ବସ୍ତା/ରୂପ୍ସା,୨୪।୮(ଡି.ଏନ.ଏ./ସ୍ବ.ପ୍ର.): ବାଲେଶ୍ୱର ଜିଲା ଅଧୀନ ସଦର, ରୂପ୍ସା, ବସ୍ତା, ସିଂଲା ଓ ବାଲିଆପାଳ ଥାନା ଅଞ୍ଚଳରୁ ଲଗାତର ବିଦ୍ୟୁତ୍ ତାର ଚୋରି ଘଟଣାରେ ଏକ ର଼୍ୟାକେଟ କାମ କରୁଥିବା ଜଣାପଡିଛି। ବସ୍ତା ଏସ୍ଡ଼ିପିଓ ରଣଜିତ୍ ପୃଷ୍ଟି, ଆଇଆଇସି ଧନେଶ୍ୱର ସାହୁ ଓ ତଦନ୍ତ ଅଧିକାରୀ ଏସ୍ଆଇ ପ୍ରଶାନ୍ତ କୁମାର ପାଣି ପ୍ରମୁଖ ଏହି ର଼୍ୟାକେଟ୍ ଠାବ କରି ଶନିବାର ୪ଜଣ ଅଭିଯୁକ୍ତଙ୍କୁ ଗିରଫ କରିଛନ୍ତି। ଗିରଫ ଅଭିଯୁକ୍ତ ହେଲେ ମୟୂରଭଞ୍ଜ ଜିଲା ରାସଗୋବିନ୍ଦପୁର ଥାନା ମଣ୍ଡାଭାଟି ଗ୍ରାମର ନିଗମାନନ୍ଦ ବେହେରା, ଖୁଣ୍ଟା ଗ୍ରାମର ବାପୁନ ବିନ୍ଧାଣି, ଗୁଡ଼ିଖଣିଆ ଗ୍ରାମର ସୁନୀଲ ହେମ୍ବ୍ରମ ଏବଂ ସିଂଲା ଥାନା ଲଙ୍ଗଳେଶ୍ୱରର ସେକ ଉଷମାନ। ସେମାନଙ୍କଠାରୁ ୩ଲକ୍ଷ ୫୭ହଜାର ଟଙ୍କାର ଚୋରି ବିଦ୍ୟୁତ ତାର ସହ ଚୋରି କାର୍ଯ୍ୟରେ ବ୍ୟବହୃତ ଏକ ସ୍କର୍ପିଓ (ନଂ. ଓଆର୍୦୧କେ-୬୫୬୪) ସହ ୩ଟି ମୋବାଇଲ ଜବତ ହୋଇଛି। ଏନେଇ ଶନିବାର ବସ୍ତା ଥାନାରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ଡ଼ିପିଓ ପୃଷ୍ଟି, ଆଇଆଇସି ଧନେଶ୍ୱର ସାହୁ ଗଣମାଧ୍ୟମକୁ ସୂଚନା ଦେଇଛନ୍ତି। ଗିରଫ ଅଭିଯୁକ୍ତଙ୍କ ବିରୋଧରେ ଧାରା ୩୭୯, ୪୧୧ ଓ ୩୪ ଆଇପିସିରେ ମାମଲା ରୁଜୁ କରାଯାଇ କୋଟର୍ର୍ଚାଲାଣ କରାଯାଇଛି।
୬୦ନଂ. ଜାତୀୟ ରାଜପଥରେ ଥିବା ୩୩କେଭି ବିଦ୍ୟୁତ୍ ଲାଇନ୍ର ଫୁଲାଡ଼ିଠାରୁ ରାଜଘାଟ ପର୍ଯ୍ୟନ୍ତ ଏବଂ ଅନ୍ୟ ଅଞ୍ଚଳରୁ ୩୦ଲକ୍ଷରୁ ଊର୍ଦ୍ଧ୍ୱ ଟଙ୍କାର ବିଦ୍ୟୁତ୍ ତାର ଚୋରି ହୋଇଥିବା ନେଇ ବିଭାଗୀୟ ଜେଇ ଓ ଠିକାଦାର ଥାନାରେ ଅଭିଯୋଗ କରିଥିଲେ। ଏ ନେଇ ବସ୍ତା ଥାନାରେ ୪ଟି, ସଦର ଥାନାରେ ଗୋଟିଏ ଏବଂ ସିଂଲା ଥାନାରେ ଗୋଟିଏ ମାମଲା ରୁଜୁ କରି ପୋଲିସ ତଦନ୍ତ ଜାରି ରଖିଥିଲା। ଚୋର ଗ୍ୟାଙ୍ଗକୁ ଧରିବା ପାଇଁ ପୋଲିସ ଜାଲ ବିଛାଇଥିଲା। ପୂର୍ବ ଯୋଜନା ମୁତାବକ ଲଙ୍ଗଳେଶ୍ୱରର ସେକ ସୁଲେମାନଙ୍କ କବାଡ଼ିଆ ଗୋଦାମରେ ଅତର୍କିତ ଚଢ଼ାଉ କରାଯାଇ ଅଭିଯୁକ୍ତଙ୍କୁ ଗିରଫ କରାଯାଇଥିଲା। ଚୋରି ବିଦ୍ୟୁତ ତାର ସବୁ କବାଡ଼ିଆ ମାଧ୍ୟମରେ ବିକ୍ରି କରାଯାଉଥିଲା ବୋଲି ପୋଲିସ କହିଛି। ଏହି ଗ୍ୟାଙ୍ଗରେ ଅନ୍ୟ ୭/୮ ଜଣ ସହଯୋଗୀ ସମ୍ପୃକ୍ତ ଥିବାରୁ ସେମାନଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ଏସ୍ଡ଼ିପିଓ କହିଛନ୍ତି। ଏହି ମାମଲାରେ ଜୁନ୍ ୭ ତାରିଖରେ ବସ୍ତା ଥାନା ପୋଲିସ ଚଢ଼ାଉ କରି ମହାଦେବସରାଇ ଗ୍ରାମର ଅଭିଯୁକ୍ତ ଶଙ୍କର ଦେହୁରୀ ଓ ମାଛିଆ ଗ୍ରାମର ଭ୍ୟାନ୍ ଡ୍ରାଇଭର ସେକ ଓକିଲଙ୍କୁ ଗିରଫ କରିଥିଲା। ଚୋରିରେ ବ୍ୟବହୃତ ଏକ ଭ୍ୟାନ୍ ସହ ୯ ସ୍ପାନ ବିଦ୍ୟୁତ୍ ତାର ଜବତ ହୋଇଥିଲା। ତେବେ ମୁଖ୍ୟ ଅଭିଯୁକ୍ତ କବାଡ଼ି ଗୋଦାମ ମାଲିକ ଫେରାର ହୋଇଯାଇଥିବା ପୋଲିସ ପକ୍ଷରୁ କୁହାଯାଇଛି।
