ବିତ୍ତୀୟ ନିଅଣ୍ଟ ହାସଲ ଏବେ ବଡ଼ ଚ୍ୟାଲେଞ୍ଜ
7:46 amApril 28, 2020 / 21

ମୁମ୍ବାଇ,୨୮।୪: ଚଳିତ ଆର୍ଥତ୍କ ବର୍ଷରେ ଧାର୍ଯ୍ୟ ବିତ୍ତୀୟ ନିଅଣ୍ଟ ଲକ୍ଷ୍ୟ ହାସଲ କରିବା ବଡ଼ ଚ୍ୟାଲେଞ୍ଜ ହେବ। ମନେଟାଇଜେଶନ ନେଇ କେନ୍ଦ୍ରୀୟ ବ୍ୟାଙ୍କ ବର୍ତ୍ତମାନ କୌଣସି ନିଷ୍ପତ୍ତି ନେଇ ନ ଥିବା ବୋଲି ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସ କହିଛନ୍ତି। କୋଭିଡ୍‌-୧୯ ପାଇଁ ସାରା ଦେଶ ଏବଂ ଶିଳ୍ପଗୁଡିକ ଏବେ ଲକ୍‌ଡାଉନ ହୋଇ ପଡିଛି। ବିତ୍ତୀୟ ସହାୟତା ଆବଶ୍ୟକ ହୋଇ ପଡିଥିବା ବେଳେ ସରକାର ଏ ଦିଗରେ ପଦକ୍ଷେପ ନେବେ ବୋଲି ଜଣାପଡିଛି। ଆର୍ଥତ୍କ ସହାୟତା ଘୋଷଣା ଦିଗରେ ସରକାର ଅଗ୍ରସର ହେଉଛନ୍ତି ବୋଲି ଦାସ ଗଣମାଧ୍ୟମକୁ ସୂଚନା ଦେଇଛନ୍ତି। କୋଭିଡ୍‌ ସମସ୍ୟାକୁ ସମାଧାନ କରିବା ଏବଂ ବିତ୍ତୀୟ ଶୃଙ୍ଖଳାକୁ ସମ୍ଭାଳିବା ଦିଗରେ ସରକାର ସତର୍କତାର ସହ କାମ କରିବେ। ୨୦୨୦-୨୧ ଲାଗି ଲକ୍ଷ୍ୟ ରଖାଯାଇଥିବା ୩.୫% ବିତ୍ତୀୟ ହାସଲ ଏବେ ବଡ ଚ୍ୟାଲେଞ୍ଜ। ଏବେ ପ୍ରତ୍ୟକ୍ଷ ଟିକସ ସଂଗ୍ରହ ପ୍ରଭାବିତ ସ୍ଥିତିରେ ରହିଥିବାରୁ ବିତ୍ତୀୟ ନିଅଣ୍ଟ ଧାର୍ଯ୍ୟ ଲକ୍ଷ୍ୟ ଟପିଲେ ଏହାକୁ ସମ୍ଭାଳିବା କଷ୍ଟକର ହୋଇ ପଡିବ ବୋଲି ଦାସ ମତବ୍ୟକ୍ତ କରିଛନ୍ତି।
ବିତ୍ତୀୟ ନିଅଣ୍ଟ ସ୍ଥିତି ସମ୍ଭାଳିବା ଲାଗି ଅର୍ଥ ସହାୟତା ଦେବାକୁ କେନ୍ଦ୍ରୀୟ ବ୍ୟାଙ୍କ ସ୍ବତନ୍ତ୍ର ମହାମାରୀ ବଣ୍ଡ କିମ୍ବା ପ୍ରାଇଭେଟ ପ୍ଲେସ୍‌ମେଣ୍ଟ ବଣ୍ଡ ଜାରି କରିବା ନେଇ ଏକ ପ୍ରଶ୍ନ ଉପରେ ଦାସ କୌଣସି ଉତ୍ତରରେ ରଖିନାହାନ୍ତି। ସେ କହିଛନ୍ତି ଯେ, ବର୍ତ୍ତମାନ ପରିସ୍ଥିତିରେ ଏ ନେଇ କୌଣସି ବିଚାର କରାଯାଇ ନାହିଁ। ପାଣ୍ଠି ଲାଗି ବିଭିନ୍ନ ବିକଳ୍ପ ଉପରେ ବିଚାର କରାଯାଉଛି। କ୍ଷୁଦ୍ର ଏବଂ ମଧ୍ୟମ ବର୍ଗ ଅଣ ବ୍ୟାଙ୍କିଙ୍ଗ୍‌ ବିତ୍ତ ପ୍ରତିଷ୍ଠାନ(ଏନ୍‌ବିଏଫ୍‌ସି)ଗୁଡ଼ିକୁ ପାଣ୍ଠି ଯୋଗାଣ ନେଇ ସରକାର ପ୍ରୟାସ ଜାରି ରଖିବେ। ଏହି ସଂସ୍ଥାଗୁଡିକ ସାମ୍ନା କରୁଥିବା ସମସ୍ୟା ସମାଧାନ ଲାଗି ଅଧିକ ପଦକ୍ଷେପ ନିଆଯିବ। ଦେଶର ବ୍ୟାଙ୍କିଙ୍ଗ୍‌ ସିଷ୍ଟମ ସୁରକ୍ଷିତ ରହିଛି ବୋଲି ସେ ମତବ୍ୟକ୍ତ କରିଛନ୍ତି।