ଢେଙ୍କାନାଳ ଅଫିସ, ୧୫।୧୧-ଢେଙ୍କାନାଳ ସଦର ବ୍ଲକ ବେଲଟିକିରି ଗ୍ରାମରେ ବଜବଜିଆ ରୋଗ ଆତଙ୍କ ସମ୍ପର୍କିତ ଖବର ‘ଧରିତ୍ରୀ’ରେ ପ୍ରକାଶ ପାଇବା ପରେ ପ୍ରାଣୀଧନ ଚିକିତ୍ସା ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଛି। ଗୁରୁବାର ବିଭାଗର ଏକ ଟିମ୍ ଗ୍ରାମରେ ପହଞ୍ଚତ୍ ଗୋରୁଙ୍କ ସ୍ବାସ୍ଥ୍ୟ ପରୀକ୍ଷା କରିବା ସହ ପ୍ରତିଷେଧକ ଦେଇଛନ୍ତି।
ଅଞ୍ଚଳରେ ୧୦ରୁ ଊର୍ଦ୍ଧ୍ୱ ଗୋରୁ ରୋଗାକ୍ରାନ୍ତ ହୋଇଛନ୍ତି। ଏଥିସହ ଏକ ବାଛୁରିର ମୃତ୍ୟୁ ଘଟିଛି। ବଜବଜିଆ ରୋଗରେ ଗୋରୁ ଆକ୍ରାନ୍ତ ହୋଇଥିବା ଗୋ-ପାଳକମାନେ ଅଭିଯୋଗ ଆଣିଥିଲେ। ଅଞ୍ଚଳରେ ପ୍ରାଣୀଧନ ଚିକିତ୍ସା କେନ୍ଦ୍ର ରହିଛି। ହେଲେ ପ୍ରାଣୀଧନ ନିରୀକ୍ଷକ ନାହାନ୍ତି। ଫଳରେ ଉଚିତ୍ ସମୟରେ ରୋଗ ନିରୂପଣ କରାଯାଇପାରୁ ନାହିଁ। ଗୋରୁମାନେ ରୋଗାକ୍ରାନ୍ତ ହୋଇ ପ୍ରାଣ ହରାଉଛନ୍ତି। ଏହାକୁ ନେଇ ଗୋ-ପାଳକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଏ ନେଇ ଖବର ପ୍ରକାଶିତ ହେବାପରେ ଗୁରୁବାର ସକାଳେ ପ୍ରାଣୀ ଚିକିତ୍ସକ ଦଳ ଗ୍ରାମରେ ପହଞ୍ଚତ୍ ପରିସ୍ଥିତି ଅନୁଧ୍ୟାନ କରିଛନ୍ତି।
ପ୍ରାଣୀଧନ ଚିକିତ୍ସାଳୟର ଉପ ନିର୍ଦ୍ଦେଶକ ଡା. ବିଷ୍ଣୁ ଚରଣ ସ୍ବାଇଁ, କାଇମାଟି ପ୍ରାଣୀଧନ ଚିକିତ୍ସକ ଡା. ମିନତି ବେହେରା, ଅତିରିକ୍ତ ପ୍ରାଣୀଧନ ଚିକିତ୍ସକ ଡା. ବିଜ୍ଞା ବେଦନ୍ତିକା, ପ୍ରାଣୀଧନ ନିରୀକ୍ଷକ ବିଦ୍ୟାଧର ବିଶ୍ୱାଳ, ସନ୍ତୋଷ ସାମନ୍ତ ପ୍ରମୁଖ ଆକ୍ରାନ୍ତ ଗୋରୁଙ୍କ ଚିକିତ୍ସା କରିଥିଲେ। ତେବେ ଏହା ବଜବଜିଆ ରୋଗ ନୁହେଁ ବୋଲି ଡାକ୍ତରମାନେ କହିଛନ୍ତି। ସେହିପରି ପେଟ ରୋଗ ଯୋଗୁ ବାଛୁରିର ମୃତ୍ୟୁ ଘଟିଥିବା ସୂଚନା ଦିଆଯାଇଛି। ରୋଗକୁ ନେଇ କଳ୍ପନାଜଳ୍ପନା ଲାଗି ରହିଥିବାବେଳେ ଗୋରୁଙ୍କ ଟିକାକରଣ କରାଯାଇଛି। ଏଥିସହ ବଜବଜିଆ ରୋଗ ସମ୍ପର୍କରେ ଚାଷୀଙ୍କୁ ସଚେତନ କରାଯାଇଛି।
