ଲଣ୍ଡନ,୧୪।୭- ୨୦୧୯ ବିଶ୍ୱକପ୍ ସେମିଫାଇନାଲରୁ ବାଦ୍ ପଡ଼ିବା ପରେ ଭାରତୀୟ ଦଳରେ ସୃଷ୍ଟି ହୋଇଥିବା ଫାଟ୍ ସମ୍ପର୍କରେ ପ୍ରବଳ ଆଲୋଚନା ଚାଲିଛି। ଭାରତୀୟ ଦଳ ବହୁଳ ଭାବେ ଅଧିନାୟକ ବିରାଟ କୋହଲି ଓ ଉପ ଅଧିନାୟକ ରୋହିତ ଶର୍ମାଙ୍କ ଉପରେ ନିର୍ଭରଶୀଳ। ଏହା ଦର୍ଶାଉଛି ବିଶ୍ୱକପ୍ରେ ଭାରତୀୟ ଦଳର ଅଭିଯାନ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଦଳର ନେତୃତ୍ୱକୁ ନେଇ ବିବାଦ ଚାଲିଥିବା ସମ୍ପର୍କରେ ମଧ୍ୟ ଆଲୋଚନା କରିବ। ବୋର୍ଡର ଜଣେ ସଦସ୍ୟ କହିଛନ୍ତି, ଗୋଟିଏ ଟୁର୍ନାମେଣ୍ଟ ଶେଷ ହେବା ପରେ ତୁରନ୍ତ ପରବର୍ତ୍ତୀ ଇଭେଣ୍ଟ ଲାଗି ପ୍ରସ୍ତୁତ ହେବା ବଡ଼ ଦଳର ପରିଚୟ। ଏଣୁ ଭାରତୀୟ ଦଳକୁ ୨୦୨୦ରେ ଅଷ୍ଟ୍ରେଲିଆରେ ହେବାକୁ ଥିବା ଟି୨୦ ବିଶ୍ୱକପ୍କୁ ଦୃଷ୍ଟିରେ ରଖି କିଛି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇପାରେ। ରୋହିତ ଶର୍ମାଙ୍କୁ ଦିନିକିଆ ଦଳର ନେତୃତ୍ୱ ଦିଆଯିବା ମଧ୍ୟ ଏକ ବିକଳ୍ପ। କୋହଲି ଟେଷ୍ଟ ଓ ଟି୨୦ ଦଳର ନେତୃତ୍ୱ ସମ୍ଭାଳିବେ। ରୋହିତଙ୍କୁ ବଡ଼ ଦାୟିତ୍ୱ ଦେବା ଲାଗି ଏହା ଉପଯୁକ୍ତ ସମୟ। ବର୍ତ୍ତମାନ ଦଳର ଅଧିନାୟକ ଓ ମ୍ୟାନେଜମେଣ୍ଟକୁ ସମର୍ଥନ ରହିଛି। କିନ୍ତୁ ୨୦୨୩ ବିଶ୍ୱକପ୍କୁ ଦୃଷ୍ଟିରେ ରଖି ଯୋଜନା ପ୍ରସ୍ତୁତ କରିବାକୁ ପଡ଼ିବ। କିନ୍ତୁ ବିନୋଦ ରାଇ କହିଛନ୍ତି, ରିଭ୍ୟୁ ବୈଠକରେ ଭାରତୀୟ ଦଳର ପ୍ରଦର୍ଶନକୁ ମୂଲ୍ୟାଙ୍କନ କରାଯିବ। ଆଉ କିଛି ବିବାଦ ସମ୍ପର୍କରେ ମଧ୍ୟ ଆଲୋଚନା କରାଯିବ।
