ଦାରିଙ୍ଗବାଡ଼ି,୩୦ା୪(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ପଞ୍ଚାୟତ ବି.ଡକେବାଡ଼ି ଗ୍ରାମରେ ୧୦ ଦିନ ହେବ ୨୦ରୁ ଊର୍ଦ୍ଧ୍ୱ ଜଣଙ୍କୁ ଜ୍ୱର ହେବା ସହ ପତଳା ଝାଡ଼ା ଲାଗି ରହିଛି। ଡାକ୍ତରୀ ଦଳ ଚିକିତ୍ସା ପାଇଁ ଯାଇଥିଲେ ମଧ୍ୟ ସମସ୍ତ ରୋଗୀଙ୍କ ଘରେ ପହଞ୍ଚି ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ସେପଟେ ପିଇବା ପାଣି ଯୋଗୁ ଏଭଳି ବାରମ୍ବାର ଜ୍ୱର ଏବଂ ଝାଡ଼ା ହେଉଥିବା ଚିକିତ୍ସା କରୁଥିବା ଡାକ୍ତରଙ୍କ ପକ୍ଷରୁ କୁହାଯାଉଛି। କିନ୍ତୁ ବିଶୁଦ୍ଧ ପିଇବା ପାଣିର ବ୍ୟବସ୍ଥା କରାଯାଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏବେ ସୁଦ୍ଧା କିଛି ଲୋକ ଘରୋଇ କ୍ଲିନିକ୍ରେ ଚିକିତ୍ସା ହେଉଥିବା ବେଳେ ଆଉ କିଛି ଲୋକ ଡାକ୍ତରଖାନାରେ ପହଞ୍ଚିଛନ୍ତି। ଆବଶ୍ୟକ ଡାକ୍ତର ଟିମ୍ ବି.ଡକେବାଡ଼ି ଯାଇ ଚିକିତ୍ସା କରିବା ଏବଂ ସଠିକ୍ ଢଙ୍ଗରେ ଚିକିତ୍ସା କରିବାକୁ ଗ୍ରାମର ସୁନାବାର ମଲ୍ଲିକ, ପ୍ରେମିକା ହାଁସଦା ନିଲାମତି ନାୟକ, କିଷାନ ନାୟକ, ପାଏଲ ନାୟକ ପ୍ରମୁଖ ଦାବି କରିଛନ୍ତିି। ତୁରନ୍ତ ବିଶୁଦ୍ଧ ପାନୀୟଜଳ ଯୋଗାଇ ଦେବାକୁ ଦାବି ହେଉଛି। ଗ୍ରାମରେ ଗୋଟିଏ କୂଅ ରହିଥିବା ବେଳେ ଅଧିକାଂଶ ଲୋକ ଏହା ଉପରେ ନିର୍ଭରଶୀଳ। ତେବେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଏବଂ ବ୍ଲକ କାର୍ଯ୍ୟାଳୟ ମଧ୍ୟରେ ସମନ୍ବୟର ଅଭାବ ଯୋଗୁ ବି.ଡକେବାଡ଼ି ବାସିନ୍ଦା ହନ୍ତସନ୍ତ ହେଉଛନ୍ତି। ଏନେଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଇନଚାର୍ଜ ଡାକ୍ତର ଜୟପାଲ ସେନାପତି କହିଛନ୍ତିି ଯେ, ସେ ଏନେଇ ଜିଲାକୁ ଜଣାଇଛନ୍ତି। ଉକ୍ତ ଗ୍ରାମରେ ନଳକୂପ ଥାଇ ମଧ୍ୟ ଲୋକେ ଚୁଆପାଣି ବ୍ୟବହାର କରୁଥିବାରୁ ଏଭଳି ସମସ୍ୟା ଉପୁଜିଛି। ତେଣୁ ଗୁରୁବାର ୬ ଜଣଙ୍କୁ ଡାକ୍ତରଖାନା ଅଣାଯାଇଛି। ଚିକିତ୍ସା ଚାଲିବା ସହ ସେମାନଙ୍କ ସ୍ବାବ୍ ଟେଷ୍ଟ ପାଇଁ ପଠାଯିବ ବୋଲି ସେ କହିଛନ୍ତି।
