଅନୁସନ୍ଧାନ ନାଟକ ‘କାହାଣୀ କହିବ ସୂର୍ଯ୍ୟମନ୍ଦିର’ ଏବଂ ‘ଭିତିରି କଥା’ରେ ବିନୋଦଙ୍କ ଭୂମିକାକୁ ଦର୍ଶକ ବେଶ୍ ପ୍ରଶଂସା କରୁଥିବାର ଦେଖିବାକୁ ମିଳିଥିଲା। ଅପରପକ୍ଷରେ ତୁଳସୀ ଗଣନାଟ୍ୟ ପରିବେଷିତ ନାଟକ ‘ସାବିତ୍ରୀ କରିବ ସ୍ବାମୀ ନିଲାମ’, ‘ହସୁଛି କେବଳ କାନ୍ଦିବା ପାଇଁ’, ‘ଲକ୍ଷେ ପୁଅ ନଷ୍ଟ ତୋରି ପାଇଁ’, ‘ଆଖିର ସପନ ଲୁହରେ ଶେଷ’ ଏବଂ ‘କହିଦେଲେ କଥା ସରିଯିବ’ ମଧ୍ୟ ଦର୍ଶକଙ୍କ ପ୍ରଶଂସା ସାଉଁଟିବାରେ ସକ୍ଷମ ହୋଇଥିଲା।
