ଲାମଜୁଙ୍ଗ: ନେପାଳର ମାନାଙ୍ଗ ଜିଲାରେ ଏବେ ନୂତନ ଭାବେ ସନ୍ଧାନ ମିଳିଥିବା କାଜିନ ସାରା ହ୍ରଦ ବିଶ୍ୱର ଉଚ୍ଚତମ ହ୍ରଦ ବୋଲି କୁହାଯାଉଛି। ଏହା ପୂର୍ବରୁ ସେହି ଜିଲାର ତିଲିଚୋକ ହ୍ରଦ ଉଚ୍ଚତମ ଥିଲା। ୪ କିଲୋମିଟର ଲମ୍ବ , ୧.୨ କିଲୋମିଟର ଚଉଡା ଓ ୨୦୦ ମିଟର ଗଭୀର ତିଲିଚୋକ ହ୍ରଦ ହିମାଳୟର ୪,୯୧୯ ମିଟର ଉଚ୍ଚରେ ଅଛି । ହିମାଳୟାନ ଟାଇମ୍ସର ରିପୋର୍ଟ ଅନୁଯାୟୀ କାଜିନ ସାରା ହ୍ରଦ ୫,୨୦୦ ମିଟର ଉଚ୍ଚରେ ଥିବାରୁ ଏହା ଏବେ ବିଶ୍ୱର ଉଚ୍ଚତମ ହ୍ରଦ । ମାନାଙ୍ଗର ଚାମେ ନଗରନିଗମର ସିଙ୍ଗାରଖର୍କାରେ ଅବସ୍ଥିତ ଏହିି ହ୍ରଦଟି କିଛି ମାସ ପୂର୍ବରୁ ପର୍ବତାରୋହୀମାନଙ୍କ ଦ୍ୱାରା ଠାବ କରାଯାଇଥିଲା। ଏହାର ଲମ୍ବ ୧,୫୦୦ ମିଟର ଓ ଚଉଡା ୬୦୦ ମିଟର। ହିମାଳୟରୁ ବରଫ ତରଳି ସୃଷ୍ଟି ହୋଇଥିବା ଏହି ହ୍ରଦକୁ ସ୍ଥାନୀୟ ଲୋକମାନେ ‘ଶିିଙ୍ଗାର’ କହନ୍ତି। । ମାନାଙ୍ଗ ଜିଲା ମୁଖ୍ୟାଳୟ ଚାମେଠାରୁ ୨୪ କିଲୋମିଟର ଦୂରରେ ଥିବା ଏହି ହ୍ରଦ ପାଖରେ ପହଞ୍ଚତ୍ବା ପାଇଁ ୧୮ ଘଣ୍ଟା ପାହାଡ଼ ଚଢିବାକୁ ପଡେ। ଜୁଲାଇ ଓ ନଭେମ୍ବର ମାସରେ ହ୍ରଦ ପାଖକୁ ଯିବାର ଉପଯୁକ୍ତ ସମୟ।
