ଭୁବନେଶ୍ୱର,୨୩।୮(ବ୍ୟୁରୋ): କ୍ୟାପିଟାଲ୍ ରିଜନ୍ ଅର୍ବାନ୍ ଟ୍ରାନ୍ସପୋର୍ଟ (କ୍ରୁଟ) ବିନା ଟିକେଟ୍ ଯାତ୍ରୀଙ୍କ ଉପରେ ଆସନ୍ତା ୧ ସେପ୍ଟେମ୍ବରରୁ ଜରିମାନା ଜାରି କରିବ। ଯାତ୍ରୀମାନେ ଟିକେଟ୍ ନିରୀକ୍ଷକ ଦଳ ସହ ସହଯୋଗ କରନ୍ତୁ ଏବଂ ଉପଯୁକ୍ତ ଟିକେଟ୍ ଓ ମାସିକ ପାସ୍ ଯାତ୍ରା ସମୟରେ ବ୍ୟବହାର କରନ୍ତୁ ବୋଲି କ୍ରୁଟ ପକ୍ଷରୁ ଗୁରୁବାର ସୂଚନା ଦିଆଯାଇଛି। କ୍ରୁଟର ପ୍ରଶାସନିକ ଅଧିକାରୀ ଦୀପ୍ତି ମହାପାତ୍ର କହିଛନ୍ତି, କେତେଜଣ ଯାତ୍ରୀ ‘ମୋ ବସ୍’ରେ ଯାତ୍ରା ସମୟରେ ଉପଯୁକ୍ତ ମୂଲ୍ୟର ଟିକେଟ୍ କରୁନାହାନ୍ତି, ଫଳରେ ରାଜକୋଷର ରାଜସ୍ବ କ୍ଷତି ହେଉଛି। ଯାତ୍ରୀଙ୍କ ଅନୁଶାସନ ପାଇଁ ଆଗାମୀଦିନରେ ଟିକେଟ୍ ନିରୀକ୍ଷଣର ମାତ୍ରା ବଢିବ ଏବଂ ବିନା ଟିକେଟ୍ ଯାତ୍ରୀଙ୍କୁ ଦଣ୍ଡିତ କରାଯିବ। ଯଦି କେହି ଏପରି କାର୍ଯ୍ୟ କରୁଥିବାର ଦେଖିବାର ମିଳେ ତାହା ହେଲେ ସେମାନଙ୍କଠାରୁ ଜରିମାନା ଆଦାୟ କରାଯିବ। ଏ ସମ୍ବନ୍ଧିତ ନିୟମର ପ୍ରଚାର ଓ ପ୍ରସାର ପାଇଁ ବସ୍ ଭିତରେ ଏବଂ ବାହାରେ ଉପଯୁକ୍ତ ସୂଚନାର ବ୍ୟବସ୍ଥା କରାଯିବ। ଏଥିରେ ଟିଭି, ଖବରକାଗଜ ଓ ସୋସିଆଲ୍ ମିଡିଆର ବ୍ୟବହାର କରାଯିବ। ଧାରା ୧୨୪ ଓ ୧୭୮, ୧୭୯(୧), ୧୭୯(୨) ମୋଟର ଆକ୍ଟ ୧୯୮୮ ଅନୁସାରେ ଯେକୌଣସି ଯାତ୍ରୀ ବିନା ଟିକେଟ୍ କିମ୍ବା ପାସ୍ରେ ଯାତ୍ରା କଲେ ନ୍ୟାୟଗତ ଭଡାର ୧୦ ଗୁଣା ଅଥବା ୫ଶହ ଟଙ୍କା ଜରିମାନା ଦେବେ। ଅସହଯୋଗ କଲେ କିମ୍ବା କାର୍ଯ୍ୟରତ ନିରୀକ୍ଷକ ଦଳର ପ୍ରତିରୋଧ କଲେ ମଧ୍ୟ ୫ ଶହ ଟଙ୍କା ପର୍ଯ୍ୟନ୍ତ ଜରିମାନା ଦେବାକୁ ପଡିବ।
