କେନ୍ଦୁଝର,୬।୫(ସ୍ବ.ପ୍ର.)- କେନ୍ଦୁଝର ଜିଲା ପଣ୍ତାପଡ଼ା ଥାନା ଅଧୀନ ପଟାବାରୀ ଗ୍ରାମରେ ମଙ୍ଗଳବାର ବିଷାକ୍ତ ଛତୁ ଖାଇ ଗୋଟିଏ ପରିବାରର ୪ଜଣ ଅସୁସ୍ଥ ହୋଇଛନ୍ତି। ଚିକିତ୍ସା ପାଇଁ ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ସୂଚନା ଅନୁଯାୟୀ, ପଟାବାରୀ ଗ୍ରାମର ଜଗବନ୍ଧୁ ପଲେଇ ନିକଟସ୍ଥ ଜଙ୍ଗଲରୁ ବିଷାକ୍ତ ମଣ୍ତା ଛତୁ ଆଣିଥିଲେ। ସ୍ତ୍ରୀ ଚିନିମିନି, ଝିଅ ମୀରା ଓ ବୋହୂ ସୁଷମାଙ୍କ ସହ ସେ ମଧ୍ୟାହ୍ନଭୋଜନରେ ଛତୁ ତରକାରୀ କରି ଖାଇଥିଲେ। ପରେ ସମସ୍ତଙ୍କର ମୁଣ୍ତ ବୁଲାଇବା ସହ ବାନ୍ତି ହୋଇ ଗୁରୁତର ହୋଇ ପଡ଼ିଥିଲେ। ଅପରାହ୍ନରେ ଗ୍ରାମବାସୀ ସେମାନଙ୍କୁ ୧୦୮ ଆମ୍ବୁଲାନ୍ସ ଯୋଗେ ଡାକ୍ତରଖାନାରେ ଭର୍ତ୍ତି କରିଥିଲେ। ଚିକିତ୍ସା ପରେ ସେମାନଙ୍କ ଅବସ୍ଥା ଭଲ ଥିବା ଡାକ୍ତରଖାନା ପକ୍ଷରୁ ଜଣାପଡିଛି।
