ଚେନ୍ନାଇ,୩୧ା୩(ପି.ଟି.): କରୋନା ମୁକାବିଲା ଲାଗି ଦୁବାଇର ସ୍ବାସ୍ଥ୍ୟ ବିଭାଗ କର୍ତ୍ତୃପକ୍ଷ ଶନିବାର ନଇଫ୍ ସହରରେ ଘରକୁ ଘର ବୁଲି ତଥ୍ୟ ସଂଗ୍ରହ କରୁଥିବାବେଳେ ସେଠାରୁ କେରଳ ଫେରିଥିବା ଯାତ୍ରୀ ସଂକ୍ରମଣର ବାହକ ହୋଇଥିବା ରାଜ୍ୟର ସ୍ବାସ୍ଥ୍ୟ ଅଧିକାରୀମାନେ ଆଶଙ୍କା ବ୍ୟକ୍ତ କରୁଛନ୍ତି। ଗତ କିଛିଦିନ ମଧ୍ୟରେ ସୌଦିରୁ କେରଳର କସରଗୋଡ ଜିଲାକୁ ଫେରିଥିବା ଲୋକଙ୍କ ମଧ୍ୟରୁ ୭୦ ପ୍ରତିଶତ ଉପସାଗରୀୟ ରାଷ୍ଟ୍ରର ଜନଗହଳିପୂର୍ଣ୍ଣ ସ୍ଥାନରେ ରହୁଥିଲେ। କସରଗୋଡ ଜିଲାକୁ ଫେରିଥିବା ୩୯ ଜଣଙ୍କ ମଧ୍ୟରୁ ୩୪ ଜଣଙ୍କୁ ‘ହାଇ ରିସ୍କ’ ବର୍ଗରେ ରଖାଯାଇଛି। ସେମାନଙ୍କର ନମୁନା ପରୀକ୍ଷା କରାଯାଉଛି। ସୂଚନାଯୋଗ୍ୟ, ଫେବୃୟାରୀ ଓ ମାର୍ଚ୍ଚ ପ୍ରଥମ ଭାଗରେ ଉପସାଗରୀୟ ରାଷ୍ଟ୍ରରୁ ଫେରିଥିବା ଅଧିକାଂଶ ଭାରତୀୟଙ୍କର ବିମାନବନ୍ଦରରେ ଯାଞ୍ଚ ହୋଇ ନ ଥିଲା କି ସେମାନଙ୍କୁ କ୍ୱାରାଣ୍ଟାଇନରେ ରହିବା ପାଇଁ ପରାମର୍ଶ ଦିଆଯାଇ ନ ଥିଲା। ସେତେବେଳେ କେବଳ ଚାଇନା, ଦକ୍ଷିଣ କୋରିଆ, ଇରାନ, ସ୍ପେନ୍, ଇଟାଲୀ ଓ ଜର୍ମାନୀ ଫେରନ୍ତାଙ୍କ ଉପରେ ନଜର ରଖାଯାଇଥିଲା। ଫଳରେ ଦୁବାଇ ଓ ସୌଦି ଆରବ ଫେରନ୍ତା ଯାଞ୍ଚରୁ ଖସିଯାଇଥିଲେ। ଫଳରେ ପୂର୍ବ ୧୦ ଦିନରେ ଉପସାଗରୀୟ ଦେଶରୁ ଫେରିଥିବା ଲୋକଙ୍କଠାରେ ସଂକ୍ରମଣ ମାତ୍ରା ଅଧିକ ଦେଖିବାକୁ ମିଳିଛି।
ଉଦାହରଣ ସ୍ବରୂପ ମହାରାଷ୍ଟ୍ରର ଏକ ୪୦ ଜଣିଆ ଦଳ ୬ ଦିନ ଦୁବାଇ ଓ ଆବୁଧାବୀ ଭ୍ରମଣରେ ଯାଇଥିଲେ। ସେମାନଙ୍କ ମଧ୍ୟରୁ ୧୫ ଜଣଙ୍କୁ କରୋନା ଭୂତାଣୁ ସଂକ୍ରମିତ ହୋଇଥିବା ପରୀକ୍ଷାରୁ ଜଣାପଡିଛି। କେରଳର କସରଗୋଡ ଗୋଟିଏ ଦିନରେ କୋଭିଡ୍-୧୯ର ସବୁଠୁ ସଂକ୍ରମଣ ସ୍ଥାନ ପାଲଟିଯାଇଛି।
